AKP តាកែវ ថ្ងៃទី០៧ ខែតុលា ឆ្នាំ២០២៦--លោក កង អាណាន់ អភិបាលនៃគណៈអភិបាលស្រុកអង្គរបូរី រួមជាមួយលោក លោកស្រីអភិបាលរងស្រុក ប្រធាន អនុប្រធានការិយាល័យ អង្គភាពជុំវិញស្រុក មន្ត្រីរាជការ កងកម្លាំងប្រដាប់អាវុធចំណុះរដ្ឋបាលស្រុកអង្គរបូរី អាជ្ញាធរមូលដ្ឋាន និងពុទ្ធបរិស័ទចំណុះជើងវត្ត បានអញ្ជើញចូលរួមកាន់បិណ្ឌវេនទី១០ នៅវត្តអង្គជុំ ហៅវត្តកំហែង។ពិធីនេះរៀបចំប្រារព្ធឡើងនៅក្នុងវត្តអង្គរជុំ ស្ថិតនៅក្នុងឃុំព្រៃផ្គាំ ស្រុកអង្គរបូរី ខេត្តតាកែវ កាលពីព្រឹកថ្ងៃអង្គារ ១០កើត ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី០៦ ខែតុលា ឆ្នាំ២០២៦។

មានប្រសាសន៍សំណេះសំណាលក្នុងពិធីនោះ លោក កង អាណាន់ អភិបាលនៃគណៈអភិបាលស្រុកអង្គរបូរី បានគូសបញ្ជាក់យ៉ាងច្បាស់ពី «កត្តាសុខសន្តិភាព» ដែលជាគ្រឹះយ៉ាងរឹងមាំក្នុងការផ្តល់ឱកាសជូនដល់បងប្អូនប្រជាពលរដ្ឋជិតឆ្ងាយ បានជួបជុំគ្នាយ៉ាងសប្បាយរីករាយ និងបានធ្វើបុណ្យទានតាមវត្តអារាមនានានូវទូទាំងប្រទេស។

លោក កង អាណាន់ បានមានប្រសាសន៍បន្តថា ផ្លែផ្កានៃសុខសន្តិភាព សុវត្ថិភាព និងស្ថិរភាពនយោបាយនេះហើយ បានផ្តល់ឱកាសឱ្យប្រជាពលរដ្ឋយើងគ្រប់ទិសទីមានសិទ្ធិសេរីភាពពេញលេញ និងមានឱកាសបានជួបជុំក្រុមគ្រួសារ ដើម្បីធ្វើបុណ្យទាន និងប្រតិបត្តិតាមជំនឿសាសនាដោយគ្មានការភ័យខ្លាច ឬការព្រួយបារម្ភអ្វីឡើយ។ ដូច្នេះ យើងទាំងអស់គ្នាត្រូវតែរួមគ្នារក្សា និងការពារកត្តាសុខសន្តិភាពនេះឱ្យបានគង់វង្ស ដើម្បីបន្តអភិវឌ្ឍន៍សង្គមជាតិ និងលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើងថែមទៀត។

លោក កង អាណាន់ បានមានប្រសាសន៍បន្ថែមថា ពិធីបុណ្យភ្ជុំបិណ្ឌមិនត្រឹមតែជាពិធីបុណ្យតាមប្រពៃណីព្រះពុទ្ធសាសនាដើម្បីសម្តែងនូវកតញ្ញូកតវេទិតាធម៌ចំពោះបុព្វការីជន និងញាតិសន្តានដែលបានចែកឋានទៅកាន់បរលោកប៉ុណ្ណោះទេ ប៉ុន្តែថែមទាំងជាឱកាសក្នុងការរឹតចំណងសាមគ្គីភាព ភាពស្និទ្ធស្នាល និងក្ដីស្រឡាញ់រវាងបងប្អូនប្រជាពលរដ្ឋក្នុងមូលដ្ឋាន ក៏ដូចជាការថែរក្សា និងលើកស្ទួយវប្បធម៌ទំនៀមទម្លាប់ដ៏ល្អផូរផង់របស់ជាតិយើងឱ្យបានគង់វង្សតទៅជំនាន់ក្រោយៗទៀតផងដែរ។

លោក កង អាណាន់ ក៏បានអំពាវនាវដល់បងប្អូនប្រជាពលរដ្ឋទាំងអស់ សូមបន្តចូលរួមសហការជាមួយអាជ្ញាធរដែនដី និងកងកម្លាំងប្រដាប់អាវុធគ្រប់លំដាប់ថ្នាក់ក្នុងការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពក្នុងភូមិ-ឃុំ ព្រមទាំងបង្កើនការប្រុងប្រយ័ត្នខ្ពស់ក្នុងការធ្វើដំណើរទីជិតទីឆ្ងាយ ដើម្បីធានាថា ពិធីបុណ្យប្រពៃណីជាតិនេះប្រព្រឹត្តទៅដោយរលូន គ្មានគ្រោះថ្នាក់ និងប្រកបដោយស្នាមញញឹម ព្រមទាំងក្តីសុខក្សេមក្សាន្តគ្រប់គ្រួសារ។

ជាចុងក្រោយលោកអភិបាលស្រុកអង្គរបូរី រួមជាមួយថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ អាជ្ញាធរមូលដ្ឋាន និងពុទ្ធបរិស័ទទាំងអស់ បានប្រគេនបច្ច័យ និងទេយ្យទានដល់ព្រះសង្ឃដែលគង់ចាំព្រះវស្សាក្នុងពុទ្ធសីមាវត្តអង្គជុំ ហៅវត្តកំហែង៕

ដោយ៖ អ៊ុច សៀង