AKPកំពង់ធំថ្ងៃទី១៨ខែតុលា ឆ្នាំ២០២៦--

លោក សាយ គឹមឡម អភិបាលស្រុកស្ទោងនិងសហការីកាលពីថ្ងៃទី១៧ខែ តុលាឆ្នាំ២០២៦បានអញ្ជើញចុះត្រួតពិនិត្យការិយាល័យចុះឈ្មោះបោះឆ្នោតនិងសួរសុខទុក្ខបងប្អូនកម្មករ កម្មការិនីចំការកៅស៊ូ C.R.C.K ស្ថិតនៅឃុំពពក ស្រុកស្ទោង ខេត្តកំពង់ធំ ដើម្បីស្វែងយល់ពីស្ថានភាពជាក់ស្តែង និងជំរុញការចូលរួមរបស់ប្រជាពលរដ្ឋក្នុងការចុះឈ្មោះបោះឆ្នោត។

ក្នុងឱកាសនោះលោកអភិបាលស្រុកបានពិនិត្យមើលសកម្មភាព និងដំណើរ ការនៅការិយាល័យចុះឈ្មោះបោះឆ្នោត ព្រមទាំងយកចិត្តទុកដាក់លើការផ្សព្វ ផ្សាយព័ត៌មានពាក់ព័ន្ធនឹងលក្ខខណ្ឌនិងនីតិវិធីនៃការចុះឈ្មោះ ដើម្បីឱ្យប្រជាព លរដ្ឋមានការយល់ដឹងកាន់តែច្បាស់និងអាចអនុវត្តតាមនីតិវិធីបានត្រឹមត្រូវ។

ទន្ទឹមនឹងនេះលោកអភិបាលស្រុកបានជួបសំណេះសំណាលសួរសុខទុក្ខបងប្អូនកម្មករ កម្មការិនីដែលកំពុងបំពេញការងារនៅចំការកៅស៊ូ CRCK ដោយបានបង្ហាញការយកចិត្តទុកដាក់ចំពោះសុខទុក្ខនិងជីវភាពរស់នៅរបស់ពួកគាត់ ព្រមទាំងលើកទឹកចិត្តឱ្យបន្តបំពេញការងារដោយការទទួលខុសត្រូវ និងបានការជំរុញឱ្យកម្មករ កម្មការិនីដែលមានអាយុនិងគ្រប់លក្ខខណ្ឌតាមច្បាប់កំណត់អញ្ជើញទៅចុះឈ្មោះបោះឆ្នោតឱ្យបានគ្រប់ៗគ្នា ដោយត្រូវពិនិត្យឯកសារចាំបាច់និងអនុវត្តតាមនីតិវិធីរបស់មន្ត្រីមានសមត្ថកិច្ច ដើម្បីធានាថាការចុះឈ្មោះប្រព្រឹត្តទៅបានត្រឹមត្រូវនិងស្របតាមបទប្បញ្ញត្តិជាធរមាន។

សកម្មភាពនេះបង្ហាញពីការយកចិត្តទុកដាក់របស់រដ្ឋបាលស្រុកស្ទោង ក្នុងការចុះជួបប្រជាពលរដ្ឋនៅមូលដ្ឋាននិងជំរុញការផ្សព្វផ្សាយការយល់ដឹងអំពីសិទ្ធិនិងកាតព្វកិច្ចរបស់ពលរដ្ឋ។ការចុះឈ្មោះបោះឆ្នោតរបស់អ្នកដែលគ្រប់លក្ខខណ្ឌ គឺជាជំហានដ៏សំខាន់ក្នុងការត្រៀមខ្លួនប្រើប្រាស់សិទ្ធិបោះឆ្នោត ស្របតាមច្បាប់កំណត់និងចូលរួមក្នុងដំណើរការប្រជាធិបតេយ្យនៅកម្ពុជា៕

ដោយ៖ ស៊ុម វណ្ណា