AKP បន្ទាយមានជ័យ ថ្ងៃទី ១៨ ខែសីហា ឆ្នាំ២០២៦--ដើម្បីលើកកម្ពស់ស្មារតី និងពង្រឹងការយកចិត្តទុកដាក់លើសុខទុក្ខរបស់កងកម្លាំងនគរបាលការពារព្រំដែនជួរមុខ លោកឧត្តមសេនីយ៍ត្រី សឿម សារិទ្ធ ស្នងការ នៃស្នងការដ្ឋាននគរបាលខេត្តបន្ទាយមានជ័យ អមដំណើរដោយលោកឧត្តមសេនីយ៍ត្រី ស្នងការរង និងសហការី កាលពីថ្ងៃទី១៧ ខែសីហា ឆ្នាំ២០២៦ នេះ បានអញ្ជើញចុះសំណេះសំណាល សួរសុខទុក្ខ និងពិនិត្យស្ថានភាពការងារផ្ទាល់របស់កងកម្លាំង ដែលកំពុងឈរជើងបំពេញភារកិច្ចនៅវរសេនាតូចនគរបាលការពារព្រំដែនគោកលេខ ៨០៧។

នៅក្នុងឱកាសនោះ គណៈប្រតិភូនគរបាលខេត្ត ត្រូវបានទទួលបដិសណ្ឋារកិច្ចយ៉ាងកក់ក្តៅ និងស្និទ្ធស្នាលបំផុតពីសំណាក់ លោកវរសេនីយ៍ទោ ហុង ចាន់ មេបញ្ជាការស្តីទី ព្រមទាំងមេបញ្ជាការរង នាយផ្នែក និងមន្ត្រីក្រោមឱវាទទាំងអស់នៃវរសេនាតូចនគរបាលការពារព្រំដែនគោកលេខ ៨០៧។

មានប្រសាសន៍សំណេះសំណាលនាឱកាសនោះ លោកឧត្តមសេនីយ៍ត្រី សឿម សារិទ្ធ បានពាំនាំនូវការផ្តាំផ្ញើសាកសួរសុខទុក្ខ និងក្តីនឹករលឹកពីសំណាក់ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ ជូនចំពោះនាយនគរបាល និងពលនគរបាលទាំងអស់ ដែលកំពុងឈរជើងបំពេញភារកិច្ចការពារបូរណភាពទឹកដីយ៉ាងអង់អាចក្លាហាននៅតាមខ្សែបន្ទាត់ព្រំដែន។

ទន្ទឹមនឹងនេះ លោកស្នងការក៏បានថ្លែងនូវការកោតសរសើរយ៉ាងស្មោះស្ម័គ្រ និងវាយតម្លៃខ្ពស់ចំពោះវីរភាព ស្មារតីលះបង់ខ្ពស់ និងភាពស្មោះត្រង់របស់កងកម្លាំងទាំងអស់ ដែលបាន និងកំពុងខិតខំបំពេញភារកិច្ចយ៉ាងសកម្មក្នុងការប្រយុទ្ធ ការពារជាតិ មាតុភូមិ ព្រមទាំងរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពនៅតំបន់ព្រំដែនបានយ៉ាងរឹងមាំ។

ដើម្បីជួយសម្រួលដល់ជីវភាពរស់នៅ និងការបំពេញភារកិច្ចប្រចាំថ្ងៃឱ្យកាន់តែមានប្រសិទ្ធភាពខ្ពស់ លោកស្នងការ និងក្រុមការងារ បាននាំយកគ្រឿងឧបភោគ បរិភោគ សម្ភារៈប្រើប្រាស់ និងថវិកាមួយចំនួនមកប្រគល់ជូនអង្គភាពដោយផ្ទាល់ រួមមានម៉ូតូចំនួន ០១គ្រឿង អង្ករ ០៨ការ៉ុង, ត្រីខ ១០ដុំ, មី ២៥កេស, ទឹកត្រី ២០យួរ, ទឹកស៊ីអ៊ីវ ២០យួរ, ទឹកក្រូច ១០កេស, ទឹកសុទ្ធ ២៥កេស, នំ៩០ ចំនួន ០៥ធុង, កាហ្វេ ០៥ថង់, ស្ករស ១០ថង់, ប៊ីចេង ១០ថង់ និងបារី ៥០សុង ការ៉ុងខ្មៅសម្រាប់ប្រើប្រាស់ក្នុងកិច្ចការការពារចំនួន ២,០០០ការ៉ុង និងថវិកាឧបត្ថម្ភចំនួន ៥០ម៉ឺនរៀល។

សកម្មភាពចុះសួរសុខទុក្ខ និងការផ្តល់ជំនួយឧបត្ថម្ភនាពេលនេះ បានស្តែងឱ្យឃើញយ៉ាងច្បាស់ពីការយកចិត្តទុកដាក់ខ្ពស់ សមរភូមិក្រោយគិតគូរពីសមរភូមិមុខ និងក្តីបារម្ភឥតឈប់ឈររបស់ថ្នាក់ដឹកនាំស្នងការដ្ឋាននគរបាលខេត្តបន្ទាយមានជ័យ ចំពោះសុខទុក្ខ និងជីវភាពរស់នៅរបស់កងកម្លាំងជួរមុខ។

ជាការឆ្លើយតប កងកម្លាំងនៃវរសេនាតូចនគរបាលការពារព្រំដែនគោកលេខ ៨០៧ ទាំងអស់ បានសម្តែងនូវក្តីរំភើបរីករាយ គោរពថ្លែងអំណរគុណយ៉ាងជ្រាលជ្រៅបំផុតជូនចំពោះ លោកស្នងការ និងថ្នាក់ដឹកនាំទាំងអស់ ដែលតែងតែផ្តល់កម្លាំងចិត្ត និងគិតគូរដល់កងកម្លាំងឈរជើងជួរមុខទិសបឹងត្រកួន។ កងកម្លាំងទាំងអស់បានប្តេជ្ញាចិត្តយ៉ាងមុតមាំក្នុងការបន្តបំពេញភារកិច្ចបម្រើជាតិ និងប្រជាជនឱ្យបានល្អប្រសើរបំផុត ព្រមទាំងបានគោរពជូនពរថ្នាក់ដឹកនាំទាំងអស់ឱ្យមានសុខភាពល្អបរិបូរណ៍ និងទទួលបានជោគជ័យគ្រប់ភារកិច្ច៕

ដោយ ឈុន សារ៉ាត