AKP ភ្នំពេញ ថ្ងៃទី១៨ ខែសីហា ឆ្នាំ២០២៦--ក្រសួងផែនការបានរៀបចំ«ពិធីប្រគល់សញ្ញាបត្របរិញ្ញាបត្រជាន់ខ្ពស់ជូនដល់និស្សិតសាលាជាតិផែនការ និងស្ថិតិ នៃក្រសួងផែនការ» ក្រោមអធិបតីភាព ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ នាព្រឹកថ្ងៃទី១៨ ខែសីហា ឆ្នាំ២០២៦។ សមាសភាពចូលរួមមាន ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ឯកឧត្តមប្រធាន អនុប្រធាន សមាជិក ក្រុមប្រឹក្សាសាលាផែនការនិងស្ថិតិ ឯកឧត្តម លោកជំទាវ លោក លោកស្រី ជាគណៈគ្រប់គ្រង សាស្ត្រាចារ្យ បុគ្គលិក ព្រមទាំងមាតាបិតា អាណាព្យាបាល និងនិស្សិតជ័យលាភី សរុបចំនួនប្រមាណជា៤៥០នាក់។ ឯកឧត្តមរដ្ឋមន្ត្រីបានសម្តែងនូវសេចក្តីសោមនស្សរីករាយក្រៃលែង និងបានចូលរួមអបអរសាទរដល់និស្សិតជ័យលាភីទាំងអស់ដែលបានបញ្ចប់ការសិក្សា ព្រមទាំងក្រុមគ្រួសារ និងអាណាព្យាបាលរបស់និស្សិត។

ឯកឧត្តមរដ្ឋមន្ត្រីបានមានប្រសាសន៍ថា ការខិតខំប្រឹងប្រែង និងការឧស្សាហ៍ព្យាយាមរបស់និស្សិតរហូតទទួលបានជ័យលាភីនេះ បានបង្ហាញពីសមត្ថភាព និងស្មារតីទទួលខុសត្រូវ ដែលជាមូលដ្ឋានគ្រឹះដ៏សំខាន់សម្រាប់កសាងសមត្ថភាពផ្ទាល់ខ្លួន និងស្ថាប័ន ព្រមទាំងជាគំរូដ៏ល្អសម្រាប់អ្នកជំនាន់ក្រោយ។
ឯកឧត្តមរដ្ឋមន្ត្រីកោតសរសើរ និងវាយតម្លៃខ្ពស់ចំពោះក្រុមប្រឹក្សាភិបាល គណៈគ្រប់គ្រង សាស្ត្រាចារ្យ បុគ្គលិក និងដៃគូពាក់ព័ន្ធទាំងអស់របស់សាលាជាតិផែនការ និងស្ថិតិនៃក្រសួងផែនការ ដែលបានខិតខំប្រឹងប្រែងអស់ពីសមត្ថភាព និងប្រកបដោយស្មារតីទទួលខុសត្រូវខ្ពស់ ក្នុងការបណ្តុះបណ្តាលធនធានមនុស្សលើជំនាញផែនការ ស្ថិតិ និងប្រជាសាស្ត្រ។

យោងតាមរបាយការណ៍របស់ ឯកឧត្តមបណ្ឌិត ទ្រី សុធារិទ្ធ នាយកសាលាជាតិផែនការ និងស្ថិតិនៃក្រសួងផែនការ បានបង្ហាញថា និស្សិតជ័យលាភីសរុបចំនួន ៣៧៨នាក់ ក្នុងនោះមន្ត្រីរាជការមានចំនួន ៣៤២នាក់ (ត្រូវជា ៩០%) ជាមន្ត្រីរបស់ក្រសួងផែនការ និងមកពីក្រសួង ស្ថាប័នថ្នាក់ជាតិ និងថ្នាក់ក្រោមជាតិ។

និស្សិតទាំងអស់នេះបានសិក្សាលើជំនាញសំខាន់ៗចំនួន ៤ គឺ១-ជំនាញផែនការអភិវឌ្ឍន៍ ,២-ជំនាញតាមដានត្រួតពិនិត្យនិងវាយតម្លៃ,៣-ជំនាញស្ថិតិអនុវត្តន៍ និង៤-ជំនាញស្ថិតិប្រជាសាស្ត្រ ដែលជាជំនាញសំខាន់និងចាំបាច់ មិនអាចខ្វះបានក្នុងវិស័យរដ្ឋបាលសាធារណៈ។
ចាប់តាំងពីឆ្នាំ១៩៨៦មកសាលាជាតិផែនការ និងស្ថិតិបានបណ្តុះបណ្តាលធនធានមនុស្សសរុបចំនួន ៤ ១៧១នាក់ ដែលភាគច្រើនបានបម្រើការងារក្នុងវិស័យមុខងារសាធារណៈ។

ឯកឧត្តមរដ្ឋមន្ត្រីបានបញ្ជាក់ថា ការអភិវឌ្ឍន៍មូលធនមនុស្សគឺជាលក្ខខណ្ឌចាំបាច់ដើម្បីជំរុញកំណើនសេដ្ឋកិច្ចប្រកបដោយបរិយាបន្ន និងភាពធន់ ស្របតាមយុទ្ធសាស្ត្របញ្ចកោណ ដំណាក់កាលទី១ ឆ្ពោះទៅរកប្រទេសចំណូលខ្ពស់នៅឆ្នាំ២០៥០ និងការចាកចេញរបស់កម្ពុជាពីក្រុមប្រទេសអភិវឌ្ឍន៍តិចតួច (LDC) នៅឆ្នាំ២០២៩ ឱ្យទទួលបានជោគជ័យ និងរលូន។

ឯកឧត្តមរដ្ឋមន្ត្រី បានផ្ដល់អនុសាសន៍គន្លឹះចំនួន ៥ ចំណុចដល់និស្សិតជ័យលាភី៖
ទី១៖ ត្រូវខិតខំអនុវត្តចំណេះជំនាញដែលបានសិក្សានៅក្នុងការងារប្រចាំថ្ងៃរបស់ខ្លួន ដើម្បីពង្រឹងសមត្ថភាពជាក់ស្តែងនិងជំនាញអនុវត្តន៍ និងបង្កើនភាពជឿជាក់និងសមិទ្ធកម្មការងារក្នុងការបំពេញតួនាទីវិជ្ជាជីវៈ។
ទី២៖ ត្រូវបន្តអភិវឌ្ឍជំនាញបច្ចេកវិទ្យាឌីជីថល និងការវិភាគទិន្នន័យ ដើម្បីអាចប្រើប្រាស់ឧបករណ៍ទំនើបៗ និងប្រព័ន្ធព័ត៌មានវិទ្យាប្រកបដោយប្រសិទ្ធភាពក្នុងការងារ។
ទី៣៖ ត្រូវអភិវឌ្ឍជំនាញទំនាក់ទំនងការងារ និងបំណិនជីវិត ដើម្បីអាចសម្របខ្លួនទៅនឹងការផ្លាស់ប្តូរបរិយាកាសការងារ និងកិច្ចសហការជាមួយដៃគូពាក់ព័ន្ធប្រកបដោយផ្លែផ្កា។
ទី៤៖ ត្រូវមានទស្សនវិស័យគិតគូរវែងឆ្ងាយ មានគោលដៅការងារច្បាស់លាស់ និងចេះរៀបចំផែនការយុទ្ធសាស្ត្រប្រកបដោយភាពបុរេសកម្មនិងសកម្ម ដើម្បីឆ្លើយតបនឹងបញ្ហាប្រឈមនាពេលអនាគតប្រកបដោយភាពធន់។
ទី៥៖ ត្រូវបន្តការសិក្សាស្រាវជ្រាវពេញមួយជីវិត ដើម្បីទទួលយកចំណេះដឹងថ្មីៗ និងបច្ចេកវិទ្យាដែលកំពុងវិវត្តឥតឈប់ឈរ ដើម្បីរក្សាបាននូវសមត្ថភាពប្រកួតប្រជែង និងភាពពាក់ព័ន្ធក្នុងវិស័យការងារ៕

ដោយ ពេជ្រ សំអឿន(ប្រភព៖ក្រសួងផែនការ)