AKP ភ្នំពេញ ថ្ងៃទី២៤ ខែសីហា ឆ្នាំ២០២៦--បន្ទាប់ពីគ្រូបង្គោលទទួលបានការបណ្តុះបណ្តាល និងដាក់ឱ្យអនុវត្តជាផ្លូវការនូវកម្មវិធីអប់រំ "ការគិតបែបកុំព្យូទ័រ (CoolThink@JC)" នៅតាមសាលាបឋមសិក្សាគោលដៅកន្លងមក សន្ទុះនៃការបង្រៀនសិស្សានុសិស្សនៅតាមបណ្ដាសាលាបឋមសិក្សាគោលដៅកាន់តែមានភាពផុសផុល និងពោរពេញដោយភាពស្វាហាប់។

ជាក់ស្តែង តាមរយៈការបញ្ចូលកម្មវិធីអប់រំនេះទៅក្នុងម៉ោងសិក្សាកុំព្យូទ័រជាផ្លូវការនៅកម្រិតបឋមសិក្សា សង្កេតឃើញទិដ្ឋភាពថ្នាក់រៀនមានភាពរស់រវើក ដែលប្អូនៗសិស្សានុសិស្សកំពុងរៀន និងអនុវត្តដោយផ្ទាល់យ៉ាងសប្បាយរីករាយ។ ពួកគេបានបង្ហាញពីស្មារតីសហការគ្នាយ៉ាងជិតស្និទ្ធ និងការចែករំលែកគំនិតគ្នាទៅវិញទៅមកក្នុងការអនុវត្តសរសេរកូដបញ្ជា ដើម្បីបង្កើតគំនូរជីវចល និងតួអង្គផ្សេងៗដោយផ្ទាល់ដៃបានយ៉ាងស្ទាត់ជំនាញ។

ក្រសួងអប់រំ យុវជន និងកីឡា បានគូសបញ្ជាក់ថា សកម្មភាពនេះ មិនត្រឹមតែជាការអនុវត្តមេរៀនបច្ចេកវិទ្យាឱ្យចេញជារូបរាងប៉ុណ្ណោះទេ តែវាគឺជាការចាក់ឫសយ៉ាងរឹងមាំនូវ "វប្បធម៌នៃការបង្កើតថ្មី" និងការបណ្ដុះបំណិនសតវត្សទី២១ តាំងពីវ័យក្មេង។ កុមារបាន និងកំពុងបន្តវិវឌ្ឍខ្លួនពីអ្នករៀនធម្មតា ទៅជាអ្នកចេះដោះស្រាយបញ្ហាប្រកបដោយភាពច្នៃប្រឌិត ដែលនេះគឺជាសក្ខីភាពបញ្ជាក់ពីភាពជោគជ័យ និងនិរន្តរភាពនៃការកសាងធនធានមនុស្សឌីជីថល ស្របតាមយុទ្ធសាស្ត្ររបស់ក្រសួងអប់រំ យុវជន និងកីឡា និងយុទ្ធសាស្ត្របញ្ចកោណដំណាក់កាលទី១ មុំទី៥ (បច្ចេកវិទ្យា) របស់រាជរដ្ឋាភិបាល៕

ដោយ ចាន់ សុភឿន (ប្រភព៖ ក្រសួងអប់រំ)