AKP ភ្នំពេញ ថ្ងៃទី១៩ ខែតុលា ឆ្នាំ២០២៦--ឯកឧត្តម នេត្រ ភក្ត្រា ​រដ្ឋមន្ត្រីក្រសួង ព័ត៌មាន បានជំរុញបង្កើនការបណ្តុះ បណ្តាលធនធានមនុស្សលើភាសា បរទេស ដើម្បីបង្កើនការផលិតព័ត៌មាន និងផ្សព្វផ្សាយព័ត៌មានពិតពីកម្ពុជា ជាភាសាបរទេស ទៅកាន់ឆាកអន្តរជាតិ។ បច្ចុប្បន្ន ក្រសួងព័ត៌មាន​ បានផលិតព័ត៌មានជាភាសាអង់គ្លេស បារាំង ចិន និងអារ៉ាប់ រួចទៅហើយ។

ខណៈវគ្គបណ្ដុះបណ្ដាលភាសាបរទេសជូនមន្ត្រីទទួលបន្ទុកព័ត៌មាន ជាផ្នែកមួយនៃការអនុវត្តផែនការអភិវឌ្ឍធនធានមនុស្សរបស់ក្រសួងព័ត៌មាន ដែលផ្តោតលើការកសាងសមត្ថភាពមន្ត្រី​ឱ្យមានទាំងជំនាញវិជ្ជាជីវៈ ជំនាញឌីជីថល និងជំនាញភាសាបរទេស ដើម្បីឆ្លើយតបទៅនឹងតម្រូវការការងារក្នុងបរិបទនៃការវិវឌ្ឍយ៉ាងឆាប់រហ័សនៃវិស័យព័ត៌មាន និងប្រព័ន្ធផ្សព្វផ្សាយ។

ការជំរុញបែបនេះរបស់រដ្ឋមន្ត្រីក្រសួង ព័ត៌មាន បានធ្វើឡើងនៅព្រឹកថ្ងៃទី១៩ ខែតុលា ឆ្នាំ២០២៦នេះ ក្នុងឱកាសអញ្ជើញជាអធិបតីក្នុងពិធីបិទវគ្គបណ្តុះបណ្តាល «ភាសាអង់គ្លេស ក្នុងវិស័យព័ត៌មាន និងប្រព័ន្ធផ្សព្វផ្សាយ» ជូនដល់មន្ត្រីរាជការនៃក្រសួងព័ត៌មាន។

ឯកឧត្តមរដ្ឋមន្ត្រី បានលើកឡើងថា តាមរយៈការយល់ដឹងភាសាបរទេសបានច្បាស់លាស់ មន្ត្រីអាចចូលរួមក្នុងវេទិកាអន្តរជាតិ ផ្លាស់ប្តូរព័ត៌មានជាមួយបណ្តា ញសារព័ត៌មានបរទេស និងផ្សព្វផ្សាយព័ត៌មានពិតរបស់កម្ពុជាទៅកាន់ពិភព លោកបានកាន់តែទូលំទូលាយ។ ការពង្រឹងសមត្ថភាពភាសាបរទេសក៏មានទំនាក់ទំនងយ៉ាងជិតស្និទ្ធជាមួយការទូតព័ត៌មាន ដែលរួមចំណែកពង្រីកកិច្ចសហ ប្រតិបត្តិការអន្តរជាតិ ផ្លាស់ប្ដូរចំណេះ ដឹង និងបទពិសោធន៍វិជ្ជាជីវៈ ព្រមទាំងលើកកម្ពស់ការយល់ដឹងអំពីកម្ពុជានៅលើឆាកអន្តរជាតិ។

ត្រង់ចំណុចនេះ​ឯកឧត្តមរដ្ឋមន្ត្រី ក៏បានរម្លឹកពីស្ថានភាពសង្គ្រាមព័ត៌មាន​នៅលើឆាកអន្តរជាតិ ក្នុងអំលុងសង្គ្រាម យោធាថៃ ឈ្លានពានមកលើទឹកដីកម្ពុជា​ទាំង២លើក កាលពីឆ្នាំ២០២៥ កន្លង ទៅ។​ ដូច្នេះ ការយល់ដឹងស៊ីជម្រៅផ្នែកភាសាបរទេស គឺមានសារៈសំខាន់ខ្លាំងណាស់ ដើម្បីឆ្លើយតបទៅព័ត៌មានអន្តរជាតិណាមួយដែលមានចេតនាអវិជ្ជមានចំពោះស្ថានភាពពិតនៅកម្ពុជា។​

ដើម្បីជំរុញឱ្យការពង្រឹងសមត្ថភាពមន្ត្រីរាជការផ្នែកភាសាបរទេសឱ្យកាន់មាន គុណភាពបន្ថែមទៀត ក្រសួងព័ត៌មាន បានធ្វើទំនាក់ទំនងការទូតព័ត៌មាន ជាមួយនឹងបណ្តាប្រទេសផ្សេងៗ ដើម្បីបញ្ជូនមន្ត្រីរាជការនៃក្រសួងព័ត៌មាន ចេញទៅទទួលបានបណ្តុះបណ្តាលនៅតាមបណ្តាប្រទេសជាមិត្តតាមរយៈការផ្តល់អាហារូបករណ៍ជាដើម។ លើសពីនេះមិត្តក៏បានចូលរួមចំណែកបណ្តុះ បណ្តាលធនធានមនុស្សកម្ពុជា លើវិស័យព័ត៌មាន និងសោតទស្សន៍ជាច្រើនផងដែរ។

ឯកឧត្តមរដ្ឋមន្ត្រីបានបន្ថែមថា ក្រសួងព័ត៌មាន ដែលជាសេនាធិការរបស់រាជរដ្ឋាភិបាល ទទួលខុសត្រូវផ្នែកការងារទំនាក់ទំនងសាធារណមតិ ឱ្យរាជរដ្ឋាភិបាល គឺបានផ្តោតទៅលើការរៀបចំផែនការបណ្តុះបណ្តាល ការពង្រឹងសមត្ថភាពដល់មន្ត្រី។ ពីព្រោះថាវិស័យសារព័ត៌មាន គឺមានសារៈសំខាន់ ដើម្បីឆ្លើយតបនឹងការរីកចម្រើនរបស់ប្រទេសជាតិ ដូច្នេះ ប្រសិនបើកម្រិតមន្ត្រីទទួលបន្ទុកផ្នែកព័ត៌មាន និងសោតទស្ស ន៍ មិនមានគុណភាពក្នុងការផ្តល់ព័ត៌មា ន ជូនប្រជាពលរដ្ឋនោះនឹងនាំផលលំបាកនៃការគ្រប់គ្រងសាធារណមតិ។

ឯកឧត្តមរដ្ឋមន្ត្រីបានគូសបញ្ជាក់ថា បច្ចុប្បន្ននេះ យើងត្រូវបន្ស៉ាំទៅនឹងពិភពលោក ពោលគឺយើងមិនអាចនៅម្នាក់ឯងនោះទេ កាលណាចេះភាសា បរទេសច្រើននឹងធ្វើឱ្យយើងរីកចម្រើន​ តាមរយៈការសិក្សាជ្រាវ។ ជាមួយនឹងការបង្កើនវគ្គបណ្តុះបណ្តាលភាសាបរទេសនេះ មន្ត្រីព័ត៌មាន ត្រូវបង្កើនការរៀន សូត្រផ្នែកបច្ចេកទេស បច្ចេកវិទ្យា ដើម្បីឱ្យដើមស្របទៅនឹងការរីកចម្រើនផ្នែកបញ្ញាសិប្បនិម្មិត (AI)។

រដ្ឋមន្ត្រី នេត្រ ភក្ត្រា​ បានបញ្ជាក់ថា ការបណ្តុះបណ្ដាលភាសាបរទេសដល់មន្ត្រីក្រសួងព័ត៌មាន គឺជាការវិនិយោគលើធនធានមនុស្ស និងជាការពង្រឹងសក្តានុពលរបស់ស្ថាប័ន ដើម្បីឱ្យមន្ត្រីមានសមត្ថភាពផលិត និងផ្សព្វផ្សាយព័ត៌មានជាភាសាបរទេសតាមរយៈប្រព័ន្ធផ្សព្វផ្សាយ និងបណ្តាញទំនាក់ទំនងដែលក្រសួងមាន ទៅកាន់សាធារណជននៅក្រៅប្រទេសបានកាន់តែទូលំទូលាយ និងមានប្រសិទ្ធភាព។ ចំពោះការប្រើប្រាស់ភាសាអង់គ្លេសបានល្អ នឹងជួយឱ្យមន្ដ្រីអាចស្វែងយល់ពីប្រភពព័ត៌មានអន្តរជាតិ បកប្រែ និងរៀបចំខ្លឹមសារព័ត៌មានបានត្រឹមត្រូវ ព្រមទាំងសម្របសម្រួលការទំនាក់ទំនងជាមួយស្ថាប័ន និងដៃគូអន្តរជាតិ។ ជាពិសេសសមត្ថភាពនេះអាចរួមចំណែកក្នុងការផ្សព្វផ្សាយព័ត៌មានដែលមានប្រភពច្បាស់លាស់ អំពីស្ថានភាព សក្ដានុពល ការអភិវឌ្ឍ និងសមិទ្ធផលនានារបស់កម្ពុជាទៅកាន់ពិភពលោក។

រាជរដ្ឋាភិបាលកម្ពុជា នីតិកាលទី៧ ដែលដឹកនាំដោយសម្តេចបវរធិបតី ហ៊ុន ម៉ាណែត ជានាយករដ្ឋមន្ត្រី បន្តវេនពីសម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា បានយកចិត្តទុកដាក់ខ្ពស់បំផុតទៅលើការងារអភិវឌ្ឍន៍មូលធនមនុស្ស។ ជាក់ស្តែងនៅដើមអាណត្តិទី៧ ប្រជាពលរដ្ឋបានសាទរ និងផ្តល់ទំនុកចិត្តយ៉ាងខ្លាំងមកលើរាជរដ្ឋា ភិបាល ពាក់ព័ន្ធនឹងការពង្រឹងធនធានមនុស្សបន្តវេន ពីព្រោះកម្ពុជា បានកំណត់ចក្ខុវិស័យ ឆ្នាំ២០៥០ ទៅជាប្រទេសដែលមានចំណូលខ្ពស់។ ដោយឡែកនៅក្នុងវិស័យព័ត៌មាន និងសោតទស្សន៍ក៏ត្រូវចាំបាច់រុញ និងរៀបចំផែនការអភិឌ្ឍមូលធនមនុស្សឱ្យដើរស្របតាមបន្ទាត់នយោបាយរបស់រាជរដ្ឋាភិបាល។

គួរជម្រាបថា សម្តេចមហាបវរធិបតី ហ៊ុន ម៉ាណែត បានធ្លាប់មានប្រសាសន៍ថា «កម្ពុជាមិនអាចក្លាយជាប្រទេសអ្នកមានបានទេ ប្រសិនបើធនធានមនុស្ស ពុំមានចំណេះដឹង និងសមត្ថភាព ជំនាញ ពុំអាចប្រកួតប្រជែងនៅលើឆាក អន្តរ ជាតិ ពុំមានសុខភាពល្អគ្រប់គ្រាន់ និងពុំមានសមត្ថភាព ចូលរួមកសាងមូលដ្ឋាននៃសង្គម សេដ្ឋកិច្ច និងឧស្សាហកម្ម ដែលផ្អែកលើចំណេះដឹង។ ដូច្នេះ មិនមែនជាការចៃដន្យឡើយ ដែលយុទ្ធសាស្ត្របញ្ចកោណ-ដំណាក់កាលទី១ បានកំណត់យកអាទិភាព គន្លឹះ៥ គឺមនុស្ស ផ្លូវ ទឹក ភ្លើង និងបច្ចេកវិទ្យា ពោលគឺយកកត្តាមនុស្សជាអាទិភាពខ្ពស់បំផុត»៕

ដោយ៖ ប៊ុនរិទ្ធ  រូបថត៖ យឹម សុវឌ្ឍនា