AKP ភ្នំពេញ ថ្ងៃទី១៦ ខែមករា ឆ្នាំ២០២៥ -- ប្រទេស​ថៃ​កំពុង​ជួប​ប្រទះ​នឹង​អាកាសធាតុ​ត្រជាក់​ជាងរាល់ដង ដែល​គេ​រំពឹង​ថា​នឹង​អូស​បន្លាយ​រហូត​ដល់​ពាក់​កណ្តាល​ខែ​កុម្ភៈ ដោយសារការ​រង​ឥទ្ធិពល​ពី​បាតុភូតអាកាសធាតុឡានីណា (La Niña)។ រដូវក្តៅឆ្នាំនេះក៏ត្រូវបានគេរំពឹងថានឹងក្តៅតិចជាងឆ្នាំមុនៗដែរ។

លោក ចេសសាដា​ ដេនដួងបូរីប៉ាន់ (Jessada Denduangboripant) អ្នកជំនាញបរិស្ថានមកពីសាកលវិទ្យាល័យជូឡាឡុងកនបានកត់សម្គាល់ថា ប្រទេសថៃបានឈានចូលដំណាក់កាលនៃបាតុភូតអាកាសធាតុឡានីណាកាលពីខែមុន។

នៅក្នុងការបង្ហោះមួយនៅលើបណ្តាញសង្គមហ្វេសប៊ុក លោក ចេសសាដា បានយោងទៅលើសេចក្តីថ្លែងការណ៍ថ្មីមួយរបស់នាយកដ្ឋានឧតុនិយមថៃដែលបានព្យាករណ៍ថា សីតុណ្ហភាពត្រជាក់នឹងបន្តរហូតដល់ពាក់កណ្តាលខែកុម្ភៈ បន្ទាប់ពីនោះរដូវក្តៅនឹងខិតជិតមកបន្តិចម្តងៗ។

ឥទ្ធិពលរបស់បាតុភូតអាកាសធាតុឡានីណាត្រូវបានគេរំពឹងថានឹងនាំមកនូវខ្យល់បក់ខ្លាំងពីភាគខាងត្បូង និងភាគអាគ្នេយ៍ឆ្លងកាត់ប្រទេសថៃ អមដោយសំណើមខ្ពស់ និងការកើនឡើងនូវលទ្ធភាពនៃព្យុះផ្គររន្ទះនៅចន្លោះខែកុម្ភៈ និងខែឧសភាផងដែរ។ សីតុណ្ហភាពក្នុងខែមីនា និងមេសា ត្រូវបានព្យាករណ៍ថានឹងទាបជាងធម្មតា ដោយសារការកើនឡើងនៃសំណើម និងទឹកភ្លៀង។

លោក ចេសសាដា បាននិយាយបន្ថែមថា ខែមេសា និងខែឧសភា ទំនងជានឹងមានភ្លៀងធ្លាក់ខ្ពស់ច្រើនជាងឆ្នាំមុនៗ ដោយភ្លៀងធ្លាក់រាយប៉ាយបន្តរហូតដល់ខែមិថុនា៕

ដោយ៖ យា ចិន្ដាខន្ដី (ប្រភព៖ VNA)