AKP ភ្នំពេញ ថ្ងៃទី២២ ខែតុលា ឆ្នាំ២០២៦--ប្រព័ន្ធអេកូឡូស៊ីតំបន់ឆ្នេរផ្តល់ជម្រកដល់ជីវចម្រុះ និងជាប្រភពធនធានធម្មជាតិដ៏សំខាន់សម្រាប់ជីវភាពរស់នៅរបស់សហគមន៍។ ការគ្រប់គ្រង និងអភិរក្សធនធានទាំងនេះប្រកបដោយប្រសិទ្ធភាព តម្រូវឱ្យមានទិន្នន័យដែលអាចជឿទុកចិត្តបាន ដើម្បីវាយតម្លៃវឌ្ឍនភាព កំណត់ចំណុចខ្វះខាត និងគាំទ្រដល់ការសម្រេចចិត្តលើអាទិភាពនៃការអភិរក្សធនធានធម្មជាតិ។

ក្នុងគោលបំណងនេះដែរ ក្រសួងបរិស្ថាន តាមរយៈគម្រោង CamAdapt បានរៀបចំវគ្គបណ្តុះបណ្តាលគ្រូបង្គោល ស្តីពីការប្រើប្រាស់កម្មវិធី KoboToolbox នៅខេត្តកោះកុង ចាប់ពីថ្ងៃទី២០-២១ ខែតុលា ឆ្នាំ២០២៦ ដើម្បីគាំទ្រដល់ការតាមដានការអនុវត្តផែនការគ្រប់គ្រងសហគមន៍តំបន់ការពារធម្មជាតិ។

ប្រភពខាងលើនេះបានឱ្យដឹងដែរថាសិក្ខាកាមបានអនុវត្តការប្រមូល និងពិនិត្យទិន្នន័យ ព្រមទាំងការរៀបចំរបាយការណ៍ឌីជីថល ដើម្បីជួយឱ្យមន្ត្រីពាក់ព័ន្ធអាចតាមដានវឌ្ឍនភាព និងកំណត់ចំណុចដែលត្រូវកែលម្អបានកាន់តែច្បាស់។

ការពង្រឹងសមត្ថភាពសហគមន៍នេះដែរ បានជួយគាំទ្រដល់ការអនុវត្តផែនការគ្រប់គ្រងឱ្យកាន់តែមានប្រសិទ្ធភាព និងការសម្រេចចិត្តដោយផ្អែកលើទិន្នន័យ។ ជាងនេះវាអាចជួយដល់ការអភិរក្សធនធានធម្មជាតិនៅតំបន់ឆ្នេរ ដែលមានសារៈសំខាន់ចំពោះជីវភាពរស់នៅ និងភាពធន់រយៈពេលវែងរបស់សហគមន៍នៅតំបន់ឆ្នេរ។

គួរបញ្ជាក់ថាវគ្គបណ្តុះបណ្តាលនេះមានការចូលរួមពីមន្ត្រីក្រសួងបរិស្ថាន មន្ត្រីមន្ទីរបរិស្ថានខេត្តកោះកុង មន្ត្រីឧទ្យានុរក្ស មន្ត្រីអភិវឌ្ឍន៍សហគមន៍ និងគណៈកម្មការសហគមន៍តំបន់ការពារធម្មជាតិពាមក្រសោបជាដើម៕

ដោយ៖ មករា