AKP កំពង់ធំ ថ្ងៃទី១៧ ខែតុលា ឆ្នាំ២០២៦--

រដ្ឋបាលខេត្តកំពង់ធំសហការជាមួយមន្ទីរអប់រំយុវជននិងកីឡាខេត្តរៀបចំវគ្គផ្ដាច់ព្រ័ត្រកម្មវិធីជជែកដេញដោលយុវជនខេត្តកំពង់ធំរដូវកាលទី៣ឆ្នាំ២០២៦ក្រោមប្រធានបទ"យុវជនជាកម្លាំងចម្បងក្នុងការលុបបំបាត់ព័ត៌មានក្លែងក្លាយនៅកម្ពុជា"ដែលមានបេក្ខជនមកពីវិទ្យាល័យស្ទឹងសែនជជែកដេញដោលជាមួយបេក្ខជនវិទ្យាល័យជាស៊ីមកំពង់ថ្មកាលពីថ្ងៃទី១៦ខែតុលា ឆ្នាំ២០២៦នៅសាលប្រជុំប្រាសាទសំបូរព្រៃគុកនៃរដ្ឋបាលខេត្តកំពង់ធំក្រោមអធិបតីភាពលោកហាន កុសលអភិបាលរងខេត្តកំពង់ធំ។

លោក អ៉ឹម វ៉ាន់នី អនុប្រធានមន្ទីរអប់រំ យុវជន និងកីឡាខេត្តកំពង់ធំ ទទួលបន្ទុកផ្នែកការងារយុវជនបានលើកឡើងពីគោលបំណង÷ បណ្តុះបណ្តាលយុវជនឱ្យក្លាយជាពលរដ្ឋសកល ឱ្យចេះប្រើប្រាស់នូវវប្បធម៌សន្ទនាតាមរយៈការជជែកដេញ ដោល បណ្តុះសមត្ថភាពយុវជនក្នុងការដោះស្រាយបញ្ហាផ្សេងៗដែលពួកគេជួបប្រទះតាមរយៈការសន្ទនា កសាងសមត្ថភាពយុវជនឱ្យមានភាពក្លាហាន ចេះប្រើប្រាស់សិទ្ធិស្របច្បាប់ប្រកបដោយភាពឈ្លាសវៃក្នុងការបញ្ចេញមតិដើម្បីទទួលបាននូវផ្លែផ្កាជាវិជ្ជមានជូនសង្គម។ពង្រឹងជំនាញនៃការត្រិះរិះពិចារណា ការសិក្សាស្រាវជ្រាវ ការចែករំលែកគំនិត ការទាក់ទាញការគាំទ្រ ជំនាញក្នុងការនិយាយសាធារណៈជាដើម។ ផ្តល់ឱកាសឱ្យយុវជនពិចារណា បញ្ចេញគំនិតយោបល់ បង្ហាញសមត្ថភាពនិងទេពកោសល្យជាសាធារណៈក្នុងការជជែកដេញដោលក្នុងសមរភូមិគំនិតនៃសង្គមពុទ្ធិដើម្បីស្វែងរកនូវសុខដុមនីយកម្មសម្រាប់ទាំងអស់គ្នា។ បង្កើនបណ្តាញទំនាក់ទំនង ភាពស្និតស្នាលល្អរវាងយុវជននិងយុវជន ដើម្បី ផ្លាស់ ប្តូរបទពិសោធន៍គ្នាក្នុងតម្លៃជាមិត្តភាព។ ពង្រីកធនធានយុវជនដើម្បីអាចអភិវឌ្ឍខ្លួនក្លាយជាមូលធនមនុស្សសម្រាប់ជាតិ។

លោកហាន កុសលបានលើកឡើងថាការងារក្រុមប្រឹក្សាកម្ពុជានិងក្រុមប្រឹក្សាយុវជនកម្ពុជាគឺជាការបង្ហាត់បង្ហាញពីការងារគ្រប់គ្រងតាមបែបប្រព័ន្ធស្វ័យគ្រប់គ្រង ដែលគណៈកម្មការបានរៀបចំបែងចែកជាក្រុមនិងប្រគល់កិច្ចការទទួលខុសត្រូវតាមឋានានុក្រុមដល់ក្រុមប្រឹក្សាយុវជននិងកុមារកម្ពុជា រៀនដឹកនាំដោយខ្លួនឯងផ្ទាល់។

កម្មវិធីជជែកដេញដោលយុវជនខេត្តកំពង់ធំបានយកប្រធានបទ"យុវជន ជាកម្លាំងចម្បងក្នុងការលុបបំបាត់ព័ត៌មានក្លែងក្លាយនៅកម្ពុជា"មកជជែកដេញដោលមតិក្នុងវគ្គផ្តាច់ព្រ័ត្រ ដោយមានក្រុមស្របនិងក្រុមបដិសេធដែលជាវិធីសាស្ត្រអប់រំនិងបណ្តុះបណ្តាលយុវជនឱ្យក្លាយជាធនធាន ដ៏មានតម្លៃនៅក្នុងសង្គមជាតិដ៏មានប្រសិទ្ធភាពក្នុងគោលដៅគ្រឹះរិះពិចារណា វិភាគនិងស្វែងយល់ឱ្យកាន់តែច្បាស់លើការងារនេះ ដែលចាំបាច់ត្រូវរៀនផងអនុវត្តដោយផ្ទាល់ផង។ 

លោក ហាន កុសល អភិបាលរងខេត្តកំពង់ធំ បានគូសបញ្ជាក់ថា ដើម្បីជាធាតុចូលបន្ថែមសូមដាក់ចេញទិសដៅក្នុងនាមរដ្ឋបាលខេត្ត ដូចខាងក្រោម៖
ទី១.រដ្ឋបាលក្រុងស្រុកទូទាំងខេត្ត ត្រូវជំរុញនិងរៀបចំរចនាសម្ព័ន្ធនិងដំណើរការក្រុមប្រឹក្សាយុវជនកម្ពុជានៅ តាមវិទ្យាល័យ។ក៏ជាក្រុមប្រឹក្សាកុមារកម្ពុជានៅតាមសាលាបឋមសិក្សានិងអនុវិទ្យាល័យឱ្យមានប្រសិទ្ធភាព។ទី២. មន្ទីរអប់រំត្រូវសហការជាមួយរដ្ឋបាលក្រុងស្រុកក្នុងការរៀបចំកម្មវិធីអប់រំនៅតាមសាលារៀនឱ្យកាន់តែទូលំទូលាយ។ទី៣.សូមប្អូនៗក្មួយៗ បន្តខិតខំរៀនសូត្រដោយយកចិត្តទុកដាក់ ហើយត្រូវបន្តចែករំលែកនូវចំណេះដឹងជំនាញដល់មិត្តភក្តិដទៃទៀតសម្រាប់ជាការចែករំលែកសមត្ថភាពជំនាញទន់និងជំនាញវិជ្ជាជីវៈនានា ដែល គាំទ្រដល់សង្គម-សេដ្ឋកិច្ច សន្តិភាពនិងការអភិវឌ្ឍនិងទី៤.សូមថ្នាក់ដឹកនាំពាក់ព័ន្ធទាំងអស់ ជាពិសេសតំណាងរដ្ឋបាលក្រុងស្រុកត្រូវបង្កើនការយកចិត្តទុកដាក់លើការបង្កើតរចនាសម្ព័ន្ធចលនាកាយរឹទ្ធិ យុវជនកាកបាទក្រហមកម្ពុជា និងសហភាពសហព័ន្ធយុវជនកម្ពុជាជាដើមនៅតាមសាលារៀនប្រកបប្រសិទ្ធភាព និងគុណវុឌ្ឍ។

សូមបញ្ជាក់ថា វគ្គផ្តាច់ព្រ័ត្រកម្មវិធី ជជែកដេញដោលយុវជនខេត្តកំពង់ធំ រដូវកាលទី៣ ឆ្នាំ២០២៦ ក្រុមស្របអញ្ជើញមកពីវិទ្យាល័យស្ទឹងសែនក្រុងស្ទឹងសែន ក្រុមបដិសេធអញ្ជើញមកពីវិទ្យាល័យ ជា ស៊ីម កំពង់ថ្ម ស្រុកបារាយណ៍។ជាលទ្ធផលជ័យលាភីលេខ១បានទៅក្រុមស្របអញ្ជើញមកពីវិទ្យាល័យស្ទឹងសែនជ័យលាភីលេខ២បានទៅក្រុមបដិសេធអញ្ជើញមកពីវិទ្យាល័យជាស៊ីមកំពង់ថ្ម៕

ដោយ ស៊ុម វណ្ណា