AKP កំពង់ធំ ថ្ងៃទី១៧ ខែសីហា ឆ្នាំ២០២៦--មន្ទីរសុខាភិបាលខេត្តកំពង់ធំ កាលពីថ្ងៃទី១៥-១៦ ខែសីហា ឆ្នាំ២០២៦ បានរៀបចំយុទ្ធនាការអប់រំផ្សព្វផ្សាយ និងបង្ការជំងឺគ្រុនឈាមនៅតាមគ្រឹះស្ថានសិក្សាមួយចំនួនក្នុងខេត្តនិងនៅសហគមន៍ភូមិចំបក់សង្កាត់ស្រយូវ ក្រុងស្ទឹងសែន ខេត្តកំពង់ធំ។

ក្នុងនោះក្រុមការងារមន្ទីរសុខាភិបាលខេត្តបានចុះអប់រំផ្សព្វផ្សាយដល់សិស្សានុសិស្សនៅតាមគ្រឹះស្ថានសិក្សាមួយចំនួន អំពីមូលហេតុ ការចម្លង រោគសញ្ញានិងវិធីបង្ការជំងឺគ្រុនឈាម។ការផ្សព្វផ្សាយនេះមានគោលបំណងបង្កើនការយល់ដឹងដល់សិស្សានុសិស្ស និងលើកទឹកចិត្តឱ្យពួកគេយកចំណេះដឹងទៅផ្សព្វផ្សាយបន្តដល់ក្រុមគ្រួសារ និងសហគមន៍ដើម្បីរួមគ្នាបង្ការនិងទប់ស្កាត់ជំងឺគ្រុនឈាម។

លោក ប៉ឹក គឹមសាន ប្រធានមន្ទីរសុខាភិបាលខេត្តកំពង់ធំ និងលោកស្រី អុន ផល្លា ប្រធានកម្មវិធីជំងឺគ្រុនឈាមបានមានប្រសាសន៍ថា ជំងឺគ្រុនឈាមនៅតែជាបញ្ហាសុខភាពសាធារណៈដែលត្រូវការការចូលរួមពីគ្រប់ភាគីទាំងអស់ ជាពិសេសការយល់ដឹង និងការអនុវត្តវិធានការបង្ការរបស់ប្រជាពលរដ្ឋនិងបានណែនាំសិស្សានុសិស្ស និងប្រជាពលរដ្ឋឱ្យអនុវត្តវិធានការ «៣កុំ ៣បំបាត់» ដើម្បីកាត់បន្ថយហានិភ័យនៃជំងឺគ្រុនឈាម។ វិធានការទាំងនេះរួមមាន៖ កុំឱ្យមូសខាំ កុំឱ្យមានទឹកដក់ និងកុំធ្វេសប្រហែសចំពោះអ្នកមានអាការៈក្តៅខ្លួន។ ត្រូវបំបាត់ជម្រកដង្កូវទឹក ដោយសម្អាតបរិស្ថានជុំវិញផ្ទះ គ្របធុងទឹក និងកម្ចាត់វត្ថុដែលអាចដក់ទឹកបានជាប្រចាំ។

ជាមួយគ្នានេះ ក្រុមការងារបច្ចេកទេសបានចុះបាញ់ថ្នាំសម្លាប់មូសតាមលំនៅឋាន និងតំបន់ដែលមានហានិភ័យខ្ពស់ក្នុងភូមិចំបក់ ដើម្បីកាត់បន្ថយចំនួនមូសខ្លាដែលជាភ្នាក់ងារចម្លងមេរោគគ្រុនឈាមនិងទប់ស្កាត់ការរីករាលដាលនៃជំងឺក្នុងសហគមន៍។

មន្ទីរសុខាភិបាលខេត្តកំពង់ធំបានអំពាវនាវដល់ប្រជាពលរដ្ឋទាំងអស់ឱ្យចូលរួមសម្អាតបរិស្ថាននិងបំបាត់ប្រភពទឹកដក់នៅជុំវិញផ្ទះជាប្រចាំ។ ប្រសិនបើកុមារ ឬសមាជិកគ្រួសារមានអាការៈក្តៅខ្លួនខ្លាំង ឈឺក្បាល ឈឺសាច់ដុំឬមានរោគសញ្ញាសង្ស័យជំងឺគ្រុនឈាមត្រូវប្រញាប់នាំទៅពិនិត្យនៅមណ្ឌលសុខភាពឬមន្ទីរពេទ្យដែលនៅជិតបំផុតដើម្បីទទួលបានការពិនិត្យនិងព្យាបាលទាន់ពេលវេលា។ យុទ្ធនាការនេះគឺជាផ្នែកមួយនៃការពង្រឹងវិធានការបង្ការ និងគ្រប់គ្រងជំងឺគ្រុនឈាមក្នុងខេត្តកំពង់ធំ សំដៅលើកកម្ពស់ការយល់ដឹងរបស់ប្រជាពលរដ្ឋកាត់បន្ថយការចម្លងជំងឺនិងការពារសុខភាពប្រជាពលរដ្ឋក្នុងសហគមន៍៕

ដោយ ស៊ុម វណ្ណា