AKP តាកែវ ថ្ងៃទី១៧ ខែសីហា ឆ្នាំ២០២៦--លោកជំទាវ និន សាផុន ប្រធានគណៈកម្មាធិការទី៩នៃរដ្ឋសភា និងជាតំណាងរាស្ត្រមណ្ឌលតាកែវ រួមជាមួយក្រុមអ្នកតំណាងរាស្ត្រមណ្ឌលតាកែវ រួមមាន ឯកឧត្តមបណ្ឌិត ម៉ុក ម៉ារ៉េត ឯកឧត្តម ស៊ូ ភិរិន្ទ លោកជំទាវ នូ សុវណ្ណនី និងឯកឧត្តម អ៊ិត សុខ អមដំណើរដោយក្រុមចលនាស្ត្រីនៃក្រុមការងារចុះមូលដ្ឋានខេត្តតាកែវ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីជួបសំណេះសំណាល សួរសុខទុក្ខ និងនាំយកអំណោយជាគ្រឿងឧបភោគបរិភោគ ព្រមទាំងថវិកា ចែកជូនដល់គ្រួសារវីរកងទ័ពជួរមុខចំនួន៣៩គ្រួសារ ដែលរស់នៅក្នុងស្រុកព្រៃកប្បាស។ក្នុងពិធីនេះដែរក៏មានការអញ្ជើញចូលរួមពីថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ ចំណុះរដ្ឋបាលខេត្តតាកែវ រដ្ឋបាលស្រុកព្រៃកប្បាស និងក្រុមគ្រួសារវីរកងទ័ពជួរមុខចំនួន៣៩គ្រួសារចូលរួមផងដែរ ដោយពិធីនេះរៀបចំឡើងនៅក្នុងបរិវេណសាលាឃុំក្ដាញ់ ស្រុកព្រៃកប្បាស ខេត្តតាកែវ កាលពីថ្ងៃទី១៦ ខែសីហា ឆ្នាំ២០២៦។

មានប្រសាសន៍សំណេះសំណាលក្នុងឱកាសនោះ លោកជំទាវ និន សាផុន ប្រធានគណៈកម្មាធិការទី៩នៃរដ្ឋសភា និងជាអ្នកតំណាងរាស្ត្រមណ្ឌលខេត្តតាកែវ បានពាំនាំនូវប្រសាសន៍ផ្តាំផ្ញើសួរសុខទុក្ខ សេចក្តីនឹករលឹក និងការគិតគូរជាប្រចាំអំពីសុខទុក្ខ និងជីវភាពរស់នៅរបស់បងប្អូនប្រជាពលរដ្ឋ ជាពិសេសក្រុមគ្រួសារវីរកងទ័ពជួរមុខពីសំណាក់ សម្តេចអគ្គមហាសេនាបតីតេជោហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា។

លោកជំទាវតំណាងរាស្ត្រមណ្ឌលខេត្តតាកែវ និន សាផុន បានសម្តែងនូវការដឹងគុណយ៉ាងជ្រាលជ្រៅបំផុតចំពោះវីរភាពដ៏ឧត្តុង្គឧត្តម ភាពហ្មត់ចត់ និងការលះបង់ដ៏ខ្ពង់ខ្ពស់របស់បងប្អូនវីរកងទ័ពជួរមុខ ដែលបានធ្វើពលីកម្មកម្លាំងកាយចិត្ត និងអាយុជីវិត ក្នុងបុព្វហេតុការពារបូរណភាព ទឹកដី ថែរក្សាសុខសន្តិភាព ស្ថិរភាពជាតិ និងភាពសុខសាន្ត របស់ប្រជាជនកម្ពុជាទាំងមូល។

លោកជំទាវ និន សាផុន បានមានប្រសាសន៍បន្តថា ចំពោះលោកយាយ លោកតា អ៊ំ ពូ មីង និងពុកម៉ែបងប្អូនទាំងអស់ ដែលបានយល់ព្រមលះបង់ នូវសាច់ញាតិជាទីស្រឡាញ់របស់ខ្លួន ដូចជាប្ដី ប្រពន្ធ កូន ចៅ ឱ្យទៅបំពេញភារកិច្ចជាទាហានជួរមុខ គឺដើម្បីការពារជាតិសាសន៍ ពីសង្គ្រាមឈ្លានពានរបស់ប្រទេលជិតខាង។ការដែលពុក ម៉ែ បង ប្អូនដាច់ចិត្តឱ្យសាច់ឈាមបង្កើត ចាកចេញពីផ្ទះសម្បែងទៅកាន់សមរភូមិជួរមុខ ប្រឈមនឹងគ្រាប់កាំភ្លើង និងការឈ្លានពានពីសត្រូវ គឺជាការលះបង់ដ៏ធំធេងបំផុត ដែលមិនអាចកាត់ថ្លៃបាន។បើគ្មានការលះបង់និងស្មារតីស្នេហាជាតិ ពីសំណាក់ពុក ម៉ែ បង ប្អូន និងវីរកងទ័ពយើងនោះទេ បូរណភាពទឹកដីនិងសេចក្ដីសុខសាន្តរបស់ប្រជាពលរដ្ឋ ក៏មិនអាចរក្សាបានរឹងមាំដូចពេលនេះដែរ។ ជាមួយគ្នានោះផងដែរ ដើម្បីជួយសម្រាលបន្ទុកជីវភាព ក្រុមគ្រួសារបងប្អូនវរកងទ័ពជួរមុខ ក្រុមការងារតំណាងរាស្ត្រមណ្ឌលខេត្តតាកែវ បាននាំយកអំណោយសប្បុរសធម៌ ចែកជូនដល់គ្រួសារវីរកងទ័ពទាំង៣៩គ្រួសារ ដោយក្នុងមួយគ្រួសារៗទទួលបាន អង្ករចំនួន២៥គីឡូក្រាម ទឹកត្រី ចំនួន១យួរ ទឹកស៊ីអ៊ីវចំនួន១យួរ ត្រីខកំប៉ុងចំនួន១យួរ និងថវិកាចំនួន៥ម៉ឺនរៀល៕

ដោយ អ៊ុច សៀង