AKP ភ្នំពេញ ថ្ងៃទី១៤ ខែកញ្ញា ឆ្នាំ២០២៦--លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា បានអនុញ្ញាតឱ្យប្រតិភូនិស្សិតឆ្មបនៃកាកបាទក្រហមជប៉ុនចំនួន៧នាក់ ដឹកនាំដោយ លោកស្រី តាហារ៉ា សាសាហ្គាវ៉ា អិមី Madam TAHARA (SASAGAWA) Emi សាស្ត្រាចារ្យ នៃមហាវិទ្យាល័យពេទ្យកាកបាទក្រហមជប៉ុន ចូលជួបសម្តែងការគួរសម និងស្វែងយល់ពីការងារមនុស្សធម៌ នៅទីស្នាក់ការកណ្តាលកាកបាទក្រហមកម្ពុជា នាព្រឹកថ្ងៃចន្ទទី១៤ ខែកញ្ញា ឆ្នាំ២០២៦ នេះ។

ដំណើរទស្សនកិច្ចរបស់និស្សិតឆ្មបនៃកាកបាទក្រហមជប៉ុនខាងលើ មកកាន់ប្រទេសកម្ពុជា ចាប់ពីថ្ងៃទី១៣ ដល់ថ្ងៃទី២០ ខែកញ្ញា ឆ្នាំ២០២៦ ក្នុងគោលបំណងចូលជួបសម្តែងការគួរសម និងទស្សនកិច្ចនៅទីស្នាក់ការកណ្តាលកាកបាទក្រហមកម្ពុជា ព្រមទាំងទស្សនកិច្ចនៅមជ្ឈមណ្ឌលកុមារកំព្រាបុរីទារក និងកុមារជាតិ ដើម្បីឆ្លើយតបនឹងបរិបទនៃកម្មវិធីសិក្សារបស់ពួកគេស្តីពីសុខភាពសាធារណៈ និងការថែទាំវេជ្ជសាស្ត្រ។

លោកជំទាវអគ្គលេខាធិការ បានសម្តែងក្តីសោមនស្សរីករាយ និងស្វាគមន៍យ៉ាងកក់ក្តៅជាមួយនឹងការផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា។ លោកជំទាវបញ្ជាក់ថា គិតមកដល់ពេលនេះមាននិស្សិតពេទ្យនៃកាកបាទក្រហមជប៉ុនបានមកទស្សនកិច្ចនៅកាកបាទក្រហមកម្ពុជា ចំនួន ២៩៩នាក់ហើយ។ សូមអ្នកទាំងអស់គ្នាទុកយើងជាបងប្អូន កាកក្រហមជប៉ុននិងកាកបាទក្រហមកម្ពុជា ស្មើនឹងបងប្អូន។

លោកជំទាវជម្រាបជូនប្រតិភូថា ៖បច្ចុប្បន្ននេះ កាកបាទក្រហមកម្ពុជា ក្រោមម្លប់គង់ប្រថាប់ដ៏ឧត្តុង្គឧត្តម របស់សម្តេចព្រះមហាក្សត្រី ព្រះវររាជមាតាជាតិខ្មែរ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែនជាប្រធាន និងលោកជំទាវបណ្ឌិតស្ត្រីទី១ ជាអនុប្រធានអចិន្ត្រៃយ៍។ លោកជំទាវបានជម្រាបពីតួនាទីនិងរចនាសម្ព័ន្ធរបស់កាកបាទក្រហមកម្ពុជា ពីថ្នាក់កណ្តាលរហូតដល់អនុសាខា ជាមួយគ្នានេះយើងមានបណ្តាញចំនួន២គឺអ្នកស្ម័គ្រចិត្ត មាននៅតាមភូមិ ហើយបណ្តាញមួយទៀតគឺយុវជន មាននៅតាមសាលារៀន និងក្នុងគ្រឹះស្ថានសិក្សា ហើយបណ្តាញនីមួយៗមានរាប់ម៉ឺននាក់។

វិស័យអាទិភាពចំនួន៤ស្របតាមទិសយុទ្ធសាស្ត្រ ២០២១-២០៣០ របស់កាកបាទក្រហមកម្ពុជា ក្នុងនោះរួមមាន ៖
១.ការងារគ្រប់គ្រងគ្រោះមហន្តរាយនិងវិបត្តិភ័យ
២-ការងារសុខភាពនិងការថែទាំសុខភាពសហគមន៍
៣-ការលើកកម្ពស់គោលការណ៍គ្រឹះនិងតម្លៃមនុស្សធម៌ និងទី
៤.ការអភិវឌ្ឍស្ថាបន។ សកម្មភាពសំខាន់ៗក្នុងការឆ្លើយតបគ្រោះមហន្តរាយ ការអប់រំសុខភាពតាមសហគមន៍ វិជ្ជាសង្គ្រោះបឋម និងអនាម័យទឹកស្អាត ពិសេសផ្តោតលើការអប់រំសុខភាពល្អផ្លូវចិត្តជូនដល់ស្ត្រីមានផ្ទៃពោះនៅតាមមណ្ឌលភៀសសឹក ព្រមទាំងការអប់រំផ្សព្វផ្សាយអំពីជំងឺមិនឆ្លង និងជំងឺឆ្លងជាដើម៕

ដោយ៖ ពេជ្រ សំអឿន(ប្រភព៖កាកបាទក្រហមកម្ពុជា)