AKP កំពង់ស្ពឺ ថ្ងៃទី៤ ខែកញ្ញា ឆ្នាំ២០២៦ -- ឯកឧត្តម ឧត្តមសេនីយ៍ទោ ប្រាក់ សុទ្ធ អគ្គនាយករង តំណាងឯកឧត្តម ឧត្តមសេនីយ៍ទោ សែម រតនា អគ្គនាយកស្តីទីមជ្ឈមណ្ឌលជាតិរក្សាសន្តិភាព នាព្រឹកថ្ងៃទី០៤ ខែកញ្ញា ឆ្នាំ២០២៦ អញ្ជើញចុះត្រួតពិនិត្យអគារស្នាក់នៅ និងអគារសិក្សានៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ (PKO) ក្នុងស្រុកភ្នំស្រួច ខេត្តកំពង់ស្ពឺ ដែលនឹងត្រូវដាក់ឱ្យដំណើរការនាពេលខាងមុខ ជាពិសេសត្រួតពិនិត្យដំណើរឆ្ពោះទៅកាន់ការបើកវគ្គហ្វឹកហ្វឺនគម្រោងត្រីភាគីអង្គការសហប្រជាជាតិ ឆ្នាំ២០២៦ ពីថ្ងៃទី០៥ ដល់ថ្ងៃទី៣០ ខែតុលា ឆ្នាំ២០២៦ និងថ្ងៃទី១០ ខែវិច្ឆិកា ដល់ថ្ងៃទី១៩ ខែធ្នូ ឆ្នាំ២០២៦។

បើតាមសាលាហ្វឹកហ្វឺនកងកម្លាំងរក្សាសន្តិភាពពហុជាតិ (PKO) បានឱ្យដឹងថា វគ្គហ្វឹកហ្វឺនគ្រប់គ្រងគម្រោងវិស្វកម្ម ដែលនឹងប្រព្រឹត្តទៅពីថ្ងៃទី០៥ ដល់ថ្ងៃទី៣០ ខែតុលា ឆ្នាំ២០២៦ ធ្វើឡើងក្នុងគោលបំណងផ្តល់ឱ្យនាយទាហានជំនាញវិស្វកម្មនៃបណ្តាប្រទេសបរិច្ចាគកងកម្លាំង (TCCs) នូវចំណេះដឹង និងជំនាញអនុវត្តជាក់ស្តែងលើការគ្រប់គ្រងគម្រោង ដើម្បីដើរតួនាទីយ៉ាងសំខាន់ក្នុងការគ្រប់គ្រងគម្រោង ឬការងារសាងសង់ផ្សេងៗក្នុងបេសកកម្មឱ្យមានប្រសិទ្ធភាព។ ដោយឡែក វគ្គហ្វឹកហ្វឺនគ្រឿងចក្រធុនធ្ងន់កម្រិតមធ្យម និងសង្គ្រោះបន្ទាន់លើទីលាន ដែលនឹងប្រព្រឹត្តទៅពីថ្ងៃទី១០ ខែវិច្ឆិកា ដល់ថ្ងៃទី១៩ ខែធ្នូ ឆ្នាំ២០២៦ នឹងផ្តល់ឱ្យសិក្ខាកាមជាតិ និងអន្តរជាតិនូវជំនាញប្រើប្រាស់គ្រឿងចក្រធុនធ្ងន់កម្រិតមធ្យមក្នុងការបញ្ជា និងការថែទាំគ្រឿងចក្រវិស្វកម្ម ដែលបម្រើក្នុងប្រតិបត្តិការកិច្ចការវិស្វកម្ម។

សាលាហ្វឹកហ្វឺនកងកម្លាំងរក្សាសន្តិភាពពហុជាតិ (PKO) បានគូសបញ្ជាក់ថា សិក្ខាកាមនឹងត្រូវបានបណ្តុះបណ្តាលការយល់ដឹងបន្ថែមពីការសង្គ្រោះបន្ទាន់លើទីលាន ដែលអាចនឹងជួបប្រទះក្នុងពេលប្រតិបត្តិការរក្សាសន្តិភាព វគ្គហ្វឹកហ្វឺននេះចែកចេញជា ៣វគ្គ គឺ៖ ១.វគ្គហ្វឹកហ្វឺនគ្រប់គ្រងគម្រោងវិស្វកម្ម ប្រព្រឹត្តទៅពីថ្ងៃទី០៥ ដល់ថ្ងៃទី៣០ ខែតុលា ឆ្នាំ២០២៦ ២.វគ្គគ្រូបណ្តុះបណ្តាលវិស្វកម្មគ្រឿងចក្រធុនធ្ងន់កម្រិតមធ្យមពីថ្ងៃទី១០ ខែវិច្ឆិកា ដល់ថ្ងៃទី១៩ ខែធ្នូ ឆ្នាំ២០២៦ និង ៣.វគ្គបណ្តុះបណ្តាលគ្រូបណ្តុះបណ្តាលជំនាញវេជ្ជសាស្ត្រសង្គ្រោះលើទីលាន ពីថ្ងៃទី១០ ខែវិច្ឆិកា ដល់ថ្ងៃទី១៩ ខែធ្នូ ឆ្នាំ២០២៦។

ក្នុងឱកាសនៃការអញ្ជើញចុះត្រួតពិនិត្យមើលអគារស្នាក់នៅ និងអគារសិក្សានៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ (PKO) នេះ ក្នុងនាម ឯកឧត្តម ឧត្តមសេនីយ៍ទោ សែម រតនា អគ្គនាយកស្តីទីមជ្ឈមណ្ឌលជាតិរក្សាសន្តិភាព ឯកឧត្តម ឧត្តមសេនីយ៍ទោ ប្រាក់ សុទ្ធ អគ្គនាយករងបានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ និងមន្ត្រីក្រោមឱវាទគ្រប់លំដាប់ថ្នាក់នៃសាលាហ្វឹកហ្វឺនកងកម្លាំងរក្សាសន្តិភាពពហុជាតិ (PKO) ក្នុងការរៀបចំ និងការប្រព្រឹត្តទៅបានយ៉ាងល្អប្រសើរទាំងលើហេដ្ឋារចនាសម្ព័ន្ធ និងការហ្វឹកហ្វឺនដល់កងកម្លាំងរក្សាសន្តិភាពពហុជាតិនាពេលកន្លងមក។

ឯកឧត្តមបានសង្កត់ធ្ងន់ថា នៅពេលខាងមុខនេះ នៅទីនេះនឹងត្រូវធ្វើជាម្ចាស់ផ្ទះទទួលរៀបចំបើកវគ្គហ្វឹកហ្វឺនគម្រោងត្រីភាគីអង្គការ សហប្រជាជាតិ ឆ្នាំ២០២៦ ពីថ្ងៃទី០៥ ដល់ថ្ងៃទី៣០ ខែតុលា ឆ្នាំ២០២៦ និងថ្ងៃទី១០ ខែវិច្ឆិកា ដល់ថ្ងៃទី១៩ ខែធ្នូ ឆ្នាំ២០២៦ ដែលនឹងមានការចូលរួមពីភាគីអង្គការសហប្រជាជាតិ បណ្តាប្រទេសដៃគូពាក់ព័ន្ធក្នុងការបណ្តុះបណ្តាល រួមនឹងសិក្ខាកាមជាកងកម្លាំងរក្សាសន្តិភាពមកពីបណ្តាប្រទេសមួយចំនួន ដែលទាមទារឱ្យសាលាហ្វឹកហ្វឺនកងកម្លាំងរក្សាសន្តិភាពពហុជាតិ (PKO) នេះត្រៀមលក្ខណៈសម្បត្តិឱ្យបានគ្រប់គ្រាន់ ដើម្បីធ្វើឱ្យវគ្គហ្វឹកហ្វឺនទទួលបានជោគជ័យតាមការគ្រោងទុក៕

ដោយ៖ ចាន់ សុភឿន