AKP ភ្នំពេញ ថ្ងៃទី១៦ ខែមករា ឆ្នាំ២០២៥ -- ប្រព័ន្ធផ្សព្វផ្សាយក្នុងស្រុកបានដកស្រង់សម្ដីសមាគមបន្លែ និងផ្លែឈើវៀតណាមថា ប្រទេសវៀតណាមបានកំណត់គោលដៅប្រាក់ចំណូលចំនួន ៨ប៊ីលានដុល្លារអាម៉េរិកសម្រាប់នាំចេញបន្លែ និងផ្លែឈើនៅឆ្នាំ២០២៥ ដោយសារមូលដ្ឋានគ្រឹះដ៏រឹងមាំនៃសមិទ្ធិផលចំនួន ៧,១ប៊ីលានដុល្លារអាម៉េរិកក្នុងឆ្នាំ២០២៤។

លោក ង្វៀន ថាញ់បិញ (Nguyen Thanh Binh) ប្រធានសមាគមបានមានប្រសាសន៍ថា ទោះបីជាភាពតានតឹងពាណិជ្ជកម្ម និងជម្លោះភូមិសាស្ត្រនយោបាយនឹងក្លាយជាបញ្ហាប្រឈមដ៏សំខាន់សម្រាប់ការនាំចេញកសិផលនៅឆ្នាំ២០២៥ ក៏ដោយ។ គោលដៅនាំចេញតម្លៃ ៨ប៊ីលានដុល្លារអាម៉េរិកគឺអាចធ្វើទៅបាន ដោយផ្តោតលើការពង្រីកចំណែករបស់ពួកគេនៅក្នុងទីផ្សារសំខាន់ៗរបស់អាជីវកម្ម និងការវិនិយោគលើបច្ចេកវិទ្យាទំនើបក្រោយការប្រមូលផល។

លោកបាននិយាយថា សហគ្រាសគួរតែយកចិត្តទុកដាក់លើការកែលម្អគុណភាពផលិតផល និងការលើកកម្ពស់ការប្រកួតប្រជែង ខណៈពេលដែលរក្សាបាននូវការគោរពយ៉ាងតឹងរឹងជាមួយនឹងកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី។

យោងតាមក្រសួងកសិកម្ម និងអភិវឌ្ឍន៍ជនបទ ការនាំចេញផ្លែឈើ និងបន្លែរបស់វៀតណាមក្នុងឆ្នាំ២០២៤ បានកើនឡើង ២៧,១% បើធៀបនឹងឆ្នាំ២០២៣ ដែលជាឆ្នាំដំបូងដែលប្រាក់ចំណូលលើសពីសញ្ញាសម្គាល់ ៧ប៊ីលានដុល្លារអាម៉េរិក។

ក្រសួងបាននិយាយថា ផលិតផលវៀតណាមបានពង្រឹងជំហររបស់ខ្លួននៅក្នុងទីផ្សារសំខាន់ៗដោយកើនឡើងដល់ចំណាត់ថ្នាក់ទីពីរដែលពីមុនជាប់ចំណាត់ថ្នាក់ទីបីនៅក្នុងប្រទេសចិនខណៈពេលដែលការកត់ត្រាកំណើនគួរឱ្យកត់សម្គាល់ជាង ៣០% នៅក្នុងសហរដ្ឋអាមេរិកនិង ៨០% នៅក្នុងប្រទេសថៃ៕

ដោយ៖ មូល មិនា (ប្រភព៖ ស៊ីនហួ)