AKP កំពង់ធំ ថ្ងៃទី២៣ ខែកញ្ញា ឆ្នាំ២០២៦--ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍នៃគណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ កាលពីថ្ងៃទី២២ ខែកញ្ញា ឆ្នាំ២០២៦ បាននាំយកប្រេងឥន្ធនៈចំនួន៤០០លីត្រ ស្បៀងអាហារ គ្រឿងឧបភោគបរិភោគ និងថវិកា ទៅប្រគល់ជូនកងកម្លាំងចម្រុះប្រចាំការការពារ ទប់ស្កាត់ និងបង្ក្រាបបទល្មើសនេសាទខុសច្បាប់ ក្នុងភូមិសាស្ត្រព្រំប្រទល់ស្រុកស្ទោង និងស្រុកកំពង់ស្វាយ ខេត្តកំពង់ធំ។

ក្នុងឱកាសនោះឧត្តមសេនីយ៍ទោ សោម ស៊ុន បានថ្លែងអំណរគុណចំពោះកងកម្លាំងចម្រុះទាំងអស់ ដែលបានខិតខំបំពេញភារកិច្ចក្នុងការបង្ក្រាបបទល្មើសនេសាទខុសច្បាប់នៅតំបន់ជាប់ព្រំប្រទល់ស្រុកស្ទោង ខេត្តកំពង់ធំ និងស្រុកជីក្រៃង ខេត្តសៀមរាប ក្នុងរយៈពេលជាងមួយសប្តាហ៍ក្នុងពាក់កណ្ដាលខែកញ្ញា ឆ្នាំ២០២៦កន្លងទៅនេះ ដោយទទួលបានលទ្ធផលល្អប្រសើរ ក្នុងនោះ បានសហការល្អជាមួយកងកម្លាំងនៃបញ្ជាការដ្ឋានតំបន់ប្រតិបត្តិការសឹករងខេត្តសៀមរាប និងកងកម្លាំងរបស់បញ្ជាការដ្ឋានយោធភូមិភាគទី៤ផងដែរ។

ក្នុងឱកាសនោះ ឧត្តមសេនីយ៍ទោ សោម ស៊ុន បានណែនាំ និងប្រគល់ភារកិច្ចដល់កងកម្លាំងចម្រុះទាំងអស់ត្រូវបន្តសកម្មភាពក្នុងការបង្ក្រាបបទល្មើសនេសាទខុសច្បាប់ ឱ្យដូចភ្លៀងរលឹម ពិសេសឧបករណ៍ស្បៃមុង, ឧបករណ៍ឆក់ត្រីគ្រប់ប្រភេទ និងរបាំងស្បៃអួនក្រឡាញឹកខុសច្បាប់នៅក្នុងរដូវបិទនេសាទនេះឱ្យទទួលបានជោគជ័យបន្ថែមទៀត ដោយគ្មានការដកថយឡើយ។
ឧត្តមសេនីយ៍ទោ សោម ស៊ុន បានប្រគល់ប្រេងឥន្ធនៈចំនួន ៤០០ លីត្រមានស្បៀងអាហារគ្រឿងឧបភោគបរិភោគនិងថវិកាមួយចំនួន សម្រាប់ជួសជុលកាណូត ដែលបានខូចខាតក្នុងពេលបំពេញភារកិច្ចនាពេលកន្លងទៅ។ ជាមួយនេះដែរ កងកម្លាំងចម្រុះទាំងអស់ បានប្ដេជ្ញាចិត្តអនុវត្តន៍តាមបទបញ្ជារបស់មេបញ្ជាការតំបន់ប្រតិបត្តិការសឹករងកំពង់ធំ ឱ្យទទួលបានជោគជ័យដើម្បីធ្វើឱ្យផលត្រីរបស់យើងបានសម្បូរឡើងវិញសម្រាប់បម្រើសេចក្ដីត្រូវការជូនសង្គមជាតិ និងប្រជាជនកម្ពុជានៅទូទាំងប្រទេស៕

ដោយ ស៊ុម វណ្ណា