AKP កណ្តាល ថ្ងៃទី១២ ខែសីហា ឆ្នាំ២០២៦--ឯកឧត្តម ផាន់ វណ្ណរ័ត្ន អនុប្រធានសហព័ន្ធកីឡាតេក្វាន់ដូ ITF កម្ពុជាបានលើកឡើងថា ឯកឧត្តមរំភើបស្ទើរស្រក់ទឹកភ្នែក នៅពេលដែលកីឡាករ កីឡាការិនីតេក្វាន់ដូ ITF កម្ពុជាឈ្នះមេដាយមាស ហើយយើងពិតជាមានមោទកភាពជាតិ នៅក្នុងពិធីបំពាក់មេដាយ គឺគេបង្ហូតទង់ជាតិកម្ពុជា។

នេះជាការលើកឡើងរបស់ឯកឧត្តម ផាន់ វណ្ណរ័ត្ន នៅក្នុងបទសម្ភាសន៍ជាមួយអ្នកសារព័ត៌មាន ក្នុងឱកាសធ្វើដំណើរមកដល់មាតុប្រទេស នៅអាកាសយានដ្ឋានអន្តរជាតិតេជោ កាលពីយប់រំលងអាធ្រាត្រ ថ្ងៃទី១១ឈានចូលថ្ងៃទី១២ ខែសីហា ឆ្នាំ២០២៦ ក្រោមការដឹកនាំរបស់ឯកឧត្តមទេសរដ្ឋមន្ត្រី កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា ដោយមានប្រតិភូ គ្រូបង្វឹក អត្តពលិក សរុប ៤៧រូប។

ឯកឧត្តម ផាន់ វណ្ណរ័ត្ន គូសបញ្ជាក់យ៉ាងដូច្នេះថា៖ «អ្វីដែលរន្ធត់ គឺខ្ញុំនៅជាប់នឹងកីឡាករ អ៊ីចឹង នៅពេលដែលពួកគាត់ប្រកួត យើងហាក់បីដូចជាពិបាកជាងគាត់ដែលប្រកួតទៅទៀត ឈឺជាងពួកគាត់ទៅទៀត។ យើងនៅខាងក្រៅឆាកមែន យើងចង់ឱ្យគាត់ឈ្នះ យើងក្តុកក្តួលណាស់ មិនមែនត្រឹមតែកូននោះទេ គឺកីឡាករដែលយើងស្គាល់គ្នា៤-១០ឆ្នាំមកនេះ គឺប្រៀបបានដូចបងប្អូនដូច្នេះដែរ។ ចំណុចមួយទៀត នៅពេលដែលគាត់ដណ្តើមបានមេដាយម្តងៗ គឺយើងរំភើបស្ទើរស្រក់ទឹកភ្នែក ដោយសារតែមោទកភាពជាតិ ពេលដែលគេបង្ហូតទង់ជាតិយើង ពេលយើងឈ្នះមេដាយមាស។ ទោះបីជាមិនមែនជាមេដាយមាស គឺមេដាយប្រាក់ ឬមេដាយសំរឹទ្ធិក្តី ក៏ជាមោទកភាពមួយដែរ ដែលកម្ពុជាយើងធ្វើបាន នៅក្នុងការប្រកួតជាមួយកីឡាករជាជនជាតិរុស្ស៊ី កាហ្សាក់ស្ថាន...មានមាឌធំជាង កម្ពស់ខ្ពស់ជាង ក៏យើងមិនខ្លាចដែរ ដោយយើងបានល្អមែនទែន»។

ឯកឧត្តមអនុប្រធានលើកឡើងថា អត្តពលិកតេក្វាន់ដូ ITF កម្ពុជាខ្លាំង ជាក់ស្តែងដូចជាវិញ្ញាសា Power Breaking ជាក្រុម (៥-៦នាក់) ជាដើម ក្រុមកីឡាករកម្ពុជាអាចឈ្នះមេដាយមាសបានក្នុងចំណោមអ្នកខ្លាំង ក្នុង ITF នេះតែម្តង ហើយបណ្តាប្រទេសចូលរួមទាំងអស់ទទួលស្គាល់ពីសមត្ថភាពរបស់អត្តពលិកកម្ពុជា។

ឯកឧត្តម ផាន់ វណ្ណរ័ត្ន បានចូលរួមជួយក្នុងសហព័ន្ធរយៈពេល១០ឆ្នាំមកហើយៗតែងតែគាំទ្រកីឡាករ កីឡាការិនីចេញទៅប្រកួតនៅក្រៅប្រទេសជាច្រើនលើក ដូចជានៅប៊ុលហ្គារី ឥណ្ឌា និងនៅប្រទេសម៉ុងហ្គោលី លើកនេះទៀត ដោយទទួលបានលទ្ធផលជោគជ័យ។ ជោគជ័យមួយទៀត គឺកម្ពុជាទទួលបានសិទ្ធិទទួលរៀបចំធ្វើម្ចាស់ផ្ទះបន្តវេន ការប្រកួតកីឡាតេក្វាន់ដូ ITF ជើងឯកអាស៊ី លើកទី១២ នាឆ្នាំ២០២៨ខាងមុខ បន្ទាប់ពីម្ចាស់ផ្ទះ ម៉ុងហ្គោលី លើកទី១១ នៅឆ្នាំ២០២៦នេះ។ ឆ្លងកាត់ការដកពិសោធន៍ពីការរៀបចំធ្វើម្ចាស់ផ្ទះ ជើងឯកអាស៊ីអាគ្នេយ៍ កន្លងទៅមកធ្វើម្ចាស់ផ្ទះ ជើងឯកអាស៊ី ឆ្នាំ២០២៨ទៀត យើងសង្ឃឹមថា ការធ្វើម្ចាស់ផ្ទះនេះនឹងជួយលើកមុខមាត់ប្រទេសជាតិយើង រួមទាំងជួយដល់វិស័យទេសចរណ៍ឱ្យគេបានដឹងពីប្រទេសយើងដែរ។

ជាមួយគ្នានេះ ឯកឧត្តមអនុប្រធាន ដែលមានកូនស្រី គឺកីឡារិនី សញ្ញា រ័ត្នម៉ានេតា ដែលចូលរួមប្រកួតក្នុងជើងឯកអាស៊ី នៅប្រទេសម៉ុងហ្គោលី ២០២៦នេះ ដណ្តើមបានមេដាយសំរឹទ្ធ១គ្រឿងលើវិញ្ញាសាប្រយុទ្ធ ១១-១៣ ឆ្នាំក្នុងប្រភេទទម្ងន់ ៣៥គីឡូក្រាម។ នៅពេលប្រកួត យើងដាក់គេ គេដាក់យើង ដោយយើងជាឪពុកក៏ក្តុកក្តួលដែរ ប៉ុន្តែយើងចង់ឱ្យគាត់រឹងមាំ សុខភាពល្អ និងអាចការពារខ្លួនឯងបាន។ កូនស្រីខ្ញុំ ទន់ភ្លន់ តែមិនទន់ជ្រាយ គាត់រៀនពូកែ ហើយមានទេពកោសល្យច្រើនផ្នែក រួមទាំងការចូលរួមហ្វឹកកីឡាតេក្វាន់ដូ ITF នេះធ្វើឱ្យសុខភាព ស្មារតីគាត់កាន់តែល្អជាងមុន និងក្លាហានជាងមុនផងដែរ។

គួរបញ្ជាក់ថា តេក្វាន់ដូ ITF កម្ពុជា ដណ្តើមបានមេដាយសរុប ៤១ គ្រឿង មាស ៨ ប្រាក់ ១២ និងសំរឹទ្ធ ២១គ្រឿង ដោយកម្ពុជាឈរចំណាត់ថ្នាក់លេខ២ ក្នុងចំណោម២៥ប្រទេសចូលរួម។ ប្រតិភូតេក្វាន់ដូ ITF កម្ពុជាមានចំនួន ៤៧រូប ក្នុងនោះកីឡាករ កីឡាការិនី ៣២រូប៕ ដោយ ហេង ណាលីន