AKP ភ្នំពេញ ថ្ងៃទី១១ ខែសីហា ឆ្នាំ២០២៦ -- ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសតែងតាំងមេធាវី លោក វីល ស្កាហ្វ ដែលពីមុនបានតំណាងឱ្យលោកនៅក្នុងតុលាការ ជាជំនួយការរបស់លោក និងជាទីប្រឹក្សាសេតវិមាន។

លោកបាននិយាយនៅលើបណ្តាញសង្គម Truth Social ថា «ខ្ញុំមានកិត្តិយសដ៏ខ្ពង់ខ្ពស់ក្នុងការប្រកាសថា ចាប់ពីថ្ងៃទី០១ ខែកញ្ញា តទៅ លោក វីល ស្កាហ្វ នឹងក្លាយជាជំនួយការប្រធានាធិបតី និងជាទីប្រឹក្សាសេតវិមាន ជំនួសលោក ដេវីដ វ៉ារីងតុន ដែលបានធ្វើការងារដ៏ល្អឥតខ្ចោះជាទីប្រឹក្សាសេតវិមានសម្រាប់យុទ្ធនាការប្រធានាធិបតីរបស់ខ្ញុំ។ លោក ដេវីដ នឹងបន្តទៅកាន់វិស័យឯកជន»។

លោក ត្រាំ បាននិយាយថា លោក ស្កាហ្វ បានធ្វើការងារដ៏អស្ចារ្យក្នុងតួនាទីបច្ចុប្បន្នរបស់លោកជាលេខាធិការបុគ្គលិកសេតវិមាន និងក៏បានបម្រើការជាប្រធានគណៈកម្មការផែនការមូលធនជាតិផងដែរ។ លោកបាននិយាយថា «ខ្ញុំស្គាល់លោក វីល ច្បាស់ណាស់! ពីមុន លោកបានតំណាងឱ្យខ្ញុំនៅក្នុងសំណុំរឿងជាច្រើន រួមទាំងនៅតុលាការកំពូលក្នុងអំឡុងពេលយុទ្ធនាការពុករលួយ និងខុសច្បាប់របស់រដ្ឋបាលលោក បៃដិន ស្តីពីការប្រើប្រាស់អាវុធ»។

ប្រធានាធិបតីអាម៉េរិកបានបន្ថែមថា លោក ស្កាហ្វ ពីមុនបានបម្រើការជាព្រះរាជអាជ្ញាសហព័ន្ធ ធ្លាប់ធ្វើការជាមេធាវីក្នុងការអនុវត្តឯកជន ធ្លាប់ធ្វើជាលេខាធិការសម្រាប់ចៅក្រមតុលាការឧទ្ធរណ៍សហព័ន្ធ និងជានិស្សិតកំពូលនៅសាកលវិទ្យាល័យព្រីនស្តុន និងសាលាច្បាប់ហាវ៉ាដ។

លោក ត្រាំ បាននិយាយថា «លោក វីល គឺជាមនុស្សដ៏រឹងមាំ និងឆ្លាតវៃ! លោកក៏ស្រឡាញ់ប្រទេសរបស់យើង និងគោរពច្បាប់ផងដែរ។ លោក វីល ស្កាហ្វ នឹងធ្វើការងារដ៏អស្ចារ្យក្នុងនាមជាទីប្រឹក្សាសេតវិមាន!»។

ទីប្រឹក្សាសេតវិមានផ្តល់ដំបូន្មានដល់ប្រធានាធិបតីអាម៉េរិក និងរដ្ឋបាល ស្តីពីបញ្ហាផ្លូវច្បាប់ រួមទាំងការចុះហត្ថលេខាលើច្បាប់ ការសម្រេចចិត្តលើកលែងទោស និងជម្លោះផលប្រយោជន៍ដែលអាចកើតមាន៕

ដោយ៖ យា ចិន្ដាខន្ដី (ប្រភព៖ តាសស៍)