AKP កំពង់ធំ ថ្ងៃទី១៤ ខែសីហា ឆ្នាំ ២០២៦--ឯកឧត្តម អ៊ាត សីលា រដ្ឋលេខាធិការក្រសួងបរិស្ថាន បានលើកឡើងថា «ព័ត៌មានមិនពិត ឬព័ត៌មានក្លែងក្លាយ ធ្វើឱ្យប៉ះពាល់ដល់ទំនុកចិត្ត បង្ខូចដល់ការយល់ឃើញសាធារណៈជន និងធ្វើឱ្យស្ថានភាពបរិស្ថានយើងចុះខ្សោយ»។ ឯកឧត្ដមបានលើកឡើងដូចនេះនៅក្នុងវគ្គសិក្ខាសាលា ស្តីពីការសរសេរអត្ថបទព័ត៌មាន ការកំណត់ព័ត៌មានក្លែងក្លាយ និងការរៀបចំដំឡើងរូបភាពវីដេអូសម្រាប់ផ្សព្វផ្សាយក្នុងវិស័យបរិស្ថាន នៅក្នុងខេត្តកំពង់ធំ កាលពីថ្ងៃទី១៣ ខែសីហា ឆ្នាំ២០២៦ នៅសាលប្រជុំរដ្ឋបាលខេត្ត។

ឯកឧត្ដមបានលើកឡើងថា ជាការចាំបាច់បំផុតដែលយើងត្រូវតែសិក្សាស្វែងយល់ឱ្យបានស៊ីជម្រៅ ដើម្បីកំណត់អត្តសញ្ញាណព័ត៌មានក្លែងក្លាយ ក្នុងការពង្រឹងយន្តការវិជ្ជាជីវៈដោយការទទួលខុសត្រូវ ជៀសវាងនូវការទទួលយកនូវព័ត៌មានដែលគ្មានប្រភពច្បាស់លាស់ ដែលបង្កជាបញ្ហាប្រឈម និងសេចក្តីថ្លៃថ្នូររបស់បុគ្គល និងសង្គមជាតិ។ ការផ្សព្វផ្សាយព័ត៌មានពិតចេញពីមន្ទីរអង្គភាព ធ្វើឱ្យមានការផ្លាស់ប្តូឥរិយាបថអ្នកប្រើប្រាស់បណ្តាញសង្គមឱ្យជឿជាក់ ដូចជា បញ្ហាទឹកជំនន់ គំរបព្រៃឈើ និងបញ្ហាបរិស្ថានទូទៅជាដើម។

ឯកឧត្តមបានលើកឡើងទៀតថា នៅក្នុងយុគសម័យឌីជីថលនៃការរីកចម្រើនផ្នែកបច្ចេកវិទ្យា វិស័យព័ត៌មានមានការរីកចម្រើនធ្វើឱ្យអ្នកផ្សព្វផ្សាយព័ត៌មានត្រូវតែមានទំនួលខុសត្រូវខ្ពស់។ ក្នុងសិក្ខាសាលានេះ សិក្ខាកាមបានស្វែងយល់បន្ថែមទៀតក្នុងការយល់ដឹង និងពង្រឹងការផ្សព្វផ្សាយប្រកបដោយក្រមសីលធម៌វិជ្ជាជីវៈខ្ពស់ ព្រមទាំងការវិភាគខ្លឹមសារនានា ហើយក្រសួងបរិស្ថានបានបង្កើតក្រុមតេឡេក្រាមដើម្បីតាមដាននូវអត្ថបទព័ត៌មានផ្សេងៗ ដែលក្រុមការងារទម្លាក់ចូល ដែលនឹងឆ្លើយតបឱ្យបានទាន់ពេលវេលាក្នុងករណីមើលឃើញថា ព័ត៌មាននោះមិនពិត ឬក៏គ្មានប្រភពច្បាស់លាស់។ ហេតុនេះ អ្វីដែលយើងចូលរួមថ្ងៃនេះ ជាការឆ្លុះបញ្ចាំងអំពីសារៈសំខាន់នៃព័ត៌មានបរិស្ថាន យល់ស្ថានភាពច្បាស់ការណ៍ និងចេះវិភាគ វាយតម្លៃ ព្រមទាំងចែកចាយព័ត៌មានដោយការទទួលខុសត្រូវខ្ពស់។ ឯកឧត្តមសង្ឃឹមថា វគ្គសិក្ខាសាលានេះនឹងផ្តល់នូវសារៈប្រយោជន៍ខ្ពស់ ទាំងការងារបច្ចេកទេស និងការអនុវត្តប្រកបប្រសិទ្ធិភាព៕

ដោយ៖ ស៊ុម វណ្ណា