AKPកំពង់ចាមថ្ងៃទី ២៥ សីហាឆ្នាំ២០២៦--ឯកឧត្តម ប៉ែន ផល្លីកា អនុរដ្ឋលេខាធិ ការក្រសួងកសិកម្ម រុក្ខាប្រមាញ់ និងនេសាទនៅថ្ងៃទី២៤ ខែសីហា ឆ្នាំ២០២៦  បានដឹកនាំក្រុមការងារកម្លាំងជំនាញផ្នែកជលផលរួមមាន ខណ្ឌរដ្ឋបាលជលផលខេត្តកំពង់ចាម នាយកដ្ឋានអធិការកិច្ចជលផល អធិការដ្ឋានរដ្ឋបាលជលផលមេគង្គ  គម្រោងអច្ឆរិយភាពនៃទន្លេមេគង្គ អាជ្ញាធរស្រុកកងមាស និងកម្លាំងប៉ុស្តិ៍នគរបាលរដ្ឋបាលស្តៅ ក្រោមការសម្របសម្រួលពីឯកឧត្តម ព្រះរាជអាជ្ញានៃអយ្យការអមសាលាដំបូងខេត្តកំពង់ចាមបានចុះប្រតិបត្តិការត្រួតពិនិត្យ និងបង្រ្កាបបទល្មើសជលផលនៅក្នុងភូមិសាស្ត្រស្រុកកងមាស ខេត្តកំពង់ចាម។ 

ជាលទ្ធផលក្នុងកិច្ចប្រតិបត្តិការត្រួតពិនិត្យ និងបង្រ្កាបបទល្មើសជលផល ក្រុមការងារកម្លាំងជំនាញ បង្ក្រាបបានចំនួន ៥ករណី ក្នុងឃុំរាយប៉ាយនៅចំណុចអ្នកតាប៉ោត ចំណុចបឹងឈ្នាង ចំណុចបឹងដំរីឆ្លង ចំណុចចុងព្រែកខ្លាក្រទៀម ដោយរុះរើបំផ្លាញ ចោលនូវឧបករណ៍ខុសច្បាប់ នៅនឹងកន្លែងរួមមាន ឧបករណ៍ស្បៃមុងចំនួន ៣៧មាត់ របាំងស្បៃមុង៣ ០៥០ម៉ែត្រ ឧបករណ៍សាច់អួនលើសប្រវែង៤មាត់ របាំង៥៥០ម៉ែត្រ ចម្រឹង/បង្គោលចំនួន៧២០ដើម និងបានចាក់លែងកូនត្រីចម្រុះចូលបឹងធម្មជាតិវិញប្រមាណ១៧៥គីឡូក្រាម៕

ដោយ ៖ឆាយ ម៉ុត