AKP សៀមរាប ថ្ងៃទី២៤ ខែកញ្ញា ឆ្នាំ២០២៦-- រដ្ឋបាលខេត្តសៀមរាបបានរៀបចំពិធីដាក់ក្រពុំបិណ្ឌផ្កាឈូក ដើម្បីគោរពរដ្ឋធម្មនុញ្ញកម្ពុជា ក្នុងឱកាសរំលឹកខួបលើកទី៣៣នៃទិវាប្រកាសរដ្ឋធម្មនុញ្ញ ដោយពិធីនេះបានធ្វើឡើងនៅសាលាខេត្តសៀមរាប នាព្រឹកថ្ងៃទី២៤ ខែកញ្ញា ឆ្នាំ២០២៦នេះ ក្រោមអធិបតីភាពឯកឧត្តម តោ គឹមស៊ាន សមាជិកក្រុមប្រឹក្សាខេត្ត និងមានការអញ្ជើញចូលរួមពីសំណាក់ឯកឧត្តម លោកជំទាវ លោកនិង លោកស្រី ដែលជាមន្រ្តីថ្នាក់ដឹកនាំខេត្ត អាជ្ញាធរជាតិអប្សរា និងមន្ទីរអង្គភាពនានាចំណុះឱ្យរដ្ឋបាលខេត្តប្រមាណ៣០០នាក់។

ក្នុងពិធីដាក់ក្រពុំបិណ្ឌផ្កាឈូកនោះ ឯកឧត្តម តោ គឹមស៊ាន បានមានប្រសាសន៍ឱ្យដឹងថា រដ្ឋបាលខេត្តសៀមរាបរៀបចំពិធីដាក់ក្រពុំបិណ្ឌផ្កាឈូកនេះ ដើម្បីគោរពរដ្ឋធម្មនុញ្ញកម្ពុជា ក្នុងឱកាសរំលឹកខួបនៃទិវាប្រកាសរដ្ឋធម្មនុញ្ញ ដែលបានប្រារព្ធឡើងជារៀងរាល់ឆ្នាំនៅថ្ងៃទី២៤ ខែកញ្ញា។ ពិធីដាក់ក្រពុំបិណ្ឌផ្កាឈូកនេះដែរ គឺជាពិធីប្រវត្តិសាស្ត្រដ៏មានអត្ថន័យដែលបង្ហាញពីក្តីគោរព និងការចងចាំចំពោះ “ទិវាប្រកាសរដ្ឋធម្មនុញ្ញ” ដែលកម្ពុជាតែងតែប្រកាន់ភ្ជាប់ និងថែរក្សានូវតម្លៃនៃសន្តិភាព សិទ្ធិ និងប្រជាធិបតេយ្យសម្រាប់ប្រទេស និងប្រជាជនកម្ពុជា។

ឯកឧត្តម តោ គឹមស៊ាន បានឱ្យដឹងទៀតថា ពិធីជាប្រវត្តិសាស្ត្រដ៏សំខាន់មួយនេះនឹងក្លាយទៅជាការលើកស្ទួយតម្លៃរដ្ឋធម្មនុញ្ញ និងបន្តការផ្សព្វផ្សាយចំពោះសាធារណជន ពិសេសយុវជនជាអ្នកបន្តវេនជំនាន់ក្រោយឱ្យបានយល់ដឹង និងមានក្តីមោទនភាពក្នុងនាមជាពលរដ្ឋកម្ពុជា ដោយឯកឧត្តមបានបញ្ជាក់ថា រដ្ឋធម្មនុញ្ញគឺជាច្បាប់កំពូលរបស់កម្ពុជា។ ហើយរដ្ឋធម្មនុញ្ញ គ្រប់គ្រងបញ្ហាអធិបតេយ្យភាព តួនាទី និងឋានៈរបស់ព្រះមហាក្សត្រ សិទ្ធិជាមូលដ្ឋានរបស់ប្រជាពលរដ្ឋខ្មែរ សេដ្ឋកិច្ច ការអប់រំ វប្បធម៌ កិច្ចការសង្គម និងការប្រព្រឹត្តទៅនៃរដ្ឋសភា ព្រឹទ្ធសភា រាជរដ្ឋាភិបាល ព្រមទាំងការប្រព្រឹត្តទៅនៃស្ថាប័នតុលាការក្រុមប្រឹក្សាធម្មនុញ្ញ។

ឯកឧត្តម តោ គឹមស៊ាន បានរំលឹកឱ្យដឹងថា កម្ពុជាបានចាប់ផ្តើមបង្កើតរដ្ឋធម្មនុញ្ញលើកដំបូងនៅឆ្នាំ១៩៤៧ ហើយរដ្ឋធម្មនុញ្ញដែលកម្ពុជាកំពុងប្រើប្រាស់បច្ចុប្បន្ន ជារដ្ឋធម្មនុញ្ញលើកទី៦ ត្រូវបានអនុម័តដោយសភាធម្មនុញ្ញនៅថ្ងៃទី២១ ខែកញ្ញា ឆ្នាំ១៩៩៣ ហើយត្រូវបានអតីតព្រះមហាក្សត្រកម្ពុជា ព្រះបរមរតនកោដ្ឋ ប្រកាសឱ្យប្រើប្រាស់ជាផ្លូវការ ថ្ងៃទី២៤ ខែកញ្ញា ឆ្នាំ១៩៩៣ មកដល់បច្ចុប្បន្ន មានអាយុកាល៣៣ឆ្នាំហើយ។

រដ្ឋធម្មនុញ្ញកម្ពុជាបានចែងអំពីគោលការណ៍នៃការបែងចែកអំណាចដាច់ដោយឡែកពីគ្នាគឺ៖ ១) អំណាចនីតិប្បញ្ញត្តិ ២) អំណាចនីតិប្រតិបត្តិ និង៣) អំណាចតុលាការ ហើយក៏បានអនុម័តនូវសិទ្ធិជាមូលដ្ឋានរបស់ប្រជាពលរដ្ឋ និងគោលការណ៍នីតិរដ្ឋជាដើម៕

ដោយ ហង្ស សៀក