AKP ភ្នំពេញ ថ្ងៃទី២ ខែកញ្ញា ឆ្នាំ២០២៦--សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រកាសផ្តល់អាហារូបករណ៍ដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត) ចំនួន ៤.៦៥០ កន្លែង សម្រាប់ថ្នាក់បរិញ្ញាបត្ររង ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ ឆ្នាំសិក្សា២០២៦-២០២៧ ដោយឆ្លងកាត់ការប្រឡង និងមិនឆ្លងកាត់ការប្រឡង។

ការប្រកាសផ្ដល់អាហារូបករណ៍ របស់សម្តេចធិបតី ហ៊ុន ម៉ាណែត និងលោកជំទាវបណ្ឌិត បន្ទាប់ពី ក្រសួងអប់រំ យុវជន និងកីឡា នៅព្រឹកថ្ងៃទី២ កញ្ញានេះ ប្រកាសលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ ជាផ្លូវការនូវលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ ដោយបានឱ្យដឹងថា មានបេក្ខជនប្រឡងជាប់សរុបចំនួន ១២៥ ៩៧៥នាក់ ត្រូវជា ៨៤.០៦% នៃបេក្ខជនប្រឡងសរុបនៅទូទាំងប្រទេស។

ក្រសួងអប់រំ យុវជន និងកីឡា ក៏បានឱ្យដឹងដែរថា ក្នុងចំណោមបេក្ខជនដែលប្រឡងជាប់ទាំងចំនួន ១២៥ ៩៧៥នាក់នេះ ក្នុងនោះមានអ្នកដែលទទួលបាននិទ្ទេស A មានចំនួន ២ ០២២នាក់ និទ្ទេស B ចំនួន ៨ ៨៤៨នាក់ និទ្ទេស C ចំនួន ២៣ ៤២២ នាក់ និទ្ទេស D ចំនួន ៤៤ ៨៦៩នាក់ និងនិទ្ទេស E ចំនួន ៤៦ ៨១៤នាក់។

តាមទំព័រហ្វេសប៊ុកផ្លូវការរបស់ក្រសួងអប់រំ យុវជន និងកីឡា បានបញ្ជាក់ថា ចំពោះលទ្ធផលនៃការប្រ​ឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ ក្រសួងប្រកាសផ្សាយតែបញ្ជីរាយនាមបេក្ខជនដែលជាប់តែប៉ុណ្ណោះ បេក្ខជនមិនមានឈ្មោះក្នុងបញ្ជី គឺមានន័យថាធ្លាក់៕

ដោយ៖ គង់ សិរីរ័ត្ន