AKP អង់ការ៉ា, ប្រទេសតួកគី ថ្ងៃទី១៧ ខែកញ្ញា ឆ្នាំ២០២៦ -- ដើម្បីត្រៀមខ្លួនឆ្លើយតបនឹងស្ថានភាពអាសន្ន និងគ្រោះថ្នាក់ដែលមើលមិនឃើញ ក្រុមអ្នកសារព័ត៌មានកម្ពុជា និងអ្នកសារព័ត៌មានអន្តរជាតិចំនួន ២៥រូប ដែលបាននិងកំពុងចូលរួមកម្មវិធីបណ្តុះបណ្តាល «សារព័ត៌មាននៅសមរភូមិ» លើកទី៣០ នៅទីក្រុងអង់ការ៉ា ប្រទេសតួកគី បានចូលរួមរៀន និងដកបទពិសោធន៍ក្នុងវគ្គហ្វឹកហ្វឺនពិសេសមួយ ពាក់ព័ន្ធនឹងបច្ចេកទេសការពារខ្លួន និងសុវត្ថិភាពនៅក្នុងហេតុការណ៍មានការបំផ្ទុះគ្រាប់បែកផ្សែង និងការបាញ់ទឹកបំបែកហ្វូងក្រុមបាតុករ ឬក្រុមអ្នកតវ៉ា កាលពីរសៀលថ្ងៃទី១៦ ខែកញ្ញា ឆ្នាំ២០២៦ ។

សម្រាប់វគ្គបណ្តុះបណ្តាលនេះមិនត្រឹមតែផ្តោតលើទ្រឹស្តីនោះទេ ប៉ុន្តែបានតម្រូវឱ្យអ្នកសារព័ត៌មានទាំងអស់ចុះអនុវត្តន៍ និងពិសោធន៍ជាក់ស្តែងនៅទីវាល ដើម្បីប្រឈមមុខនឹងស្ថានភាពគ្រោះថ្នាក់ដូចជា ការគេចខ្លួន និងទប់ទល់នឹងគ្រាប់បែកផ្សែង ដោយអ្នករាយការណ៍ព័ត៌មានត្រូវបានពង្រឹងជំនាញក្នុងការប្រើប្រាស់ស្រោមមុខការពារឧស្ម័នពុល (Gas Masks) ការសង្កេតទិសដៅខ្យល់ដើម្បីគេចចេញពីតំបន់គ្របដណ្តប់ដោយផ្សែងពុល ឬផ្សែងបង្ហៀរទឹកភ្នែក និងវិធីសាស្ត្រសង្គ្រោះបឋមសម្រាប់សមរភូមិ។ ការតតាំងនឹងកម្លាំងទឹកបាញ់សម្ពាធខ្លាំង ដោយសិក្ខាកាមបានរៀនពីបច្ចេកទេសរក្សាលំនឹងរាងកាយ និងការស្វែងរកជម្រកបាំងខ្លួនបានរហ័ស ដើម្បីចៀសវាងការប៉ះទង្គិច ឬរងរបួសដោយសារសម្ពាធទឹក។

អ្នកសារព័ត៌មានដែលបានឆ្លងកាត់ការពិសោធន៍ទីវាលនេះ បានលើកឡើងថា ការអនុវត្តទល់មុខនឹងហេតុការណ៍ចាត់តាំងបែបនេះ បានផ្តល់នូវបទពិសោធន៍ពិតៗ ជួយកាត់បន្ថយភាពតក់ស្លុត និងបង្កើនភាពជឿជាក់ក្នុងការសម្រេចចិត្តភ្លាមៗនៅពេលចុះយកព័ត៌មានក្នុងតំបន់មានជម្លោះ ឬបាតុកម្មហិង្សា។

សូមជម្រាបជូនថា វគ្គហ្វឹកហ្វឺននេះ បានបញ្ចប់ទៅដោយជោគជ័យ ដោយបានបន្សល់នូវចំណេះដឹង និងបច្ចេកទេសសំខាន់ៗជាច្រើន ដើម្បីធានាថា អ្នកសារព័ត៌មានអាចបន្តបេសកកម្មនាំយកព័ត៌មានពិតជូនសាធារណជន ដោយសុវត្ថិភាពខ្ពស់បំផុត៕

ដោយ៖ យា ចិន្តាខន្តី (រូបថត៖ AA)