AKPកំពង់ធំថ្ងៃទី១៧ ខែតុលា ឆ្នាំ២០២៦--

ឯកឧត្តមឧត្តមសេនីយ៍ឯក តាន់ សំណាង អគ្គស្នងការរងនគរបាលជាតិបានណែនាំនិងដាក់ចេញទិសដៅការងារ១២ចំណុចដល់មន្ត្រីនគរបាលជាតិនៃស្នងការដ្ឋាននគរបាលខេត្តកំពង់ធំយកទៅអនុវត្តឱ្យទទួលបានប្រសិទ្ធភាពខ្ពស់ក្នុងឱកាសអញ្ជើញជាអធិបតីភាពក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរសក្តិ ជូនមន្ត្រីនគរបាលជាតិនៃស្នងការដ្ឋាននគរបាលខេត្តកំពង់ធំកាលពីថ្ងៃទី១៦ខែតុលាឆ្នាំ២០២៦។

ឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំបានរាយការណ៍អំពីស្ថានភាពភូមិសាស្ត្រ រចនាសម្ព័ន្ធរបស់កងកម្លាំង ការងារគ្រប់គ្រងដឹកនាំបញ្ជា កិច្ចប្រតិបត្តិការរក្សាសន្តិសុខសណ្តាប់ធ្នាប់សុវត្ថិភាពសង្គមព្រមទាំងការងារកសាងអង្គភាព សម្រេចបាននូវសមិទ្ធិផលថ្មីៗជាបន្តបន្តាប់។

ក្នុងឱកាសនោះឯកឧត្តម ឧត្តមសេនីយ៍ឯក តាន់ សំណាង អគ្គស្នងការរងបានពាំនាំនូវប្រសាសន៍ ផ្តាំផ្ញើសាកសួរសុខទុក្ខពីសំណាក់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិជូនចំពោះកងកម្លាំងនគរបាលជាតិនៃស្នងការដ្ឋាននគរបាលខេត្តកំពង់ធំនិងបានគាំទ្រ វាយតម្លៃខ្ពស់ចំពោះការខិតខំប្រឹងប្រែងលះបង់កម្លាំងកាយចិត្តចំណាយធនធានសម្ភារៈថវិកាផ្ទាល់ខ្លួន ចូលរួមចំណែក ក្នុងកិច្ចប្រតិបត្តិការ រក្សាសន្តិសុខ សុវត្ថិភាព សណ្ដាប់ធ្នាប់សាធារណៈជូនសង្គមជាតិនិងប្រជាពលរដ្ឋ ។

ឯកឧត្តមឧត្តមសេនីយ៍ឯកអគ្គស្នងការរងបានថ្លែងថាស្នាដៃ ពលិកម្មខាងលើនេះហើយ ទើបបងប្អូនកងកម្លាំងយើង ទទួលបានការលើកទឹកចិត្ត តាមរយៈការផ្ទេរភារកិច្ចតែងតាំងមុខតំណែងនិងបំពាក់ឋានន្តរសក្តិ ជូនបងប្អូន នាឱកាសនេះ។

ដើម្បីធានានិរន្តរភាពការងារ ឯកឧត្តម ឧត្តមសេនីយ៍ឯកតាន់ សំណាង អគ្គស្នងការរងបានមានប្រសាសន៍ ណែនាំផ្ដាំផ្ញើនិងដាក់ចេញនូវទិសដៅការងារ១២ចំណុចដល់លោកលោកស្រីស្នងការរងផែនជំនាញ លោកអធិការនគរបាលក្រុង-ស្រុក និងលោកនាយប៉ុស្តិ៍នគរបាលរដ្ឋបាលទាំង៨១ឃុំ-សង្កាត់ យកទៅអនុវត្តឱ្យទទួលបានប្រសិទ្ធភាពខ្ពស់៖ទី១.ការងារជំរុញលើកទឹកចិត្ត ដល់មន្ត្រីដែលសកម្ម ក្នុងការអនុវត្តតួនាទីភារកិច្ច ត្រូវគិតគូរឱ្យបានច្បាស់លាស់ ពិនិត្យវាយតំលៃ លើកលទ្ធផល ស្នាដៃ តាមឋានានុក្រម ដោយសុក្រឹត្យភាព តម្លាភាព សុច្ចរិតភាព និងត្រូវការអនុវត្តវិន័យចំពោះមន្ត្រីអសកម្ម ក្នុងការបំពេញភារកិច្ច តាមលក្ខន្តិកៈដោយឡែកនៃក្របខណ្ឌមន្ត្រីនគរបាលជាតិ ។

ទី២.ចំពោះការងារជំរឿនមន្ត្រីនគរបាលជាតិ នាពេលខាងមុខ គឺដើម្បីរកស្វែងរកឱ្យឃើញ មន្ត្រីដែលមានវត្តមានជាក់ស្តែងកំពុងបម្រើការងារនៅតាមអង្គភាពនីមួយៗ ព្រមទាំងត្រៀមលក្ខណៈសម្បត្តិគ្រប់ជ្រុងជ្រោយ សម្រាប់មន្ត្រីនគរបាលជាតិបន្តវេន។ទី៣.បន្តយកចិត្តទុកដាក់អនុវត្តសេចក្តីជូនដំណឹងលេខ២២៣សរណ ស្ដីពីការគ្រប់គ្រងមន្ត្រីនគរបាលជាតិ ចំណុះអគ្គស្នងការដ្ឋាននគរបាលជាតិ។ទី៤.ការងារអតីតយុទ្ធជន រៀបចំចងក្រងបញ្ជីឈ្មោះ មន្ត្រីនគរបាលជាតិ ដែលចូលនិវត្តន៍ ធ្លាប់បម្រើការងារនៅស្នងការដ្ឋាននគរបាលខេត្តកំពង់ធំ ត្រូវរៀបចំកម្មវិធីចុះជួបសំណេះសំណាលសាកសួរសុខទុក្ខ តាមពេលវេលាណាមួយដែលបានកំណត់។ទី៥.បន្តយកចិត្តទុកដាក់ អនុវត្តនូវគោលការណ៍ របស់ឯកឧត្តម អភិសន្ដិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ពាក់ព័ន្ធនឹងការប្រើប្រាស់គ្រឿងស្រវឹងហើយបើកបរនិងការប្រយុទ្ធប្រឆាំងបទល្មើសគ្រឿងញៀន។ទី៦.បន្តជំរុញការផ្សព្វផ្សាគោលនយោបាយ"ភូមិ-ឃុំ-សង្កាត់មានសុវត្ថិភាព" ឱ្យសកម្មស៊ីជម្រៅ ដល់មហាជនគ្រប់ស្រទាប់វណ្ណៈសំដៅលើកកម្ពស់ ការយល់ដឹងនិងចូលរួមអនុវត្តឱ្យមានលទ្ធផលល្អប្រសើរ ព្រមទាំងទទួលយកយោបល់របស់ប្រជាពលរដ្ឋនូវបញ្ហាប្រឈម ក្ដីកង្វល់ធ្វើការដោះស្រាយឱ្យបានទាន់ពេលវេលា។ទី៧.ត្រូវយកចិត្តទុកដាក់អនុវត្តយ៉ាងម៉ើងម៉ាត់បទបញ្ជារបស់រាជរដ្ឋាភិបាល នៃព្រះរាជាណាចក្រកម្ពុជា នូវអនុក្រឹត្យលេខ០៣ ស្តីពីការគ្រប់គ្រងសន្តិសុខតាមទីតាំងរស់នៅប្រមូលផ្តុំ ដើម្បីបង្ការ ទប់ស្កាត់ និងបង្ក្រាបបទល្មើសគ្រប់ប្រភេទ ជាពិសេសបទល្មើសតាមប្រព័ន្ធបច្ចេកវិទ្យា(Online Scam)និងល្បែងស៊ីសងខុសច្បាប់។

ទី៨.ត្រូវរៀបចំផែនការត្រួតពិនិត្យឆែកឆេរអាវុធគ្រឿងផ្ទុះតាមបែបចំហនិងចុះធ្វើរដ្ឋបាល ជាពិសេសត្រូវពង្រឹងការគ្រប់គ្រង ការប្រើប្រាស់អាវុធ ព្រមទាំងធ្វើបច្ចុប្បន្នភាពអាវុធជាតិផ្ទុះរៀបចំថែរក្សាអាវុធ យុទ្ធោបករណ៍ ឱ្យបានត្រឹមត្រូវតាមច្បាប់ជាធរមាន។ទី៩.ត្រូវបន្តពង្រឹងការគ្រប់គ្រងកម្លាំងឱ្យបានហ្មត់ចត់ តាមរយៈការគ្រប់គ្រងបញ្ជីវត្តមាន ឬការប្រជុំជួរ ការត្រួតពិនិត្យការគ្រងឯកសណ្ឋាន និងពាក់សញ្ញាសម្គាល់នគរបាលជាតិឱ្យបានត្រឹមត្រូវតាមការកំណត់ក្នុងបទវិន័យនគរបាលជាតិ និងបទប្បញ្ញត្តិពាក់ព័ន្ធ ពង្រឹងក្រមសីលធម៌ វិជ្ជាជីវៈ អប្បកិរិយា សេចក្តីថ្លៃថ្នូររបស់កងកម្លាំងនិងការសម្ងាត់របស់អង្គភាព។ទី១០.ពង្រឹងការងារប៉ុស្ដិ៍នគរបាលរដ្ឋបាល និងការងារគ្រប់គ្រងអធិការដ្ឋាននគរបាលក្រុង-ស្រុក ចុះត្រួតពិនិត្យស្ថានភាពការងារជាក់ស្ដែង របស់ប៉ុស្តិ៍នគរបាលរដ្ឋបាល និងអធិការដ្ឋាននគរបាល ព្រមទាំងខិតខំគៀងគរសប្បុរសជន ដើម្បីចូលរួមកសាងអភិវឌ្ឍន៍ អង្គភាពឱ្យទទួលបានភាពរីកចម្រើន។ទី១១.បន្តពង្រឹងការងារកម្លាំងល្បាត ត្រួតពិនិត្យភូមិសាស្ត្រ ដើម្បីរក្សាបាននូវសន្តិសុខ សុវត្ថិភាព សណ្តាប់ធ្នាប់ក្នុងមូលដ្ឋានជាពិសេសក្នុងអំឡុងការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៦និហទី១២.ពង្រឹងស្មារតី មនសិការ ហើយផ្សាភ្ជាប់កិច្ចសហការជាមួយមន្ទីរ អង្គភាព ដើម្បីការពារបូរណភាពទឹកដី និងអធិបតេយ្យភាពជាតិយើង ។

សូមបញ្ជាក់ថាពិធីប្រកាសផ្ទេរភារកិច្ច និងតែងតាំងមុខតំណែង ជូនមន្ត្រីនគរបាលជាតិនៃស្នងការដ្ឋាននគរបាលខេត្តកំពង់ធំ រួមមាន៖តម្លើងឋានន្តរស័ក្តិ ថ្នាក់វរសេនីយ៍ឯកចំនួន២ រូបនិងតែងតាំងមុខតំណែងចំនួន៨រូប(ថ្នាក់ស្នងការរងចំនួន២រូប និងនាយការិយាល័យចំនួន០៦រូប)៕

ដោយ៖ ស៊ុម វណ្ណា