AKP ភ្នំពេញ ថ្ងៃទី១៩ ខែតុលា ឆ្នាំ២០២៦ -- «កម្មវិធីពន្លឿនសកម្មភាពទប់ស្កាត់សារធាតុបំពុលកម្រិតខ្ពស់នៅកម្ពុជា» (Super Pollutant Accelerator Program) ត្រូវបានប្រកាសដាក់ឱ្យអនុវត្តជាផ្លូវការដើម្បីដោះស្រាយបញ្ហាការបំពុលខ្យល់ នាថ្ងៃទី១៩ ខែតុលា ឆ្នាំ២០២៦ នេះ។

លោកស្រី Catalina Etcheverry អ្នកគ្រប់គ្រងកម្មវិធីនៃសម្ព័ន្ធអាកាសធាតុ និងខ្យល់ស្អាត (CCAC) បានថ្លែងបទអន្តរាគមន៍ ដោយសង្កត់ធ្ងន់ទៅលើសារៈសំខាន់នៃកម្មវិធី ក្នុងការដោះស្រាយបញ្ហាការបំពុលខ្យល់ និងការបំពុលអាកាសធាតុនៅកម្ពុជា ជាពិសេស ក្នុងការទប់ស្កាត់ការកើនឡើងនៃសារធាតុពុលក្នុងខ្យល់ ដើម្បីជួយការពារសុខភាពសាធារណៈ និងកាត់បន្ថយផលប៉ះពាល់នៃការប្រែប្រួលអាកាសធាតុ។

លោកស្រី Catalina Etcheverry បានវាយតម្លៃខ្ពស់ចំពោះការប្តេជ្ញាចិត្តដ៏មុតស្រួចរបស់រាជរដ្ឋាភិបាលកម្ពុជា ក្នុងនោះក្រសួងបរិស្ថានបានសហការយ៉ាងជិតស្និទ្ធជាមួយ CCAC ក្នុងការដាក់ចេញនូវផែនការយុទ្ធសាស្ត្រខ្យល់ស្អាត (Clean Air Plan) និងវិធានការប្រយុទ្ធប្រឆាំងនឹងការបំពុលខ្យល់សាធារណៈ។
ជុំវិញបញ្ហានេះ ឯកឧត្តមបណ្ឌិត អ៊ាង សុផល្លែត បានមានប្រសាសន៍ថា កម្មវិធីពន្លឿនការកាត់បន្ថយសារធាតុបំពុលកម្រិតខ្ពស់នេះ បានរៀបចំឡើងដោយមានលក្ខណៈគ្រប់ជ្រុងជ្រោយ ឆ្លើយតបទៅនឹងអាទិភាពជាតិ និងស្របតាម «យុទ្ធសាស្ត្រចក្រាវិស័យបរិស្ថាន ២០២៣-២០២៨»។

ឯកឧត្តមបានថ្លែងដែរថា កម្ពុជាបានបង្ហាញពីជំហរយ៉ាងសកម្ម និងការប្តេជ្ញាចិត្តខ្ពស់ក្នុងការដោះស្រាយបញ្ហាការប្រែប្រួលអាកាសធាតុ ការកែលម្អគុណភាពខ្យល់ និងការកាត់បន្ថយសារធាតុបំពុលខ្យល់កម្រិតខ្ពស់នៅកម្ពុជា ដូចជា ឧស្ម័នមេតាន កាបូនខ្មៅ និងសារធាតុហាយដ្រូភ្លុយអរ៉ូកាបូន HFCs ដើម្បីគាំទ្រធ្វើឱ្យប្រសើរឡើងនូវគុណភាពខ្យល់ ទប់ស្កាត់ការប្រែប្រួលអាកាសធាតុ និងការអភិវឌ្ឍប្រកបដោយចីរភាពនៅកម្ពុជា។ ឯកឧត្តមរដ្ឋមន្រ្តី បានថ្លែងបន្ថែមថា កម្មវិធីដែលសម្ពោធនាពេលនេះ ជាសមិទ្ធផលថ្មីមួយទៀតដែលកម្ពុជាត្រូវបានទទួលស្គាល់ជាប្រទេសចូលរួមចំណែកសំខាន់ក្នុងការដោះស្រាយបញ្ហាបរិស្ថានសកល និងទទួលបានការគាំទ្រលើឆាកអន្តរជាតិ ការប្តេជ្ញាចិត្តយ៉ាងមុតមាំរបស់កម្ពុជាក្នុងការកាត់បន្ថយការបំភាយនៃការបំពុលកម្រិតខ្ពស់ និងពង្រឹងមូលដ្ឋានស្ថាប័ន និងបច្ចេកទេសដែលចាំបាច់ ដើម្បីសម្រេចបាននូវមហិច្ឆតាពន្លឿនការកាត់បន្ថយសារធាតុបំពុលកម្រិតខ្ពស់នៅកម្ពុជា។

គួរបញ្ជាក់ថា កម្មវិធីពន្លឿនសកម្មភាពទប់ស្កាត់សារធាតុបំពុលកម្រិតខ្ពស់នៅកម្ពុជា គឺលទ្ធផលដ៏ត្រចះត្រចង់ កើតចេញពីកិច្ចខិតខំប្រឹងប្រែងរបស់កម្ពុជា និងការគាំទ្រពីសហគមន៍អន្តរជាតិ ដែលឈានដល់ការអនុម័តជាផ្លូវការនៅក្នុងសន្និសីទកំពូលលើកទី៣០ (COP30) ស្តីពីការប្រែប្រួលអាកាសធាតុ នៅទីក្រុង Belém ប្រទេសប្រេស៊ីល ឆ្នាំ២០២៥។

ប្រទេសកម្ពុជាក្លាយជាប្រទេសមួយក្នុងចំណោមប្រទេសដំបូងគេ ដែលទទួលបានការគាំទ្រថវិកាប្រមាណ ៤លានដុល្លារអាម៉េរិកពីសម្ព័ន្ធ CCAC សម្រាប់អនុវត្តកម្មវិធីពន្លឿននេះក្នុងរយៈពេល ៣ឆ្នាំ (ឆ្នាំ២០២៦-២០២៨) ហើយពេលនេះ កម្ពុជានឹងបន្តពង្រឹងការកសាងសមត្ថភាពមន្ត្រីលើការគ្រប់គ្រង ស្តង់ដារបំភាយឧស្ម័នយានយន្ត ការបំភាយឧស្ម័នក្នុងវិស័យថាមពល កសិកម្ម និងការគ្រប់គ្រងសំណល់ ដើម្បីធានាបាននូវការអភិវឌ្ឍប្រកបដោយចីរភាព៕

ដោយ៖ មករា