AKP ភ្នំពេញ ថ្ងៃទី១៤ ខែសីហា ឆ្នាំ២០២៦ — ឯកឧត្តម ឌិត ទីណា រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ បានចុះពិនិត្យ និងសិក្សាអំពីផ្ទះសំណាញ់ដែលមានគ្រោងធ្វើអំពីសារធាតុ Fiber Glass នៅវិទ្យាស្ថានស្រាវជ្រាវវិស្វកម្មកសិកម្ម និងកសិចំណីអាហារ។

យោងតាមការចុះផ្សាយរបស់បណ្ឌិត្យសភាវិទ្យាសាស្ត្រកសិកម្មកម្ពុជា (CASA) បានឱ្យដឹងថា ផ្ទះសំណាញ់ទាំងនេះត្រូវបានដំឡើងសាកល្បងដោយប្រើប្រាស់វត្ថុធាតុដើមនាំចូលពីប្រទេសចិន ក្នុងគោលបំណងសិក្សា និងវាយតម្លៃអំពីគុណភាព តម្លៃ និងភាពធន់ ដែលអាចប្រើប្រាស់បានក្នុងរយៈពេលប្រមាណពី ១០ ទៅ ១៥ឆ្នាំ។

ថ្លែងក្នុងពិធីនេះ ឯកឧត្តមរដ្ឋមន្ត្រីក្រសួងកសិកម្ម បានជំរុញឱ្យមន្រ្តីជំនាញពិនិត្យ និងសិក្សាបន្ថែមអំពីលទ្ធភាព និងសមត្ថភាពក្នុងការផលិតវត្ថុធាតុដើមប្រភេទនេះនៅក្នុងប្រទេសកម្ពុជា ដើម្បីកាត់បន្ថយការពឹងផ្អែកលើការនាំចូល និងជំរុញការផលិតក្នុងស្រុក។ នេះ គឺជាចក្ខុវិស័យរយៈពេលវែង ក្នុងការអភិវឌ្ឍបច្ចេកវិទ្យា និងសម្ភារៈសម្រាប់វិស័យកសិកម្មដែលមានគុណភាពល្អ ប្រើប្រាស់បានយូរ និងមានតម្លៃសមរម្យ ដើម្បីផ្គត់ផ្គង់ជូនកសិករ ព្រមទាំងរួមចំណែកលើកកម្ពស់ប្រសិទ្ធភាពផលិតកម្មកសិកម្មនៅកម្ពុជា៕

ដោយ៖ មករា