AKP ភ្នំពេញ ថ្ងៃទី១ ខែមករា ឆ្នាំ២០២៥-- ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈបានគូសបញ្ជាក់ថាព្រឹត្តិការណ៍«សាទរកម្ពុជា»លើកដំបូង កាលពីរសៀលថ្ងៃទី៣១ខែធ្នូ ឆ្នាំ២០២៤ ឆ្លងចូលឆ្នាំថ្មី ឆ្នាំសកល២០២៥ នៅមុខព្រះបរមរាជវាំងជាព្រឹត្តិការណ៍នៃការអបអរសាទរដល់សង្គមមួយ ប្រកបដោយភាពរស់រវើក ជាមួយនឹងការបង្ហាញវិសេសភាពនៃអត្តសញ្ញាណ ដោយសមានចិត្តសោមនស្សចំពោះអ្វីៗដែលបានឆ្លងកាត់និងបានជម្នះ និងការលើកតម្កើងមោទន ភាពក្នុងភាពជាប្រជាជាតិមួយ។

ព្រឹត្តិការណ៍ដ៏ធំ«សាទរកម្ពុជា»បានប្រារព្ធឡើងយ៉ាងអធិកអធមដោយមានប្រជាពលរដ្ឋរាប់សែននាក់ និងភ្ញៀវទេសចរអន្តរ ជាតិចូលរួមយ៉ាងច្រើនកុះករ។ 

នៅក្នុងព្រឹត្តិការណ៍ដ៏ធំនេះដែរ ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ប្រធានសហភាពសហព័ន្ធយុវជនកម្ពុជានិងជាប្រធានគណៈកម្មការរៀបចំព្រឹត្តិការណ៍ «សាទរកម្ពុជា» បានមានប្រសាសន៍ថា «សាទរកម្ពុជា»រៀបចំឡើងដើម្បីផ្សារភ្ជាប់ប្រជាជន មនោសញ្ចេតនារបស់ប្រជាជនទៅនឹងសង្គមជាតិយើងទាំងមូល។បង្កើតជាវេទិកា ជាឱកាសសម្រាប់គ្រប់កោសិកាទាំងអស់ចូលរួមបង្ហាញអត្តសញ្ញាណរបស់ខ្លួន ដោយមោទនៈក្រោមស្មារតីសាមគ្គីភាពនិងមោទនភាពក្នុងនាមជាជាតិខ្មែរតែមួយ។

ព្រឹត្តិការណ៍«សាទរកម្ពុជា»ជាមួយនឹងការរៀបចំការតាំងលម្អរចនាតុបតែង និងផ្សារភ្ជាប់ គំនិតច្នៃប្រឌិតសិល្បៈបុរាណនិង សហសម័យជាកិច្ចចាប់ផ្តើមនៃពិធីជាប្រវត្តិសាស្រ្តមានក្បួនដង្ហែសាទរកម្ពុជា ការច្រៀង និងសម្តែងចម្រៀងទទួលស្វាគមន៍ ក្បួនដង្ហែសាទរកម្ពុជា មកដល់មុខវេទិកាកិត្តិយស ការសម្តែងរបាំ សហសម័យ របាំជូនពរ «សាទរកម្ពុជា» ការសម្តែងពិធីដង្ហែទង់ជាតិនៃព្រះរាជាណាចក្រកម្ពុជា ពិធីគោរពទង់ជាតិនៃព្រះរាជាណាចក្រកម្ពុជាច្រៀងដោយផ្ទាល់។

ព្រឹត្តិការណ៍ «សាទរកម្ពុជា» បានប្រព្រឹត្ត ទៅក្នុងបរិយាកាសសប្បាយរីករាយ ដោយបានបន្សល់ទុកនូវស្នាមញញឹម និងការជួបជុំសាទរជាមហាគ្រួសារខ្មែរ។

សូមបញ្ជាក់ថា ក្នុងកម្មវិធីក្បួនដង្ហែនេះ មានការសម្តែងទស្សនីយ ភាពវប្បធម៌ ព្យុហយាត្រា ឬកីឡា ការតុប តែងសម្លៀកបំពាក់ និងគ្រឿងរចនាកាយ រួមជាមួយការច្នៃប្រឌិតបង្កើតយានក្បួន ដង្ហែ ពោងបង្ហោះ និងការតុបតែងរចនា ឬគ្រឿងលម្អ ជាមួយពណ៌ បច្ចេកវិទ្យា និងពន្លឺ ក៏ដូចជាការបង្ហាញទេពកោសល្យសិល្បៈ ឬការច្នៃប្រឌិត ដោយមានកិច្ចសហការរវាងស្ថាប័នពាក់ព័ន្ធជាច្រើន៕

ដោយ៖ ប៊ុនរិទ្ធ