AKP កំពង់ធំ ថ្ងៃទី០៥ ខែមករា ឆ្នាំ២០២៥ -- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នាព្រឹកថ្ងៃទី០៥ ខែមករា ឆ្នាំ២០២៥ បានដឹកនាំសហការីទៅជួបសំណេះសំណាលសាកសួរសុខទុក្ខ និងឧបត្ថម្ភអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានិងលោកជំទាវបណ្ឌិត ពេជ ចន្ទមុន្នី ជូនក្រុមគ្រួសារកងទ័ពដែលមានជីវភាពលំបាកខ្វះខាតរស់នៅក្នុងទីតាំងបន្ទាយកងវរសេនាតូចលេខ១នៃបញ្ជាការដ្ឋានតំបន់ប្រតិបត្តិការសឹករងកំពង់ធំ។

លោកវរសេនីយ៍ទោ ថនស៊ី សក្តា មេបញ្ជាការកងវរសេនាតូចលេខ១ បានឡើងធ្វើរបាយការណ៍អំពីស្ថានភាពទូទៅក្នុងការគ្រប់គ្រងកងកម្លាំងការហ្វឹកហ្វឺនរៀនសូត្រ អប់រំចិត្តសាស្ត្រការប្រើប្រាស់កម្លាំងចូលរួមក្នុងកិច្ចប្រតិបត្តិការការពារទប់ស្កាត់និងបង្ក្រាបបទល្មើសធនធានធម្មជាតិនិងការត្រៀមបម្រុងកម្លាំងអន្តរាគមន៍ តាមបទបញ្ជារបស់មេបញ្ជាការតំបន់ប្រតិបត្តិការសឹករងកំពង់ធំ។ ក្រុមគ្រួសារកងទ័ពដែលកំពុងរស់នៅក្នុងទីតាំងបន្ទាយជាមួយស្វាមី ហើយមានជីវភាពលំបាកខ្វះខាតចំនួន២០គ្រួសារ សំណូមពរឯកឧត្តមមេបញ្ជាការតំបន់ប្រតិបត្តិការសឹករងកំពង់ធំ ជួយដោះស្រាយ។

ឧត្តមសេនីយ៍ទោ សោម ស៊ុន បានថ្លែងកោតសរសើរចំពោះកម្លាំងកងវរសេនាតូចលេខ១នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានបំពេញភារកិច្ចបានយ៉ាងល្អប្រសើរ ដោយអនុវត្តតាមភារកិច្ច ដែលបានប្រគល់ និងអនុវត្តតាមបទបញ្ជាក្នុងការចល័តអន្តរាគមន៍កងកម្លាំង បានទាន់ពេលវេលា និងមានប្រសិទ្ធភាព។

ឧត្តមសេនីយ៍ទោ សោម ស៊ុន បានណែនាំដល់មេបញ្ជាការ និងថ្នាក់ដឹកនាំគ្រប់លំដាប់ថ្នាក់ ព្រមទាំងនាយទាហាន នាយទាហានរង និងពលទាហានទាំងអស់ នៃកងវរសេនាតូចលេខ១ ត្រូវបន្តខិតខំសាមគ្គីសហការគ្នាឱ្យបានល្អ ក្នុងការបំពេញតួនាទីភារកិច្ចរបស់កងយោធពលខេមរភូមិន្ទ និងត្រូវបន្តត្រៀមបម្រុងកម្លាំង និងគ្រឿងបំពាក់គ្រប់គ្រាន់សម្រាប់ចល័តអន្តរាគមន៍តាមបទបញ្ជាឱ្យទាន់ពេលវេលា និងមានប្រសិទ្ធភាព។ ជាមួយនោះដែរក៏បានណែនាំដល់កក្រុមគ្រួសារកងទ័ព ដែលរស់នៅក្នុងទីតាំងបន្ទាយជាមួយស្វាមី ត្រូវខិតខំបង្កបង្កើនផលដាំដំណាំចិញ្ចឹមសត្វ រួមចំណែកដោះស្រាយជីវភាពគ្រួសារឱ្យបានល្អប្រសើរ និងត្រូវខិតខំថែរក្សា និងជំរុញកូនចៅឱ្យបានចូលរៀនសូត្រ និងមានសុខភាពល្អ។

ក្នុងឱកាសនោះ ឧត្តមសេនីយ៍ទោ សោម ស៊ុន បានប្រគល់ជូនអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនដល់ក្រុមគ្រួសារកងទ័ពចំនួន២០គ្រួសារ ដែលកំពុងរស់នៅក្នុងទីតាំងបន្ទាយ ដោយក្នុងមួយគ្រួសារទទួលបាននូវអង្ករចំនួន២៥គីឡូក្រាម មីជាតិចំនួន១កេស ទឹកត្រីទឹកស៊ីអ៊ីវចំនួន១យួរ និងត្រីខកំប៉ុងចំនួន១យួរផងដែរ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)