AKP ភ្នំពេញ ថ្ងៃទី២២ ខែឧសភា ឆ្នាំ២០២៦ -- លោក គូ ជៀគុនអ្នកនាំពាក្យក្រសួងការបរទេសចិន បាននិយាយកាលពីថ្ងៃព្រហស្បតិ៍ថានាយករដ្ឋមន្ត្រីប៉ាគីស្ថាន លោក សេបាស សារីហ្វ នឹងៅបំពេញទស្សនកិច្ចផ្លូវការនៅប្រទេសចិនចាប់ពីថ្ងៃទី២៣ ដល់ថ្ងៃទី២៦ ខែឧសភា ឆ្នាំ២០២៦។

លោក គូ បាននិយាយនៅក្នុងសន្និសីទសារព័ត៌មានមួយថា «តាមការអញ្ជើញរបស់នាយករដ្ឋមន្ត្រីក្រុមប្រឹក្សារដ្ឋចិន លោក លី ឈៀង នាយករដ្ឋមន្ត្រីប៉ាគីស្ថាន លោក សេបាស សារីហ្វ នឹងមកបំពេញទស្សនកិច្ចផ្លូវការនៅប្រទេសចិនចាប់ពីថ្ងៃទី២៣ ដល់ថ្ងៃទី២៦ ខែឧសភា»។

អ្នកនាំពាក្យរូបនេះបាននិយាយថា លោក សារីហ្វ ត្រូវបានគេរំពឹងថានឹងជួបប្រជុំដាច់ដោយឡែកជាមួយប្រធានាធិបតីចិន លោក ស៊ី ជីនពីង និងជាមួយលោក លី ក្នុងអំឡុងពេលទស្សនកិច្ចនោះ។

អ្នកការទូតរូបនេះបានបន្ថែមថា «មេដឹកនាំនៃប្រទេសទាំងពីរនឹងធ្វើការផ្លាស់ប្តូរទស្សនៈស៊ីជម្រៅទៅលើទំនាក់ទំនងទ្វេភាគី និងបញ្ហាដែលមានផលប្រយោជន៍ទៅវិញទៅមក ហើយនឹងគូសបញ្ជាក់ពីដំណើរសម្រាប់ការអភិវឌ្ឍទំនាក់ទំនងចិន-ប៉ាគីស្ថានក្រោមលក្ខខណ្ឌថ្មី»។

អ្នកនាំពាក្យរូបនេះក៏បាននិយាយផងដែរថា លោក សារីហ្វ នឹងចូលរួមពិធីជប់លៀងមួយដែលជាការប្រារព្ធខួបលើកទី៧៥ នៃការបង្កើតទំនាក់ទំនងការទូតរវាងចិន និងប៉ាគីស្ថាន ហើយក៏នឹងទៅទស្សនកិច្ចខេត្តជែជាំងនៅភាគខាងកើតផងដែរ៕

ដោយ៖ យា ចិន្ដាខន្ដី (ប្រភព៖ ស្ពុតនីក)