AKP ភ្នំពេញ ថ្ងៃទី១៧ ខែកញ្ញា ឆ្នាំ២០២៦--មជ្ឈមណ្ឌលត្រួតពិនិត្យឧបករណ៍មានហានិភ័យខ្ពស់ បានរៀបចំសិក្ខាសាលាផ្សព្វផ្សាយស្តីពី «ការត្រួតពិនិត្យឧបករណ៍មានហានិភ័យខ្ពស់ និងវគ្គបណ្តុះបណ្តាលប្រឡងវាយតម្លៃប្រតិបត្តិករ» ដើម្បីពង្រឹងគុណភាព និងសុវត្ថិភាពឧស្សាហកម្ម។ សិក្ខាសាលានេះ បានធ្វើឡើងកាលពីថ្ងៃទី១៥ ខែកញ្ញា ឆ្នាំ២០២៦ ដោយមានការអញ្ជើញចូលរួមពីឯកឧត្តម បណ្ឌិត ទីង ស៊ីនី រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងអគ្គនាយកនៃអគ្គនាយកដ្ឋានមន្ទីរពិសោធន៍សំណង់ជាតិ នៃក្រសួងរៀបចំដែនដី នគរូបនីយកម្ម និងសំណង់ ថ្នាក់ដឹកនាំមន្ទីរឧស្សាហកម្មតាមបណ្តាខេត្ត តំណាងសមាគមពាណិជ្ជកម្ម ថ្នាក់ដឹកនាំសួនឧស្សាហកម្ម និងតំណាងសហគ្រាស សរុបជាង៣០០នាក់។

ឯកឧត្តមបណ្ឌិត ទីង ស៊ីនី បានណែនាំដល់អង្គភាពដែលប្រើប្រាស់ឧបករណ៍មានហានិភ័យខ្ពស់ ត្រូវយកចិត្តទុកដាក់លើការត្រួតពិនិត្យឱ្យបានត្រឹមត្រូវ ហើយការចុះបញ្ជីប្រើប្រាស់ឧបករណ៍ ត្រូវឆ្លងកាត់ការត្រួតពិនិត្យជាចាំបាច់ ដើម្បីធានាសុវត្ថិភាព។
ជាមួយគ្នានេះ លោក ចុង ប៊ូ ប្រធាននាយកដ្ឋានបច្ចេកទេស និងសុវត្ថិភាពឧស្សាហកម្ម បានបកស្រាយអំពីច្បាប់ស្តីពីការគ្រប់គ្រងឧស្សាហកម្ម បទដ្ឋានប្រតិបត្តិ ការថែទាំប្រចាំថ្ងៃ និងនីតិវិធីស្នើសុំវិញ្ញាបនបត្រសុវត្ថិភាព ដោយបញ្ជាក់ថា លទ្ធផលត្រួតពិនិត្យ គឺជាមូលដ្ឋានសំខាន់សម្រាប់ការទទួលបានវិញ្ញាបនបត្រសុវត្ថិភាព។

លោក He Jingwei ទីប្រឹក្សានៃមជ្ឈមណ្ឌល បានបង្ហាញអំពីបេសកកម្ម និងដំណើរការត្រួតពិនិត្យឧបករណ៍មានហានិភ័យខ្ពស់ ចាប់ពីការវាយតម្លៃ ការអនុញ្ញាតផលិត ការត្រួតពិនិត្យតាមដាន ការដំឡើង កែច្នៃ ជួសជុល រហូតដល់ការត្រួតពិនិត្យតាមកាលកំណត់ ព្រមទាំងបង្ហាញពីសេវាកម្ម គ្រូបណ្តុះបណ្តាលជំនាញ និងទីតាំងហ្វឹកហាត់ជាក់ស្តែងរបស់មជ្ឈមណ្ឌល។

តំណាងស្ថាប័នពាក់ព័ន្ធ និងសហគ្រាសដែលបានចូលរួម បានសម្តែងការគាំទ្រ និងប្តេជ្ញានាំយកចំណេះដឹងពីសិក្ខាសាលាទៅអនុវត្តនៅតាមរោងចក្រ និងតំបន់ឧស្សាហកម្មរៀងៗខ្លួន ដើម្បីពង្រឹងកិច្ចសហការជាមួយមជ្ឈមណ្ឌល ក្នុងការធានាសុវត្ថិភាព ឧបករណ៍មានហានិភ័យខ្ពស់ និងរួមចំណែកដល់ការអភិវឌ្ឍវិស័យឧស្សាហកម្មកម្ពុជា ប្រកបដោយគុណភាព និងសុវត្ថិភាព៕

ដោយ៖ ប៊ុនរិទ្ធ