AKP ភ្នំពេញ ថ្ងៃទី០៥ ខែតុលា ឆ្នាំ២០២៦-- លោក ហៃ ប៊ុនធឿន អគ្គនាយករងនៃអគ្គនាយកដ្ឋានកិច្ចការរដ្ឋបាល នៃក្រសួងធនធានទឹក និងឧតុនិយម បានអញ្ជើញដឹកនាំបើកវគ្គបណ្តុះបណ្តាលស្តីពី «អត្ថប្រយោជន៍នៃការប្រមូលទិន្នន័យ និងការប្រើប្រាស់ទិន្នន័យឧតុនិយម» ដោយមានសិក្ខាកាមចូលរួមសរុបចំនួន ៣៥នាក់ នាព្រឹកថ្ងៃចន្ទ ទី៥ ខែតុលា ឆ្នាំ២០២៦ នៅសាលរំដួលទីស្តីការក្រសួង ។

គូរបញ្ជាក់ថា ទិន្នន័យឧតុនិយមមានសារៈសំខាន់ខ្លាំងណាស់ដល់វិស័យជាច្រើនដូចជា៖ កសិកម្ម, ធនធានទឹក, វិស័យអាកាសចរណ៏ ,ធាតុអាកាស,ការគ្រប់គ្រងគ្រោះមហន្តរាយ, សុខភាពសាធារណៈ និងការរៀបចំផែនការអភិវឌ្ឍន៍។ ការប្រមូល និងប្រើប្រាស់ទិន្នន័យបានត្រឹមត្រូវ នឹងជួយឱ្យទទួលបានព័ត៌មានគួរឱ្យទុកចិត្តសម្រាប់ធ្វើការសម្រេចចិត្តទាន់ពេលវេលា កាត់បន្ថយហានិភ័យ និងការខាតបង់ ព្រមទាំងបង្កើនប្រសិទ្ធភាពនៃការគ្រប់គ្រងធនធាន ក្នុងបរិបទនៃការប្រែប្រួលអាកាសធាតុ តាមរយៈការព្យាករណ៍ និងការព្រមានឱ្យបានមុន។

វគ្គបណ្តុះបណ្តាលនេះមាន គ្រូឧទ្ទេសនឹងចែករំលែកទ្រឹស្តី បទពិសោធន៍ បច្ចេកទេស និងការប្រើប្រាស់ឧបករណ៍ឧតុនិយម ជូនសិក្ខាកាមដើម្បីពង្រឹងសមត្ថភាពលើការប្រមូល កត់ត្រា គ្រប់គ្រង វិភាគ និងចែករំលែកទិន្នន័យឱ្យមានប្រសិទ្ធភាព ក្រោយបញ្ចប់វគ្គបណ្តុះបណ្តាលនេះសង្ឃឹមថាសិក្ខាកាមនឹងទទួលបានចំណេះដឹង និងបទពិសោធន៍ថ្មីៗជាទុន ដើម្បីលើកកម្ពស់ប្រសិទ្ធភាពការងារស្ថាប័នឱ្យកាន់តែប្រសើរឡើង៕

ដោយ៖ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)