AKP ភ្នំពេញ ថ្ងៃទី៧ ខែសីហា ឆ្នាំ២០២៦--លោក គង់ ចាន់ធីណា គ្រូបង្វឹក និងជាអគ្គលេខាធិការ សហព័ន្ធខ្មែរកីឡាហាប់គីដូបានលើកបង្ហាញពីការខិតខំប្រឹងប្រែងហ្វឹកហាត់ និងការប្តេជ្ញាចិត្តខ្ពស់របស់កីឡាករ កីឡាការិនីទាំង១០នាក់ជាមួយនឹងក្តីសង្ឃឹមថានឹងអាចប្រជែងមេដាយជូនជាតិបានខ្លះ នៅក្នុង ចូលរួមប្រកួតកីឡាហាប់គីដូ ជើងឯកអាស៊ី លើកទី៣ នៅទីក្រុងហុងកុង សាធារណរដ្ឋប្រជាមានិតចិន ដែលគ្រោងធ្វើឡើងពីថ្ងៃទី១៣-១៧ ខែសីហា ឆ្នាំ២០២៦។

នេះជាការគូសបញ្ជាក់របស់លោក គង់ ចាន់ធីណា នៅក្នុងបទសម្ភាសន៍ ក្រោយសន្និសីទសារព័ត៌មាន និងពិធីសំណេះសំណាលលើកទឹកចិត្ត កាលពីយប់ថ្ងៃទី០៦ ខែសីហា ឆ្នាំ២០២៦។ លោកបានបន្ថែមថា ចំពោះផ្នែកបច្ចេកទេស គឺយើងយកទៅតាមគោលការណ៍របស់អន្តរជាតិ តាមវិញ្ញាសានីមួយៗ ហើយលោកជឿជាក់ថា កាលណាយើងអនុលោមតាមគោលការណ៍បច្ចេកទេសរបស់ព្រឹត្តិការណ៍នេះ គឺប្រាកដជាមានឧបសគ្គខ្លះជៀសមិនផុតនោះទេ។ យ៉ាងណា ក្នុងនាមជាគ្រូបង្វឹក លោកពិតជាអរគុណដល់កីឡាករ កីឡាការិនីហាប់គីដូត្រៀមប្រកួតទាំងអស់ ដែលខិតខំយកចិត្តទុកដាក់ហ្វឹកហាត់យ៉ាងខ្លាំងក្លា ឆ្ពោះទៅចូលរួមប្រកួតដណ្តើមមេដាយជូនជាតិមាតុភូមិ។

លោក គង់ ចាន់ធីណា បានសង្កត់ធ្ងន់ថា ការប្រកួតជើងឯកអាស៊ី នៅទីក្រុងហុងកុង ប្រទេសចិន ក្នុងអំឡុងពាក់កណ្តាលខែសីហានេះ គឺថ្នាក់ដឹកនាំសហព័ន្ធកីឡាហាប់គីដូកម្ពុជាដាក់ក្តីសង្ឃឹមក្នុងការប្រជែងមេដាយជូនជាតិបានខ្លះ។ នៅក្នុងកម្រិតទ្វីបអាស៊ីនេះ គឺប្រមូលផ្តុំដោយអត្តពលិកខ្លាំងៗមកពីប្រទេសជាច្រើនដែរ ដូច្នេះការប្រកួតរបស់អត្តពលិកកម្ពុជាប្រាកដជាជួបឧបសគ្គ ក្នុងវិញ្ញាសាខ្លះដូចជាលោតកម្ពស់ និងលោតចម្ងាយជាដើម គឺពាក់ព័ន្ធនឹងមាឌ ឬកម្ពស់របស់កីឡាករ កីឡាការិនីដែរ បើទោះជាវ័យដូចគ្នាយ៉ាងណាក្តី។ បើទោះបីជាបែបនេះ ក៏គ្រូបង្វឹកហាប់គីដូកម្ពុជារូបនេះបង្ហាញសុទិដ្ឋិនិយមថា អត្តពលិកកម្ពុជានឹងប្រឹងប្រែងឱ្យអស់ពីសមត្ថភាព ដើម្បីទទួលបានលទ្ធផលល្អត្រឡប់មកមាតុភូមិវិញ។

ជាមួយគ្នានេះ លោកក៏បានថ្លែងអំណរគុណដល់ក្រសួងអប់រំ យុវជន និងកីឡា ដែលតែងតែបានយកចិត្តទុកដាក់ គាំទ្រ និងអនុញ្ញាតឱ្យប្រតិភូកីឡាហាប់គីដូកម្ពុជាចូលរួមប្រកួតអន្តរជាតិជាបន្តបន្ទាប់ ហើយលោកក៏ថ្លែងអំណរគុណដល់គណៈកម្មាធិការជាតិអូឡាំពិកកម្ពុជា ដែលតែងតែគាំទ្រ ផ្តល់សម្លៀកបំពាក់ ស្បែកជើង និងជួយសម្របសម្រួលឯកសារផ្លូវច្បាប់ក្នុងការសុំទិដ្ឋាការ សម្រាប់ដំណើរបេសកកម្មចូលរួមប្រកួតជើងឯកអាស៊ី នៅប្រទេសចិន នាពេលនេះ។

គួរបញ្ជាក់ថា ប្រតិភូកីឡាហាប់គីដូកម្ពុជាសរុបមានចំនួន ១៤នាក់ ក្នុងនោះមានប្រតិភូ គ្រូបង្វឹក មន្ត្រីកីឡា និងកីឡាករ កីឡាការិនី១០នាក់ (កីឡាការិនី ៤នាក់) ដោយត្រូវហោះហើរចាកចេញពីមាតុប្រទេស នាវេលាម៉ោង ៧ព្រឹក ថ្ងៃទី១៣ ខែសីហា ឆ្នាំ២០២៦៕

ដោយ ហេង ណាលីន