AKP ភ្នំពេញ ថ្ងៃទី០៩ ខែមករា ឆ្នាំ២០២៥-- ឯកឧត្តម នាយឧត្តមសេនីយ៍ ណឹម សុវត្ថិ អគ្គនាយកនៃអគ្គនាយកដ្ឋាននយោបាយ និងកិច្ចការបរទេស និងជាប្រធានអនុគណៈកម្មការកិច្ចសហប្រតិបត្តិការយោធារវាងកងទ័ពទាំងពីរ កម្ពុជា-ចិន បានអញ្ជើញដឹកនាំកិច្ចប្រជុំអនុគណៈកម្មការកិច្ចសហប្រតិបត្តិការយោធា នៃគណៈកម្មការចម្រុះកិច្ចសហប្រតិបត្តិការយោធា និងបច្ចេកទេសយោធា រវាងកងទ័ពទាំងពីរ កម្ពុជា-ចិន នៅព្រឹកថ្ងៃទី០៨ ខែមករា ឆ្នាំ២០២៥ នៅទីស្ដីការក្រសួងការពារជាតិ។

ថ្លែងបើកកិច្ចប្រជុំ ឯកឧត្តម នាយឧត្តមសេនីយ៍ បានរំលឹកពីស្នាដៃរបស់សម្តេចពិជ័យ ទៀ បាញ់ អតីតឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដែលសម្តេចបានដាក់ចេញនូវចក្ខុវិស័យ និងកំណែទម្រង់ ដើម្បីនាំមកនូវការរីកចម្រើនដល់ខ.ភ.ម និងបញ្ជាក់ថា ខ.ភ.ម ជាជន្ទល់ដ៏រឹងមាំរបស់រាជរដ្ឋាភិបាល ក្នុងការថែរក្សានូវសុខសន្តិភាព និងការពារនូវរាល់សមិទ្ធផលទាំងឡាយ ដែលរាជរដ្ឋាភិបាលសម្រេចបានក្នុងពេលកន្លងមក។ កិច្ចប្រជុំថ្ងៃនេះជាកិច្ចប្រជុំលើកទី១ បន្ទាប់ពីកែសម្រួលសមាសភាពក្រុមការងារលើកមុន។

សូមបញ្ជាក់ថា ក្នុងសេចក្តីសម្រេចស្តីពីការបង្កើតអនុគណៈកម្មការកិច្ចសហប្រតិបត្តិការយោធានៃគណៈកម្មការចម្រុះ លើកិច្ចសហប្រតិបត្តិការយោធា និងបច្ចេកទេសយោធា រវាងកងទ័ពទាំងពីរកម្ពុជា-ចិន បានសម្រេចតែងតាំងឯកឧត្តម នាយឧត្តមសេនីយ៍ ណឹម សុវត្ថិ អគ្គនាយកនៃអគ្គនាយកដ្ឋាននយោបាយ និងកិច្ចការបរទេស ជាប្រធានអនុគណៈកម្មការកិច្ចសហប្រតិបត្តិការយោធា រវាងកងទ័ពទាំងពីរ កម្ពុជា-ចិន  និងតែងតាំងអនុប្រធានអនុគណៈកម្មាការចំនួន៧រូប ព្រមទាំងសមាជិកអនុគណៈកម្មាការចំនួន៣៥ រូប។

ក្នុងឱកាសនោះ កិច្ចប្រជុំក៏បានធ្វើការពិភាក្សា និងពិនិត្យមើលនូវរបាយការណ៍លទ្ធផលកិច្ចសហប្រតិបត្តិការក្នុងពេលកន្លងមក ដែលទាក់ទងទៅនឹងការបញ្ជូនសិក្ខាកាមទៅសិក្សានៅប្រទេសចិន និងសិក្ខាកាមយោធាចិនមកសិក្សាភាសាខ្មែរនៅកម្ពុជា ការផ្លាស់ប្ដូរគណៈប្រតិយោធា រវាងកងទ័ពប្រទេសទាំងពីរកម្ពុជា-ចិន ការធ្វើសមយុទ្ធនាគមាស កិច្ចសហប្រតិបត្តិការលើវិស័យសុខាភិបាល រវាងកងទ័ពប្រទេសទាងពីរ និងគម្រោងកិច្ចសហប្រតិបត្តិការផ្សេងៗទៀត រវាងកងទ័ពទាំងពីរកម្ពុជា-ចិន។

ថ្លែងបូកសរុបកិច្ចប្រជុំ ឯកឧត្តម នាយឧត្តមសេនីយ៍ ណឹម សុវត្ថិ បានកោតសរសើរចំពោះបណ្ដាអង្គភាពនៅក្រសួងការពារជាតិ និងគ្រប់បណ្ដាកងយោធពលខេមរភូមិន្ទទាំងអស់ សម្រេចបានលទ្ធផលល្អប្រសើរ ក្នុងការអនុវត្តកិច្ចសហប្រតិបត្តិការ រវាងកងទ័ពទាំងពីរនាពេលកន្លងមក ទាំងការផ្លាស់ប្ដូរទស្សនកិច្ច និងការផ្ដល់ជំនួយផ្សេងៗ ទាំងសម្ភារ និងយោធាបរិក្ខារ សម្រាប់ការប្រើប្រាស់នៅពេលបច្ចុប្បន្ន និងថ្ងៃអនាគត។ កិច្ចប្រជុំអនុគណៈកម្មការកិច្ចសហប្រតិបត្តិការយោធានៃគណៈកម្មការចម្រុះកិច្ចសហប្រតិបត្តិការយោធា និងបច្ចេកទេសយោធា រវាងកងទ័ពទាំងពីរ កម្ពុជា-ចិន នឹងប្រជុំក្នុងរយៈពេល៣ខែម្តង ដើម្បីពិនិត្យវាយតម្លៃនូវវឌ្ឍភាពការងារ ដែលបានអនុវត្តក្នុងកិច្ចសហប្រតិបត្តិការ រវាងកងទ័ពទាំងពីរ កម្ពុជា-ចិន៕

ដោយ សំ សាម៉ន