AKP ភ្នំពេញ ថ្ងៃទី០៥ ខែតុលា ឆ្នាំ២០២៦--ឯកឧត្តម សុត រស្មី រដ្ឋលេខាធិការ ក្រសួងធនធានទឹក និងឧតុនិយម បានដឹកនាំក្រុមការងារអន្តរក្រសួង ដោយមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ ចុះពិនិត្យ និងវាយតម្លៃលទ្ធផលការងារថែទាំជាប្រចាំឆ្នាំ២០២៦ (ដំណាក់កាលទី២) លើប្រព័ន្ធធារាសាស្ត្រសំខាន់ៗមួយចំនួន ស្ថិតក្នុងភូមិសាស្ត្រខេត្តត្បូងឃ្មុំ ខេត្តស្វាយរៀង និងខេត្តព្រៃវែងនាថ្ងៃចន្ទទី៥ ខែតុលា ឆ្នាំ២០២៦ នេះ។

ឯកឧត្ដមរដ្ឋលេខាធិការ និងក្រុមការងារអន្ដរក្រសួង បានចុះពិនិត្យលើទីតាំងប្រព័ន្ធធារាសាស្ត្រគោលដៅចំនួន ៣ រួមមាន ៖
១. ប្រព័ន្ធធារាសាស្ត្រវ៉ៃគោ (ជំហានទី១) ស្ថិតក្នុងភូមិសាស្ត្រខេត្តព្រៃវែង និងខេត្តត្បូងឃ្មុំ។
២. ប្រព័ន្ធធារាសាស្ត្រកំពង់ជ្រៃ ស្ថិតក្នុងឃុំស្វាយធំ ស្រុកស្វាយជ្រំ ខេត្តស្វាយរៀង។
៣. ប្រព័ន្ធធារាសាស្ត្រការពារទឹកជំនន់ និងស្រោចស្រពកំពង់ត្របែក ស្ថិតក្នុងឃុំកំពង់ត្របែក ស្រុកកំពង់ត្របែក ខេត្តព្រៃវែង។

ឯកឧត្តមបានកោតសរសើរនាយកដ្ឋានធារាសាស្ត្រកសិកម្ម ដែលបានខិតខំស្តារ និងជួសជុលប្រព័ន្ធធារាសាស្ត្រប្រកបដោយប្រសិទ្ធភាព និងបទដ្ឋានបច្ចេកទេស សម្រាប់បម្រើដល់ការស្រោចស្រព ការរំដោះទឹកជំនន់ ការប្រើប្រាស់ប្រចាំថ្ងៃ និងសេដ្ឋកិច្ច-សង្គម ព្រមទាំងបានណែនាំដល់មន្ទីរជំនាញត្រូវបន្តសហការជិតស្និទ្ធជាមួយអាជ្ញាធរ ប្រជាពលរដ្ឋ និងសហគមន៍កសិករប្រើប្រាស់ទឹក ដើម្បីរួមគ្នាថែរក្សាការពារសមិទ្ធផលទាំងនេះឱ្យមានចីរភាពសម្រាប់ប្រយោជន៍រួមយូរអង្វែង៕

ដោយ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)