AKP កណ្ដាល ថ្ងៃទី១៧ ខែតុលា ឆ្នាំ២០២៦--

រដ្ឋបាលខេត្តកណ្ដាល នៅរសៀលថ្ងៃទី១៦ ខែតុលា ឆ្នាំ២០២៦នេះ បានរៀបចំកិច្ចប្រជុំបូកសរុបលទ្ធផលនៃការអនុវត្តន៍គោលនយោបាយ “ភូមិ-ឃុំ-សង្កាត់ មានសុវត្ថិភាព” ប្រចាំនព្វមាស ឆ្នាំ២០២៦ និងលើកទិសដៅការងារបន្ត ដោយផ្តោតលើការបន្តរឹតបន្តឹងការបង្ក្រាបបទល្មើសតាមអនឡាញ ពង្រឹងការអនុវត្តន៍ការត្រួតពិនិត្យចរាចរណ៍ ដើម្បីធានាសន្តិសុខ សុវត្ថិភាព និងសុខសាន្តជូនប្រជាពលរដ្ឋ ក្រោមអធិបតីភាព ឯកឧត្តម អម មង្គល រដ្ឋលេខាធិការក្រសួងមហាផ្ទៃ ឯកឧត្តម ឯម សំណាង អនុរដ្ឋលេខាធិការក្រសួងមហាផ្ទៃ ឯកឧត្តម នូ សាខន ប្រធានក្រុមប្រឹក្សាខេត្តកណ្ដាល និងឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល។

មានប្រសាសន៍ក្នុងកិច្ចប្រជុំនេះ ឯកឧត្តម គួច ចំរើន បានជំរុញដល់កងកម្លាំងមានសមត្ថកិច្ចគ្រប់លំដាប់ថ្នាក់ ត្រូវបន្តពង្រឹងសន្តិសុខសណ្ដាប់ធ្នាប់សាធារណៈ និងការបង្ការទប់ស្កាត់បទល្មើសគ្រប់ប្រភេទ ជាពិសេស បទល្មើសឆបោកតាមប្រព័ន្ធអនឡាញ (Online Scam) ដែលកំពុងមានការវិវត្ត និងផ្លាស់ប្តូររូបភាពយ៉ាងឆាប់រហ័ស។ ករណីបទល្មើសឆបោកតាមប្រព័ន្ធអនឡាញនេះ ឯកឧត្តមអភិបាលខេត្ត បានណែនាំឱ្យកងកម្លាំងមានសមត្ថកិច្ច និងអាជ្ញាធរមូលដ្ឋាន ត្រូវបន្តស្រាវជ្រាវ ស៊ើបអង្កេត និងបង្ក្រាបឱ្យបានទាន់ពេលវេលា ដោយមិនត្រូវមើលរំលងករណីបទល្មើសដែលអាចបំបែកខ្លួនពីទីតាំងធំៗ មកប្រតិបត្តិការជាលក្ខណៈតូចៗនៅតាមមូលដ្ឋាននោះឡើយ ការងារនេះត្រូវមានការសហការគ្នាយ៉ាងជិតស្និទ្ធរវាងកម្លាំងសមត្ថកិច្ច អាជ្ញាធរមូលដ្ឋាន និងប្រជាពលរដ្ឋ ដើម្បីផ្តល់ព័ត៌មាន កំណត់ទីតាំង ស្គាល់មុខសញ្ញា សំដៅឈានទៅដល់ការបង្ក្រាបទប់ស្កាត់បទល្មើសឱ្យបានមុនពេលបង្កផលប៉ះពាល់ដល់ប្រជាពលរដ្ឋ។ ប្រជាពលរដ្ឋឱ្យចូលរួមផ្តល់ព័ត៌មានពាក់ព័ន្ធនឹងសកម្មភាពសង្ស័យ ឬបទល្មើសអនឡាញទៅកាន់សមត្ថកិច្ច ដើម្បីឱ្យមានការចាត់វិធានការបានឆាប់រហ័ស និងមានប្រសិទ្ធភាព។ ការបង្ក្រាបបទល្មើសមិនអាចពឹងផ្អែកតែលើកម្លាំងសមត្ថកិច្ចប៉ុណ្ណោះទេ ប៉ុន្តែត្រូវការការចូលរួមពីប្រជាពលរដ្ឋ និងគ្រប់ភាគីពាក់ព័ន្ធ ដើម្បីធានាឱ្យមូលដ្ឋានមានសុវត្ថិភាព និងកាត់បន្ថយបទល្មើសឱ្យបានជាអតិបរមា។ ការងារថវរាចរណ៍ វិញ ឯកឧត្តម បានបញ្ជាក់ថា ខេត្តកណ្ដាល គឺជាខេត្តមួយក្នុងចំណោមខេត្តអាទិភាពទាំង៥ ដែលក្រសួងមហាផ្ទៃបានជំរុញឱ្យយកចិត្តទុកដាក់ពង្រឹងការអនុវត្តវិធានការរឹតបន្តឹងច្បាប់ចរាចរណ៍ ដូច្នេះ កម្លាំងសមត្ថកិច្ចត្រូវរៀបចំប៉ុស្តិ៍ត្រួតពិនិត្យនៅតាមទីតាំងដែលមានបញ្ហាប្រឈមខ្លាំង និងត្រូវកំណត់ពេលវេលាដែលមានការកើតឡើងនៃគ្រោះថ្នាក់ញឹកញាប់ ដើម្បីរៀបចំកម្លាំងចុះត្រួតពិនិត្យឱ្យសមស្របទៅនឹងស្ថានភាពជាក់ស្តែង។

ថ្លែងក្នុងកិច្ចប្រជុំនេះដែរ ឯកឧត្តម អម មង្គល រដ្ឋលេខាធិការក្រសួងមហាផ្ទៃ បានណែនាំឱ្យអាជ្ញាធរខេត្ត និងមូលដ្ឋាន បន្តយកចិត្តទុកដាក់លើចំណុចសំខាន់ៗ នៃគោលនយោបាយ «ភូមិ ឃុំ សង្កាត់ មានសុវត្ថិភាព» និងត្រូវបន្តកែលម្អការអនុវត្តឱ្យកាន់តែមានប្រសិទ្ធភាព ស្របតាមស្ថានភាព និងបញ្ហាប្រឈមជាក់ស្តែងនៅមូលដ្ឋាន ។ សុវត្ថិភាពនៅមូលដ្ឋាន មិនត្រឹមតែសំដៅទៅលើការបង្ក្រាបបទល្មើសប៉ុណ្ណោះទេ ប៉ុន្តែត្រូវផ្តោតលើការបង្ការ ទប់ស្កាត់ និងដោះស្រាយបញ្ហាដែលអាចប៉ះពាល់ដល់ជីវភាព សន្តិសុខ និងសុវត្ថិភាពរបស់ប្រជាពលរដ្ឋជាមុន ដែលតម្រូវឲ្យអាជ្ញាធរគ្រប់លំដាប់ថ្នាក់ត្រូវមានការសហការគ្នា តាមដានស្ថានភាព និងចុះមូលដ្ឋានឱ្យបានជាប់ជាប្រចាំ ដើម្បីស្វែងយល់ពីបញ្ហាពិតប្រាកដរបស់ប្រជាពលរដ្ឋ។

បន្ថែមពីលើនេះ ឯកឧត្តម អម មង្គល បានជំរុញឱ្យមានការលើកកម្ពស់ ការផ្តល់សេវាសាធារណៈឱ្យបានរហ័ស ទាន់ពេលវេលា មានប្រសិទ្ធភាព និងតម្លាភាព ដោយត្រូវស្តាប់បញ្ហា និងសំណូមពររបស់ប្រជាពលរដ្ឋដោយផ្ទាល់ រាល់បញ្ហាដែលប្រជាពលរដ្ឋបានលើកឡើង ត្រូវយកចិត្តទុកដាក់ដោះស្រាយឱ្យបានឆាប់រហ័ស តាមសមត្ថកិច្ច និងនីតិវិធី ដើម្បីឱ្យប្រជាពលរដ្ឋមានទំនុកចិត្តលើអាជ្ញាធរ និងស្ថាប័នសាធារណៈ។ ឯកឧត្តមរដ្ឋលេខាធិការ ក៏បានជំរុញឱ្យអាជ្ញាធរមូលដ្ឋាន ពង្រឹងទំនាក់ទំនងជាមួយប្រជាពលរដ្ឋ និងធ្វើឱ្យការផ្តល់សេវា កាន់តែខិតជិតប្រជាពលរដ្ឋ ដោយចាត់ទុកការដោះស្រាយបញ្ហាជូនប្រជាពលរដ្ឋជាអាទិភាពសំខាន់ ៕

ដោយ ណយ នឿន (ប្រភព៖រដ្ឋបាលខេត្តកណ្តាល)