AKP ភ្នំពេញ ថ្ងៃទី១០ ខែកញ្ញា ឆ្នាំ២០២៦ -- ក្រសួងការពារជាតិកូរ៉េខាងត្បូង បាននិយាយកាលពីថ្ងៃពុធថា កូរ៉េខាងត្បូង និងកម្មវិធីអភិវឌ្ឍន៍របស់អង្គការសហប្រជាជាតិ (UNDP) បានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការបោសសម្អាតមីន ដែលជាផ្នែកមួយនៃការជំរុញកាន់តែទូលំទូលាយរបស់ទីក្រុងសេអ៊ូល ដើម្បីបង្កើនសុវត្ថិភាពសាធារណៈតាមរយៈស្តង់ដារសកលលោក។

ក្រសួងបានចុះហត្ថលេខាលើសេចក្តីថ្លែងការណ៍នៃចេតនា (SOI) ជាមួយកម្មវិធីអភិវឌ្ឍន៍របស់អង្គការសហប្រជាជាតិ កាលពីថ្ងៃមុន ដែលក្រោមកិច្ចព្រមព្រៀងនេះ ពួកគេនឹងចែករំលែកជំនាញ និងបទពិសោធន៍ប្រតិបត្តិការក្នុងការបោសសម្អាតមីន។ នេះបើយោងតាមសេចក្តីប្រកាសព័ត៌មានរបស់ក្រសួង។

ក្រសួងបាននិយាយថា សេចក្តីថ្លែងការណ៍ SOI ចុងក្រោយបំផុតនេះគឺជាជំហានដំបូងឆ្ពោះទៅមុខរបស់ប្រទេសកូរ៉េខាងត្បូងក្នុងការកសាងភាពជាដៃគូជាផ្លូវការជាមួយអង្គការអន្តរជាតិមួយ បន្ទាប់ពីការអនុម័តច្បាប់សកម្មភាពមីន និងផែនទីបង្ហាញផ្លូវគោលនយោបាយមីនរយៈពេលវែងរបស់ប្រទេសនេះ។

ទីក្រុងសេអ៊ូលបានផ្លាស់ប្តូរវិធីសាស្រ្តរបស់ខ្លួនចំពោះការបោសសម្អាតមីនពីប្រតិបត្តិការយោធាយ៉ាងតឹងរ៉ឹងទៅជាកិច្ចខិតខំប្រឹងប្រែងទូលំទូលាយជាងមុន ដែលផ្តោតលើសុវត្ថិភាពសាធារណៈ និងការស្តារដីធ្លីឡើងវិញ។

ដើម្បីគាំទ្រដល់ការការអនុវត្តនេះ ទីក្រុងសេអ៊ូលបានស្វែងរកភាពជាដៃគូកាន់តែខ្លាំងឡើងជាមួយស្ថាប័នអន្តរជាតិនានា ដូចជា UNDP ជាដើម ដែលកំណត់ស្តង់ដារសកម្មភាពមីនសកលលោក។

ក្រសួងបាននិយាយថា ភាគីទាំងពីរនឹងផ្លាស់ប្តូរចំណេះដឹង និងការអនុវត្តក្នុងសកម្មភាពមីន និងចូលរួមក្នុងកិច្ចសន្ទនាជាប្រចាំលើវិធានការអនុវត្ត។

ក្រសួងបានបន្ថែមថា ពួកគេក៏នឹងស្វែងយល់ពីវិធីដើម្បីចូលរួមក្នុងសិក្ខាសាលាអន្តរជាតិទាក់ទងនឹងគំនិតផ្តួចផ្តើមសកម្មភាពមីនជាសកលផងដែរ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)