AKP ភ្នំពេញ ថ្ងៃទី២១ ខែសីហា ឆ្នាំ២០២៦ -- ប្រធានាធិបតីសហរដ្ឋអាមេរិកលោក ដូណាល់ ត្រាំ បាននិយាយកាលពីពេលថ្មីៗនេះថា លោកនឹងជួបជាមួយមេដឹកនាំកូរ៉េខាងជើង លោក គីម ជុងអ៊ុន នៅចុងឆ្នាំនេះ ខណៈដែលលោកបានកត់សម្គាល់ថា ទីក្រុងព្យុងយ៉ាងមានអាវុធនុយក្លេអ៊ែរ «ដ៏មានអានុភាពខ្លាំង» ចំនួន៥៧ ដោយនេះជាលើកដំបូងដែលលោកបានលើកឡើងពីតួលេខជាក់លាក់មួយសម្រាប់ឃ្លាំងអាវុធនុយក្លេអ៊ែររបស់របបដ៏រឹងរូសមួយនេះ។

លោក ត្រាំ បានធ្វើការកត់សម្គាល់នេះក្នុងអំឡុងពេលធ្វើសន្និសីទសារព័ត៌មានមួយនៅសេតវិមាន នៅមួយថ្ងៃបន្ទាប់ពីសារព័ត៌មាន The Wall Street Journal បានរាយការណ៍ថា លោកកំពុងជំរុញជំនួយការរបស់លោកសម្រាប់កិច្ចប្រជុំជាមួយលោក គីម ដែលអាចកើតឡើងក្នុងអំឡុងពេលដំណើរទស្សនកិច្ចលើកក្រោយរបស់លោកទៅកាន់ទ្វីបអាស៊ី ដែលទំនងជាចូលរួមកិច្ចប្រជុំកំពូលសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក ដែលគ្រោងនឹងធ្វើឡើងនៅទីក្រុងសិនជិនរបស់ប្រទេសចិននៅក្នុងខែវិច្ឆិកា។

លោក ត្រាំ បានប្រាប់អ្នកសារព័ត៌មានថា «បាទ ខ្ញុំនឹងទៅ»។ នៅពេលសួរថា តើលោករំពឹងថានឹងជួបជាមួយលោក គីម នៅចុងឆ្នាំនេះឬទេ លោកមិនបានពន្យល់លម្អិតអំពីផែនការរបស់លោកក្នុងការភ្ជាប់ទំនាក់ទំនងជាមួយលោក គីម ឡើងវិញនោះទេ។

នៅពេលសួរថា តើលោកកំពុងផ្លាស់ប្តូរលិខិតជាលាយលក្ខណ៍អក្សរជាមួយលោក គីមឬទេ? លោក ត្រាំ បាននិយាយថា «ខ្ញុំមិនអាចប្រាប់អ្នកពីរឿងនោះទេ»។

នៅក្នុងសន្និសីទសារព័ត៌មានដាច់ដោយឡែកមួយនៅពេលក្រោយលោក ត្រាំ បានបដិសេធមិនឆ្លើយសំណួរអំពីថា តើគោលដៅរបស់លោកក្នុងការចូលរួមជាមួយលោក គីម ឡើងវិញ នៅតែជាការរំសាយអាវុធនុយក្លេអ៊ែររបស់កូរ៉េខាងជើងដែរឬទេ? ដោយបង្កើនការព្រួយបារម្ភថារដ្ឋបាលរបស់លោកអាចផ្លាស់ប្តូរការផ្តោតអារម្មណ៍គោលនយោបាយរបស់ខ្លួនឆ្ពោះទៅរកគោលដៅក្រៅពីការរំសាយអាវុធនុយក្លេអ៊ែរ ដូចជាការកាត់បន្ថយភាពតានតឹង និងការគ្រប់គ្រងហានិភ័យ។ រដ្ឋបាលលោក ត្រាំពីមុនបានបញ្ជាក់ពីការប្តេជ្ញាចិត្តរបស់ខ្លួនចំពោះការរំសាយអាវុធនុយក្លេអ៊ែរទាំងស្រុងរបស់កូរ៉េខាងជើង។

លោក ត្រាំ បាននិយាយថា «ខ្ញុំមិនចង់និយាយអំពីរឿងនោះទេ ប៉ុន្តែខ្ញុំមានទំនាក់ទំនងល្អជាមួយលោក គីម ជុងអ៊ុន ដូចដែលអ្នកបានដឹង និងបានឃើញហើយ។ គាត់មិនចូលចិត្ត (លោក ចូ) បៃដិន ទេ។ គាត់មិនចូលចិត្ត(លោក បារ៉ាក់) អូបាម៉ា ទេ។ គាត់មិនចូលចិត្តនរណាម្នាក់ទេ ប៉ុន្តែគាត់ចូលចិត្តខ្ញុំ»។​

ការកត់សម្គាល់របស់លោក ត្រាំ នេះ បានកើតឡើងចំពេលដែលមានការរំពឹងទុកថា លោកអាចនឹងស្វែងរកការស្តារឡើងវិញនូវការទូតផ្ទាល់ខ្លួនរបស់លោកជាមួយលោក គីម ដែលនាំឱ្យមានកិច្ចប្រជុំទ្វេភាគីចំនួនបីលើកក្នុងអាណត្តិដំបូងរបស់លោក ដោយលើកទីមួយនៅក្នុងខែមិថុនាឆ្នាំ២០១៨ នៅប្រទេសសិង្ហបុរី លើកទីពីរនៅទីក្រុងហាណូយ ក្នុងខែកុម្ភៈឆ្នាំ២០១៩ និងលើកចុងក្រោយនៅភូមិព្រំដែនអន្តរកូរ៉េប៉ាន់មុនជុម ក្នុងខែមិថុនា ឆ្នាំ២០១៩។

ការរំពឹងទុកនេះត្រូវបានពង្រឹងបន្ថែមទៀតដោយបទបញ្ជាថ្មីៗរបស់លោក ត្រាំ ដើម្បីកាត់បន្ថយសមយុទ្ធយោធាកូរ៉េខាងត្បូង-សហរដ្ឋអាមេរិកដែលជាចលនាមួយដែលត្រូវបានគេមើលឃើញថា ជាកាយវិការផ្សះផ្សាចំពោះកូរ៉េខាងជើង។ ទីក្រុងព្យុងយ៉ាងបានរិះគន់ជាយូរមកហើយចំពោះសមយុទ្ធសម្ព័ន្ធមិត្តនេះថា ជាការហាត់សមសម្រាប់សង្គ្រាមប្រឆាំងនឹងខ្លួន៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)