AKP ភ្នំពេញ៖ ថ្ងៃទី១៨ ខែសីហា ឆ្នាំ២០២៦-- ឯកឧត្តម លី ធុជ បានជំរុញឱ្យរដ្ឋបាលក្រុងបាវិត និងកងកម្លាំងមានសមត្ថកិច្ច បន្តពង្រឹងការទប់ស្កាត់ បង្ក្រាប និងលុបបំបាត់បទល្មើសឆបោកតាមប្រព័ន្ធបច្ចេកវិទ្យា (Online Scams) ឱ្យបានម៉ឺងម៉ាត់ និងមានប្រសិទ្ធភាព ដើម្បីធានាសន្តិសុខ សុវត្ថិភាព សណ្តាប់ធ្នាប់សាធារណៈ និងបង្កើតបរិយាកាសអំណោយផលដល់ការរស់នៅ ការធ្វើអាជីវកម្ម និងការវិនិយោគនៅក្រុងបាវិត។

ការលើកឡើងនេះ ត្រូវបានធ្វើឡើងក្នុងឱកាសដែល ឯកឧត្តម លី ធុជ ជាសមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានក្រុងបាវិត ខេត្តស្វាយរៀង បានដឹកនាំកិច្ចប្រជុំត្រួតពិនិត្យវឌ្ឍនភាពនៃការអនុវត្តន៍ផែនការរួម ឆ្ពោះទៅរកការបោះឆ្នោតជ្រើសរើសក្រុមប្រឹក្សាសង្កាត់ អាណត្តិទី៦ ឆ្នាំ២០២៧ ព្រមទាំងចែកប័ណ្ណសម្គាល់សមាជិកគណបក្សប្រជាជនកម្ពុជា  កាលពីថ្ងៃទី១៨ ខែសីហា ឆ្នាំ២០២៦ ។

ក្នុងឱកាសនោះ ឯកឧត្តមបណ្ឌិត លី ធុជ បានអរគុណ ចំពោះរដ្ឋបាលក្រុងបាវិត និងកងកម្លាំងមានសមត្ថកិច្ច ដែលបានខិតខំប្រឹងប្រែងបំពេញភារកិច្ចយ៉ាង មាន ប្រសិទ្ធភាព ក្នុងការទប់ស្កាត់ និងបង្ក្រាបបទល្មើសនានា ជាពិសេសបទល្មើស Online Scams នៅក្នុងមូលដ្ឋាន ៕

ដោយ សួស សំរិត