AKP ភ្នំពេញ ថ្ងៃទី៣០ ខែកញ្ញា ឆ្នាំ២០២៦ -- យោងតាមទីភ្នាក់ងារព័ត៌មានរដ្ឋ IRNA របស់អ៊ីរ៉ង់ បានឱ្យដឹងថា ប្រធានសភាអ៊ីរ៉ង់ លោក ម៉ូហាំម៉ាដ បាកហ្គើរ កាលីបាហ្វ បានព្រមានកាលពីថ្ងៃអង្គារថា នឹងមិនមានប្រទេសណាមួយនៅក្នុងតំបន់អាចលក់ប្រេងបានឡើយ ប្រសិនបើអ៊ីរ៉ង់ត្រូវបានរារាំងមិនឱ្យធ្វើដូច្នេះ។

លោក កាលីបាហ្វ បាននិយាយថា «សហរដ្ឋអាមេរិក និងប្រទេសដទៃទៀតគួរតែដឹងថា ដូចដែលយើងបាននិយាយរួចមកហើយថា នៅក្នុងតំបន់ដែលយើងមិនអាចលក់ប្រេងបាន នោះក៏នឹងគ្មាននរណាម្នាក់អាចលក់ប្រេងបានដែរ»។

ការព្រមានរបស់លោកខាងលើនេះធ្វើឡើងនៅពេលដែលអ៊ីរ៉ង់កំពុងប្រឈមមុខនឹងការរឹតបន្តឹងយ៉ាងធ្ងន់ធ្ងរលើការនាំចេញប្រេងរបស់ខ្លួន ចំពេលដែលមានជម្លោះជាមួយទីក្រុងវ៉ាស៊ីនតោន និងការដាក់ទណ្ឌកម្មពីសំណាក់សហរដ្ឋអាមេរិក។

អភិបាលធនាគារកណ្តាលរបស់អ៊ីរ៉ង់បាននិយាយកាលពីខែសីហាថាការនាំចេញប្រេងរបស់ប្រទេសនេះបានធ្លាក់ចុះដល់កម្រិតសូន្យ ដោយលោកបានបញ្ជាក់ថា ទីក្រុងតេអេរ៉ង់លែងនាំចេញប្រេងឆៅទៀតហើយដោយសារតែសង្គ្រាម និងការដាក់ទណ្ឌកម្ម។

ទន្ទឹមនឹងនេះ យោធាអាម៉េរិកបាននិយាយកាលពីថ្ងៃទី១៩ ខែកញ្ញា ថាប្រេងឆៅជាង ១ពាន់លានបារ៉ែលបានដឹកជញ្ជូនកាត់តាមច្រកសមុទ្រហ័រមុសក្នុងរយៈពេលប៉ុន្មានខែថ្មីៗនេះ ដោយមានជំនួយពីយោធាអាម៉េរិកខណៈដែលអះអាងថា អ៊ីរ៉ង់បាននាំចេញក្នុងកម្រិត «សូន្យបារ៉ែល» ក្រោមអ្វីដែលទីក្រុងវ៉ាស៊ីនតោនហៅថាជា «ការបិទខ្ទប់យ៉ាងតឹងរ៉ឹងបំផុត» របស់ខ្លួន។

លោក កាលីបាហ្វ បាននិយាយថា «ប្រសិនបើសុវត្ថិភាពរបស់យើងមិនត្រូវបានធានាទេនោះនឹងគ្មានហេដ្ឋារចនាសម្ព័ន្ធណាមួយមានសុវត្ថិភាពឡើយ»។

កាលពីដើមខែនេះ លោក កាលីបាហ្វ បានព្រមានថាហេដ្ឋារចនាសម្ព័ន្ធថាមពល និងទ្រព្យសម្បត្តិរបស់សហរដ្ឋអាមេរិកនៅជុំវិញតំបន់ឈូងសមុទ្រ និងច្រកសមុទ្រហ័រមុស អាចនឹងប្រឈមមុខនឹងការសងសឹកពីសំណាក់អ៊ីរ៉ង់ ប្រសិនបើទីក្រុងវ៉ាស៊ីនតោនវាយប្រហារលើកន្លែងផលិតប្រេង និងឧស្ម័នរបស់អ៊ីរ៉ង់៕

ដោយ៖ យា ចិន្ដាខន្ដី (ប្រភព៖ AA-AKP)