AKP ភ្នំពេញ ថ្ងៃទី១១ ខែកញ្ញា ឆ្នាំ២០២៦ -- សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានចាត់ទុកឯកឧត្ដមប្រធានាធិបតីមីយ៉ាន់ម៉ា ដែលបានអញ្ជើញមកទស្សនកិច្ចនៅកម្ពុជា នាពេលនេះគឺជាផ្នែកដ៏សំខាន់មួយក្នុងការជំរុញនូវទំនាក់ទំនងមិត្ដភាពរវាងកម្ពុជា និងមីយ៉ាន់ម៉ា ឱ្យកាន់តែរឹងមាំបន្ថែមទៀត។ នេះបើយោងតាមការបញ្ជាក់របស់ឯកឧត្ដម ជា ធីរិទ្ធ អ្នកនាំពាក្យព្រឹទ្ធសភា ក្នុងសន្និសីទសារព័ត៌មាន ស្ដីពី លទ្ធផលជំនួបកំពូលរវាង សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា និងឯកឧត្តម មីន អោង ឡាំង ប្រធានាធិបតីនៃសាធារណរដ្ឋសហភាពមីយ៉ាន់ម៉ា ដែលបានធ្វើឡើងនារសៀលថ្ងៃទី១១ ខែកញ្ញា ឆ្នាំ២០២៦ នៅវិមានសាមគ្គីភាព នៃព្រឹទ្ធសភា។

ឯកឧត្ដម ជា ធីរិទ្ធ បានលើកឡើងថា ក្នុងជំនួបនោះ សម្ដេចតេជោ ហ៊ុន សែន និងឯកឧត្តម មីន អោង ឡាំង បានជជែកពិភាក្សាទ្វេភាគីរវាងកម្ពុជា និងមីយ៉ាន់ម៉ា និងចែករំលែកនូវទស្សនៈទាក់ទងនឹងបញ្ហាក្នុងតំបន់មួយចំនួនផងដែរ។ ក្នុងក្របខ័ណ្ឌទ្វេភាគី សម្ដេចតេជោប្រមុខរដ្ឋស្ដីទីក៏បានរម្លឹកអំពីទំនាក់ទំនងរវាងប្រទេសទាំងពីរដែលមានរយៈពេល ៧ ទសវត្សរ៍កន្លងមក ហើយប្រទេសទាំងពីរបានចាប់ផ្ដើមការទូតជាមួយគ្នាក្នុងឆ្នាំ១៩៥៥ ។ សម្ដេចតេជោបានថ្លែងបញ្ជាក់ផងដែរថា កាលពីឆ្នាំ២០២៥ កន្លងទៅ ប្រទេសទាំងពីរបានរៀបចំប្រារព្ធខួប៧០ឆ្នាំ នៃទំនាក់ទំនងការទូតរវាងកម្ពុជា និងមីយ៉ាន់ម៉ា និងបានធ្វើសកម្មភាពផ្សេងជាច្រើនទៀត ដើម្បីរុញច្រាន និងពង្រីកទំនាក់ទំនងការទូតរវាងប្រទេសទាំងពីរឱ្យកាន់តែរីកចម្រើន។

ជាមួយគ្នានេះ ឯកឧត្តម មីន អោង ឡាំង បានកោតសរសើរយ៉ាងខ្លាំងចំពោះវឌ្ឍនភាព និងការរីកចម្រើនរបស់កម្ពុជា ដែលបានធ្វើការអភិវឌ្ឍគួរឱ្យស្ងើចសរសើរ ហើយឯកឧត្ដមក៏បានធ្វើការប្រៀបធៀបកាលពីឆ្នាំ២០១៧ ខណៈពេលដែលឯកឧត្ដមបានអញ្ជើញមកទស្សនកិច្ចនៅកម្ពុជា ហើយក៏បានឃើញនូវសមិទ្ធផលដែលបានធ្វើការអភិវឌ្ឍនៅរាជធានីភ្នំពេញនាពេលនេះ គឺគួរឱ្យអស្ចារ្យបំផុត។ ឯកឧត្ដមប្រធានាធិបតីបានលើកឡើង និងផ្លាស់ប្ដូរយោបល់ជាមួយសម្ដេចតេជោក្នុងការពង្រឹង និងពង្រីកទំនាក់ទំនងរវាងកម្ពុជា ជាមួយនឹងមីយ៉ាន់ម៉ា ឱ្យកាន់តែរីកចម្រើន ដោយផ្ដោតលើវិស័យនយោបាយ ពាណិជ្ជកម្ម ការវិនិយោគ វប្បធម៌ ប្រជាជន និងប្រជាជន និងវិស័យទេសចរណ៍ ដែលជំរុញឱ្យទំនាក់ទំនងរវាងកម្ពុជា និងមីយ៉ាន់ម៉ា កាន់តែរីកចម្រើនបន្ថែមទៀត។ ឯកឧត្ដមប្រធានាធិបតីបានបញ្ជាក់បន្ថែមថា ក្នុងក្របខ័ណ្ឌនីតិប្រតិបត្តិ និងនីតិប្បញ្ញត្ដិ ក៏ត្រូវដើរទន្ទឹមគ្នា ដើម្បីពូនជ្រុំទំនាក់ទំនងរវាងកម្ពុជា និងមីយ៉ាន់ម៉ា ឱ្យកាន់តែរីកចម្រើនថែមទៀត៕

ដោយ៖ រិទ្ធី