AKP កំពង់ធំ ថ្ងៃទី ២៦ ខែតុលា ឆ្នាំ ២០២៦--នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤នាព្រឹកថ្ងៃទី២៦ ខែតុលា ឆ្មាំ២០២៦បានធ្វើការផ្សព្វផ្សាយសភាពការណ៍ថ្មីៗ ដែលកើតមានឡើង និងប្រគល់ភារកិច្ចចាំបាច់មួយចំនួនជូនដល់នាយទាហាន នាយទាហានរងនិងពលទាហាន ចំណុះទីបញ្ជាការតំបន់ប្រតិបត្តិការសឹករងកំពង់ធំក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ។

ឧត្តមសេនីយ៍ទោ សោម ស៊ុន បានផ្សព្វផ្សាយសភាពការណ៍ជាតិ សភាពការណ៍អន្តរជាតិ និងបច្ចុប្បន្នភាពថ្មី នៃស្ថានភាពព្រំដែនកម្ពុជា ថៃ ដែលបច្ចុប្បន្នកងយោពពលខេមរភូមិន្ទរបស់យើង បានខិតខំអត់ធ្មត់អនុវត្តតាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់ នៃកងយោធពលខេមរភូមិន្ទ ក្នុងការអនុវត្តន៍យ៉ាងខ្ជាប់ខ្ជួននូវបទឈប់បាញ់ តាមសេចក្តីប្រកាសរួម ដែលភាគីកម្ពុជានិងថៃ បានចុះហត្ថលេខារួមគ្នាកាលពីថ្ងៃទី ២៧ ខែធ្នូ ឆ្នាំ២០២៥ និងការគោរពយ៉ាងម៉ឺងម៉ាត់តាមគោលការណ៍របស់រាជរដ្ឋាភិបាលនៃព្រះរាជាណាចក្រកម្ពុជា ក្នុងការដោះស្រាយបញ្ហាព្រំដែនកម្ពុជា ថៃតាមកិច្ចព្រមព្រៀងនានាដែលនៅជាធរមានដោយសន្តិវិធី និងតាមច្បាប់អន្តរជាតិ ។

ឧត្តមសេនីយ៍ទោ សោម ស៊ុន បានថ្លែងនូវការកោតសរសើរ ចំពោះកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានខិតខំបំពេញភារកិច្ចតាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ នាពេលកន្លងទៅទទួលបានលទ្ធផលល្អប្រសើរ ក្នុងនោះមានកម្លាំងមួយផ្នែក បាននិងកំពុងបំពេញភារកិច្ចការពារបូរណភាពទឹកដីនៅតាមខ្សែបន្ទាត់ព្រំដែនកម្ពុជា ថៃ និងកម្លាំងមួយផ្នែកទៀត កំពុងបំពេញភារកិច្ចយ៉ាងសកម្មក្នុងការការពារ ទប់ស្កាត់ និងបង្ក្រាបបទល្មើសធនធានធម្មជាតិ ពិសេសការបង្ក្រាបបទល្មើសព្រៃឈើ និងបទល្មើសនេសាទ ទទួលបានលទ្ធផលគួរជាទីមោទនៈ ។

ឧត្តមសេនីយ៍ទោ សោម ស៊ុន បានប្រគល់ភារកិច្ចសំខាន់ៗមួយចំនួនជូនយោធិនគ្រប់រូប ដែលត្រូវអនុវត្តបន្តមានជាអាទិ៖ទី១.ត្រូវគ្រប់គ្រង និងពង្រឹងតួនាទីភារកិច្ចដល់កងកម្លាំង ក្នុងស្មារតីស្នេហាជាតិ ដើម្បីការពារបូរណភាពទឹកដីនិងការពារប្រជាជន ។ទី២.ត្រូវបន្តអនុវត្តយ៉ាងម៉ឺងម៉ាត់តាមបទបញ្ជារបស់ប្រមុខរាជរដ្ឋាភិបាល ក្នុងការការពារ ទប់ស្កាត់ និងបង្ក្រាបបទល្មើសព្រៃឈើ និងបទល្មើសនេសាទឱ្យទទួលបានជោគជ័យ ដើម្បីសង្គមជាតិយើង និងកូនចៅយើងនៅជំនាន់ក្រោយៗទៀត និងទី៣.ត្រូវអនុវត្តឱ្យមានប្រសិទ្ធភាព តាមប្រតិទិនការងារ ស្តីពីការពិនិត្យសុខភាព កាយសម្បទា និងរៀបចំការជូនដំណើរប្រជាពលរដ្ឋដែលបានស្ម័គ្រចិត្តចូលបំពេញកាតព្វកិច្ចយោធាឱ្យបានអធិកអធម្ម ទៅកាន់សាលាហ្វឹកហ្វឺនកងទ័ពប្រកបដោយកិត្តិយសនិងសេចក្តីថ្លៃថ្នូរ៕

ដោយ ស៊ុម វណ្ណា