AKP ភ្នំពេញ ថ្ងៃទី១៩ ខែតុលា ឆ្នាំ២០២៦

ឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មានបានជំរុញបង្កើនការបណ្តុះបណ្តាលធនធានមនុស្សលើភាសាបរទេស ដើម្បីបង្កើនការផលិតព័ត៌មាន និងផ្សព្វផ្សាយព័ត៌មានពិតពីកម្ពុជា ជាភាសាបរទេស ទៅកាន់ឆាកអន្តរជាតិ ខណៈបច្ចុប្បន្ន ក្រសួងព័ត៌មាន បានផលិតព័ត៌មានជាភាសាអង់គ្លេស បារាំង ចិន និងអារ៉ាប់ រួចទៅហើយ។

ការលើកឡើងរបស់ឯកឧត្ដមរដ្ឋមន្រ្ដីបែបនេះ ក្នុងឱកាសអញ្ជើញជាអធិបតីពិធីបិទវគ្គបណ្តុះបណ្តាល «ភាសាអង់គ្លេស ក្នុងវិស័យព័ត៌មាន និងប្រព័ន្ធផ្សព្វផ្សាយ» នាព្រឹកថ្ងៃទី១៩ ខែតុលា ឆ្នាំ២០២៦ នៅទីស្ដីការក្រសួងព័ត៌មាន។

ឯកឧត្ដម នេត្រ ភក្រ្ដា បានមានប្រសាសន៍ថា វគ្គបណ្ដុះបណ្ដាលភាសាបរទេសជូនមន្ត្រីទទួលបន្ទុកព័ត៌មាន ជាផ្នែកមួយនៃការអនុវត្តផែនការអភិវឌ្ឍធនធានមនុស្សរបស់ក្រសួងព័ត៌មាន ដែលផ្តោតលើការកសាងសមត្ថភាពមន្ត្រីឱ្យមានទាំងជំនាញវិជ្ជាជីវៈ ជំនាញឌីជីថល និងជំនាញភាសាបរទេស ដើម្បីឆ្លើយតបទៅនឹងតម្រូវការការងារក្នុងបរិបទនៃការវិវឌ្ឍយ៉ាងឆាប់រហ័សនៃវិស័យព័ត៌មាន និងប្រព័ន្ធផ្សព្វផ្សាយ។

ឯកឧត្ដមរដ្ឋមន្រ្ដីបានថ្លែងបញ្ជាក់ថា តាមរយៈការយល់ដឹងភាសាបរទេសបានច្បាស់លាស់ មន្ត្រីអាចចូលរួមក្នុងវេទិកាអន្តរជាតិ ផ្លាស់ប្តូរព័ត៌មានជាមួយបណ្តាញសារព័ត៌មានបរទេស និងផ្សព្វផ្សាយព័ត៌មានពិតរបស់កម្ពុជាទៅកាន់ពិភពលោកបានកាន់តែទូលំទូលាយ។ ឯកឧត្ដមរដ្ឋមន្រ្ដីបានបន្ដថា ការពង្រឹងសមត្ថភាពភាសាបរទេស ក៏មានទំនាក់ទំនងយ៉ាងជិតស្និទ្ធជាមួយការទូតព័ត៌មាន ដែលរួមចំណែកពង្រីកកិច្ចសហប្រតិបត្តិការអន្តរជាតិ ផ្លាស់ប្ដូរចំណេះដឹង និងបទពិសោធន៍វិជ្ជាជីវៈ ព្រមទាំងលើកកម្ពស់ការយល់ដឹងអំពីកម្ពុជានៅលើឆាកអន្តរជាតិ។

ជាមួយគ្នានេះ ឯកឧត្ដមរដ្ឋមន្ត្រីបានរម្លឹកពីស្ថានភាពសង្គ្រាមព័ត៌មាននៅលើឆាកអន្តរជាតិ ក្នុងអំឡុងសង្គ្រាមយោធាថៃ ឈ្លានពានមកលើទឹកដីកម្ពុជាទាំងពីរលើក កាលពីឆ្នាំ២០២៥ កន្លងទៅ។ ដូច្នេះ ការយល់ដឹងស៊ីជម្រៅផ្នែកភាសាបរទេស គឺមានសារៈសំខាន់ខ្លាំងណាស់ ដើម្បីឆ្លើយតបទៅព័ត៌មានអន្តរជាតិណាមួយដែលមានចេតនាអវិជ្ជមានចំពោះស្ថានភាពពិតនៅកម្ពុជា។

ឯកឧត្ដមរដ្ឋមន្រ្ដីបានបញ្ជាក់ថា ដើម្បីជំរុញឱ្យការពង្រឹងសមត្ថភាពមន្ត្រីរាជការផ្នែកភាសាបរទេសឱ្យកាន់មានគុណភាពបន្ថែមទៀត ក្រសួងព័ត៌មាន បានធ្វើទំនាក់ទំនងការទូតព័ត៌មាន ជាមួយនឹងបណ្តាប្រទេសផ្សេងៗ ដើម្បីបញ្ជូនមន្ត្រីរាជការនៃក្រសួងព័ត៌មាន ចេញទៅទទួលបានបណ្តុះបណ្តាលនៅតាមបណ្តាប្រទេសជាមិត្តតាមរយៈការផ្តល់អាហារូបករណ៍ជាដើម។ ទន្ទឹមនេះ ប្រទេសជាមិត្ត ក៏បានចូលរួមចំណែកបណ្តុះបណ្តាលធនធានមនុស្សកម្ពុជា លើវិស័យព័ត៌មាន និងសោតទស្សន៍ជាច្រើនផងដែរ។

ឯកឧត្ដម នេត្រ ភក្ត្រា បានបញ្ជាក់ទៀតថា ក្រសួងព័ត៌មាន ដែលជាសេនាធិការរបស់រាជរដ្ឋាភិបាល ទទួលខុសត្រូវផ្នែកការងារទំនាក់ទំនងសាធារណមតិ ឱ្យរាជរដ្ឋាភិបាល គឺបានផ្តោតទៅលើការរៀបចំផែនការបណ្តុះបណ្តាល ការពង្រឹងសមត្ថភាពដល់មន្ត្រី។ ឯកឧត្ដមបានដឹងបន្ថែមថា វិស័យសារព័ត៌មាន គឺមានសារៈសំខាន់ ដើម្បីឆ្លើយតបនឹងការរីកចម្រើនរបស់ប្រទេសជាតិ ហើយប្រសិនបើកម្រិតមន្ត្រីទទួលបន្ទុកផ្នែកព័ត៌មាន និងសោតទស្សន៍ មិនមានគុណភាពក្នុងការផ្តល់ព័ត៌មាន ជូនប្រជាពលរដ្ឋនោះនឹងនាំផលលំបាកនៃការគ្រប់គ្រងសាធារណមតិ។

ក្នុងឱកាសនោះ ឯកឧត្ដមរដ្ឋមន្រ្ដីក្រសួងព័ត៌មានបានគូសបញ្ជាក់ផងដែរថា៖ «បច្ចុប្បន្ននេះ យើងត្រូវបន្ស៉ាំទៅនឹងពិភពលោក ពោលគឺយើងមិនអាចនៅម្នាក់ឯងនោះទេ កាលណាចេះភាសាបរទេសច្រើននឹងធ្វើឱ្យយើងរីកចម្រើន តាមរយៈការសិក្សាជ្រាវ។ ជាមួយនឹងការបង្កើនវគ្គបណ្តុះបណ្តាលភាសាបរទេសនេះ មន្ត្រីព័ត៌មាន ត្រូវបង្កើនការរៀនសូត្រផ្នែកបច្ចេកទេស បច្ចេកវិទ្យា ដើម្បីឱ្យដើមស្របទៅនឹងការរីកចម្រើនផ្នែកបញ្ញាសិប្បនិម្មិត (AI)។» ឯកឧត្ដមរដ្ឋមន្ត្រីបានបន្ថែមថា ការបណ្តុះបណ្ដាលភាសាបរទេសដល់មន្ត្រីក្រសួងព័ត៌មាន គឺជាការវិនិយោគលើធនធានមនុស្ស និងជាការពង្រឹងសក្តានុពលរបស់ស្ថាប័ន ដើម្បីឱ្យ មន្ត្រីមានសមត្ថភាពផលិត និងផ្សព្វផ្សាយព័ត៌មានជាភាសាបរទេសតាមរយៈប្រព័ន្ធផ្សព្វផ្សាយ និងបណ្តាញទំនាក់ទំនងដែលក្រសួងមាន ទៅកាន់សាធារណជននៅក្រៅប្រទេសបានកាន់តែទូលំទូលាយ និងមានប្រសិទ្ធភាព។ ឯកឧត្ដមរដ្ឋមន្រ្ដីបានអះអាងថា៖ «ចំពោះការប្រើប្រាស់ភាសាអង់គ្លេសបានល្អ នឹងជួយឱ្យមន្ដ្រីអាចស្វែងយល់ពីប្រភពព័ត៌មានអន្តរជាតិ បកប្រែ និងរៀបចំខ្លឹមសារព័ត៌មានបានត្រឹមត្រូវ ព្រមទាំងសម្របសម្រួលការទំនាក់ទំនងជាមួយស្ថាប័ន និងដៃគូអន្តរជាតិ។

សមត្ថភាពនេះ អាចរួមចំណែកក្នុងការផ្សព្វផ្សាយព័ត៌មានដែលមានប្រភពច្បាស់លាស់ អំពីស្ថានភាព សក្ដានុពល ការអភិវឌ្ឍ និងសមិទ្ធផលនានារបស់កម្ពុជា ទៅកាន់ពិភពលោក»៕

ដោយ៖ រិទ្ធី, រូបថត៖ យឹម សុវឌ្ឍនា