AKP ភ្នំពេញ ថ្ងៃទី១៣ ខែសីហា ឆ្នាំ២០២៦--ដើម្បីពង្រឹងការបង្ការ និងទប់ស្កាត់អំពើហិង្សាគ្រប់ទម្រង់ចំពោះជនជាប់ឃុំ ព្រឹកថ្ងៃទី១៣ ខែសីហា ឆ្នាំ២០២៦នេះ ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ ក្រសួងមហាផ្ទៃ បានជួបពិភាក្សាការងារជាមួយគណៈប្រតិភូ នៃគណៈកម្មាធិការជាតិប្រយុទ្ធប្រឆាំងទារុណកម្ម (គ.ជ.ប.ទ) ដឹកនាំដោយ ឯកឧត្តម ឧត្តមសេនីយ៍ឯកបណ្ឌិត ជា តារា ប្រធានលេខាធិការដ្ឋានគណៈកម្មាធិការជាតិប្រយុទ្ធប្រឆាំងទារុណកម្ម (គ.ជ.ប.ទ) ដោយក្នុងជំនួបនេះ អគ្គនាយក នៃអគ្គនាយកដ្ឋានពន្ធនាគារបានលើកឡើងថា នាពេលកន្លងមកការអនុវត្តរបស់មន្ត្រីពន្ធនាគារ គឺផ្អែកលើតួនាទីភារកិច្ចដែលបានកំណត់អនុលោមតាមច្បាប់ស្តីពីពន្ធនាគារ និងច្បាប់ពាក់ព័ន្ធផ្សេងទៀត។

ឯកឧត្តម អគ្គនាយកបន្ដថា ចំពោះការគ្រប់គ្រង ឬការអនុវត្តចំពោះជនជាប់ឃុំ គឺផ្អែកលើនីតិវិធី និងបទបញ្ជាផ្ទៃក្នុងពន្ធនាគារ ដូចជា ការធានាសិទ្ធិជាមូលដ្ឋានរបស់ជនជាប់ឃុំ ការដោះស្រាយហេដ្ឋារចនាសម្ព័ន្ធ ផ្តល់កន្លែងស្នាក់នៅឱ្យមានលក្ខខណ្ឌសមស្រប កិច្ចការពារធានាសន្តិសុខសុវត្ថិភាព បង្ការទប់ស្កាត់អំពើហិង្សាគ្រប់ទម្រង់ រាល់ការធ្វើទារុណកម្ម ទង្វើអមនុស្សធម៌ ឬការរំលោភបំពានលើជនជាប់ឃុំ និងការ រើសអើងចំពោះជនជាប់ឃុំ ត្រូវបានហាមឃាត់ជាដាច់ខាត ការផ្តល់របបអាហារហូបចុក និងការថែទាំសុខភាពស្របតាមស្តង់ដារសុខាភិបាល កិច្ចសហការគាំទ្រផ្នែកច្បាប់ (ការទទួលជួបមេធាវី ជួបស្ថានទូត ឬស្ថានតំណាង សម្រាប់ជនជាប់ឃុំបរទេស) ការទទួលបានកិច្ចគាំពារចំពោះជនជាប់ឃុំជាអនីតិជន និងជនជាប់ឃុំជាស្ត្រី ព្រមទាំងកូនតាមម្តាយក្នុងពន្ធនាគារ ផ្តល់កម្មវិធីអប់រំកែប្រែ បណ្តុះបណ្តាលវិជ្ជាជីវៈ និងស្តារនីតិសម្បទា សិទ្ធិប្រតិបត្តិសាសនាតាមជំនឿផ្ទាល់ខ្លួន សិទ្ធិការផ្តល់-ទទួលព័ត៌មាន ឬជួបសួរសុខទុក្ខពីក្រុមគ្រួសារ សាច់ញាតិជាដើម។

ដោយឡែក ឯកឧត្តម ឧត្តមសេនីយ៍ឯកបណ្ឌិត ជា តារា បានលើកឡើងថា ជំនួបពិភាក្សានាពេលនេះធ្វើឡើងក្នុងគោលបំណងលើកកម្ពស់ការយល់ដឹងដល់ជនជាប់ឃុំ និងផលប៉ះពាល់ដ៏ធ្ងន់ធ្ងរនៃគ្រឿងញៀន។ ដូច្នេះ ការផ្សព្វផ្សាយអប់រំ និងការកែប្រែឥរិយាបថរបស់ជនជាប់ឃុំ គឺជាផ្នែកមួយដ៏សំខាន់ក្នុងការជួយឱ្យពួកគេយល់ដឹងពីគ្រោះថ្នាក់នៃគ្រឿងញៀន កែប្រែខ្លួន និងត្រៀមខ្លួនវិលត្រឡប់ទៅរស់នៅក្នុងសង្គមវិញប្រកបដោយទំនួលខុសត្រូវ និងគ្មានការពាក់ព័ន្ធនឹងគ្រឿងញៀន៕

ដោយ៖ ចាន់ សុភឿន (ប្រភព៖ អគ្គនាយកដ្ឋានពន្ធនាគារ)