AKP បន្ទាយមានជ័យ ថ្ងៃទី២៤ ខែកញ្ញា ឆ្នាំ២០២៦-- ក្រោយពេលមានភ្លៀងធ្លាក់ជាបន្តបន្ទាប់ និងមានទឹកហូរធ្លាក់មកពីប្រទេសថៃ ធ្វើឱ្យកម្ពស់ទឹកអូរព្រំដែនឡើងជោរជន់ហក់ឡើងខ្លាំង និងបានបង្កការជន់លិចលំនៅឋានប្រជាពលរដ្ឋជាច្រើនខ្នង។ អាជ្ញាធរដែនដី និងក្រុមការងាររាជរដ្ឋាភិបាល បានចុះពិនិត្យស្ថានភាពដោយផ្ទាល់ ព្រមទាំងដាក់ចេញនូវវិធានការសង្គ្រោះ និងរំដោះទឹកជាបន្ទាន់។

យោងតាមការបញ្ជាក់ពីលោកវរសេនីយ៍ឯក បោន សីហា មេបញ្ជាការវរសេនាតូចនគរបាលការពារព្រំដែនគោកលេខ៨៩១ បានឱ្យដឹងថា នៅថ្ងៃទី២៤ ខែកញ្ញា ឆ្នាំ២០២៦ ស្ថានភាពអាកាសធាតុដែលមានភ្លៀងធ្លាក់លាយឡំជាមួយទឹកហូរពីប្រទេសថៃ បានធ្វើឱ្យទឹកអូរព្រំដែនកម្ពុជា-ថៃ ឡើងខ្ពស់។ លំនៅឋានប្រជាពលរដ្ឋតាមបណ្តោយមាត់អូរព្រំដែន ចាប់ពីភូមិសាស្ត្រប៉ុស្តិ៍អូរជ្រៅ រហូតដល់ភូមិសាស្រ្តប៉ុស្តិ៍អូរល្ហុង។ ផ្ទះសម្បែងប្រជាពលរដ្ឋសរុបចំនួន ២៤២ ខ្នង នៅក្នុងភូមិសាស្ត្រចំនួន ៦ គឺ ភូមិប៉ោយប៉ែត ភូមិអូរជ្រៅ ភូមិក្បាលកោះ ភូមិគីឡូម៉ែត្រលេខ៤ ភូមិផ្សារកណ្តាល និងភូមិសុខសាន្ត ក្រុងប៉ោយប៉ែត ខេត្តបន្ទាយមានជ័យ។

នៅព្រឹកថ្ងៃទី២៤ ខែកញ្ញា ឆ្នាំ២០២៦ ក្រោមការដឹកនាំ និងសម្របសម្រួលដោយ ឯកឧត្តម ប៉ាន់ ខែម ប៊ុនថន ប្រធានក្រុមការងាររាជរដ្ឋាភិបាលចុះជួយមូលដ្ឋានក្រុងប៉ោយប៉ែត រួមជាមួយ លោក គាត ហ៊ុល អភិបាលនៃគណៈអភិបាលក្រុងប៉ោយប៉ែត លោកចៅសង្កាត់ លោកប្រធានមន្ទីរធនធានទឹក និងឧតុនិយមខេត្ត ព្រមទាំងអាជ្ញាធរមានសមត្ថកិច្ចបានចុះពិនិត្យស្ថានភាពទឹកជំនន់ដោយផ្ទាល់។

ក្នុងឱកាសនោះ ឯកឧត្តម ប៉ាន់ ខែម ប៊ុនថន បានណែនាំយ៉ាងម៉ឺងម៉ាត់ដល់អាជ្ញាធរមូលដ្ឋាន និងកងកម្លាំងប្រដាប់អាវុធ ឱ្យត្រៀមលក្ខណៈរៀបចំសម្ភារ មធ្យោបាយ និងកម្លាំងអន្តរាគមន៍ឱ្យបានរួចរាល់ ដើម្បីជួយសង្គ្រោះ និងជម្លៀសប្រជាពលរដ្ឋទៅកាន់ទីទួលសុវត្ថិភាពឱ្យបានទាន់ពេលវេលា ក្នុងករណីមានសភាពការណ៍អាសន្ន ឬទឹកជំនន់បន្តកើនឡើងខ្លាំង។

បន្ថែមពីលើនេះ ក្រុមការងារបានចុះបើកទ្វារទឹកដើម្បីរំដោះទឹកចេញ កាត់បន្ថយផលប៉ះពាល់ដល់ជីវភាពរស់នៅ និងទ្រព្យសម្បត្តិរបស់ប្រជាពលរដ្ឋឱ្យបាននៅកម្រិតអតិបរមា។
បើទោះបីជាអាជ្ញាធរបាននិងកំពុងចាត់វិធានការយ៉ាងសកម្មក៏ដោយ ប៉ុន្តែស្ថានភាពទឹកភ្លៀងនៅពុំទាន់បានស្រកចុះនៅឡើយទេ។ ដូច្នេះ កម្លាំងអង្គភាពវរសេនាតូចនគរបាលការពារព្រំដែនគោកលេខ ៨៩១ បានបន្តចុះផ្សព្វផ្សាយអប់រំពីហានិភ័យដល់ប្រជាពលរដ្ឋតាមបណ្តោយអូរព្រំដែន និងត្រៀមកម្លាំងជាប្រចាំដើម្បីជួយសង្គ្រោះប្រជាពលរដ្ឋទាន់ពេលវេលា៕

ដោយ ឈុន សារ៉ាត