AKP បន្ទាយមានជ័យ ថ្ងៃទី២១ខែតុលា ឆ្នាំ២០២៦--ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានជំរុញឱ្យអាជ្ញាធរ និងស្ថាប័នពាក់ព័ន្ធយកចិត្តទុកដាក់លើការរៀបចំផែនការឆ្លើយតប និងផ្តល់ជំនួយសង្គ្រោះដល់គ្រួសាររងគ្រោះដោយទឹកជំនន់ឱ្យបានទាន់ពេលវេលា មានប្រសិទ្ធភាព និងស្របតាមតម្រូវការជាក់ស្តែងរបស់ប្រជាពលរដ្ឋនៅតាមមូលដ្ឋាន ដើម្បីរួមចំណែកកាត់បន្ថយការលំបាក និងសម្រាលបន្ទុកជីវភាពរបស់គ្រួសារដែលរងផលប៉ះពាល់ដោយគ្រោះធម្មជាតិនេះ។

ការជំរុញនេះធ្វើឡើងក្នុងឱកាសដែលឯកឧត្តម អ៊ុំ រាត្រី បានអញ្ជើញជាអធិបតីដឹកនាំកិច្ចប្រជុំពិភាក្សាស្តីពី «ផែនការឆ្លើយតបជំនួយដល់គ្រួសាររងគ្រោះដោយទឹកជំនន់នៅក្នុងខេត្តបន្ទាយ មានជ័យ» កាលពីថ្ងៃទី២០ ខែតុលា ឆ្នាំ២០២៦ នៅសាលប្រជុំក្រុមប្រឹក្សាខេត្តបន្ទាយមានជ័យ ដោយមានការចូលរួមពីតំណាងអាជ្ញាធរ និងស្ថាប័នពាក់ព័ន្ធ ដើម្បីពិភាក្សា និងកំណត់ទិសដៅការងារក្នុងការជួយដល់ប្រជាពលរដ្ឋដែលកំពុងប្រឈមនឹងផលប៉ះពាល់ដោយសារទឹកជំនន់។

ក្នុងកិច្ចប្រជុំនេះ ឯកឧត្តម អ៊ុំ រាត្រី បានគូសបញ្ជាក់ពីសារៈសំខាន់នៃការរៀបចំផែនការឆ្លើយតបឱ្យបានច្បាស់លាស់ និងមានប្រសិទ្ធភាព ដោយត្រូវផ្អែកលើស្ថានភាពជាក់ស្តែង និងតម្រូវការចាំបាច់របស់ប្រជាពលរដ្ឋនៅតាមតំបន់ដែលរងផលប៉ះពាល់។ ការងារនេះទាមទារឱ្យមានការសហការយ៉ាងជិតស្និទ្ធរវាងអាជ្ញាធរមូលដ្ឋាន មន្ទីរ អង្គភាពជំនាញ និងភាគីពាក់ព័ន្ធ ដើម្បីធានាថា ការឆ្លើយ តបចំពោះគ្រោះមហន្តរាយអាចអនុវត្តទៅដោយរលូន និងទទួលបានលទ្ធ ផលជាក់ស្តែង។

ឯកឧត្តមអភិបាលខេត្តបានជំរុញឱ្យភាគីពាក់ព័ន្ធផ្តោតលើការកំណត់អត្តស ញ្ញាណគ្រួសារដែលរងផលប៉ះពាល់ ការវាយតម្លៃតម្រូវការចាំបាច់ និងការសម្របសម្រួលធនធានជំនួយឱ្យសមស្របទៅតាមស្ថានភាពនីមួយៗ។ ជាពិសេស ការផ្តល់ជំនួយត្រូវគិតគូរដល់គ្រួសារដែលជួបការលំបាកខ្លាំង និងអ្នកដែលត្រូវការជំនួយជាបន្ទាន់ ដើម្បីធានាថា ការគាំទ្រអាចទៅដល់ប្រជា ពលរដ្ឋគោលដៅបានទាន់ពេលវេលា និងចំគោលដៅ។

ជាមួយគ្នានេះ ការសម្របសម្រួលរវាងអាជ្ញាធរ និងស្ថាប័នពាក់ព័ន្ធត្រូវបានចាត់ទុកថាជាកត្តាសំខាន់ក្នុងការជៀសវាងភាពស្ទួននៃការផ្តល់ជំនួយ និងធានាឱ្យការប្រើប្រាស់ធនធានដែលមានស្រាប់ទទួលបានប្រសិទ្ធភាពខ្ពស់។ ការផ្លាស់ប្តូរព័ត៌មានអំពីស្ថានភាពគ្រួសា ររងគ្រោះ និងការតាមដានតម្រូវការនៅតាមមូលដ្ឋាន ក៏ជាផ្នែកចាំបាច់សម្រាប់ការរៀបចំវិធានការជួយសង្គ្រោះឱ្យបានសមស្រប និងឆ្លើយតបនឹងស្ថានភាពដែលអាចប្រែប្រួលជាបន្តបន្ទាប់។

កិច្ចប្រជុំនេះក៏បានបង្ហាញពីការយកចិត្តទុកដាក់របស់រដ្ឋបាលខេត្តបន្ទាយមាន ជ័យក្នុងការពង្រឹងការងារគ្រប់គ្រង និងឆ្លើយតបគ្រោះមហន្តរាយ ដោយផ្តោតលើការសហការជាប្រព័ន្ធ ការរៀបចំផែនការជាក់លាក់ និងការផ្តល់ជំនួយប្រកបដោយតម្លាភាព និងប្រសិទ្ធភាព។ ការចូលរួមរបស់គ្រប់ភាគីពាក់ព័ន្ធ គឺជាកម្លាំងសំខាន់ក្នុងការជួយសម្រាលទុក្ខលំបាករបស់ប្រជាពលរដ្ឋ និងជំរុញឱ្យការស្តារជីវភាពក្រោយគ្រោះទឹកជំនន់អាចប្រព្រឹត្តទៅបានល្អប្រសើរ។

តាមរយៈកិច្ចប្រជុំនេះ រដ្ឋបាលខេត្តបន្ទាយមានជ័យបន្តបង្ហាញពីការប្តេជ្ញាចិត្តក្នុងការសម្របសម្រួលកិច្ចការជួយសង្គ្រោះ និងគាំទ្រប្រជាពលរដ្ឋដែលរងផលប៉ះពាល់ ដោយប្រកាន់ខ្ជាប់នូវគោលការណ៍ឆ្លើយតបឱ្យបានឆាប់រហ័ស ចំគោលដៅ និងផ្អែកលើតម្រូវការជាក់ស្តែង ដើម្បីរួមចំណែកកាត់បន្ថយផលប៉ះពាល់ និងជួយឱ្យប្រជាពលរដ្ឋអាចវិលត្រឡប់ទៅរកជីវភា ពរស់នៅប្រក្រតីវិញបានឆាប់រហ័ស៕

ដោយ៖ ឈុនសារ៉ាត