AKP បន្ទាយមានជ័យ ថ្ងៃទី៥ ខែសីហា ឆ្នាំ២០២៦--ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានក្រើនរម្លឹក និងជំរុញយ៉ាងទទូចដល់កូនក្មួយសិស្សានុសិស្សទាំងអស់ ត្រូវតាំងចិត្តខិតខំប្រឹងប្រែងរៀនសូត្រ ក្រេបជញ្ជក់យកចំណេះដឹងឱ្យបានពូកែ និងត្រូវប្ដេជ្ញាចិត្តចៀសឱ្យឆ្ងាយពីគ្រឿងញៀន ដែលជាមហន្តរាយបំផ្លាញអនាគតខ្លួនឯង គ្រួសារ និងសង្គមជាតិ។

ការថ្លែងលើកទឹកចិត្ត និងផ្ដាំផ្ញើនេះ ត្រូវបានធ្វើឡើងក្នុងឱកាសដែល ឯកឧត្តម អភិបាលខេត្ត អញ្ជើញចុះជួបសំណេះសំណាលផ្ទាល់ជាមួយគណៈគ្រប់គ្រង លោកគ្រូ-អ្នកគ្រូ និងប្អូនៗសិស្សានុសិស្ស នៃសាលាបឋមសិក្សា យាងឧត្ដម ដែលមានទីតាំងស្ថិតក្នុងឃុំប៉ោយចារ ស្រុកភ្នំស្រុក ខេត្តបន្ទាយមានជ័យ នាថ្ងៃទី៥ ខែសីហា ឆ្នាំ២០២៦នេះ។

ក្នុងបរិយាកាសដ៏ស្និទ្ធស្នាលនោះ ឯកឧត្តម អ៊ុ រាត្រី បានគូសបញ្ជាក់ថា ទំពាំងស្នងឫស្សីទាំងអស់គ្នា គឺជាកម្លាំងស្នូលដ៏មានតម្លៃមិនអាចកាត់ថ្លៃបាន ក្នុងការបន្តវេនអភិវឌ្ឍន៍ប្រទេសជាតិនៅថ្ងៃអនាគត។ ដូច្នេះ ដើម្បីសម្រេចបាននូវក្តីស្រមៃ និងអនាគតដ៏រុងរឿងមួយ ប្អូនៗត្រូវយកចិត្តទុកដាក់ស្ដាប់ការណែនាំរបស់លោកគ្រូ-អ្នកគ្រូ និងមាតាបិតា ខិតខំអានសៀវភៅ និងឈ្វេងយល់ចំណេះដឹងថ្មីៗបន្ថែមទៀត។

ទន្ទឹមនឹងការលើកទឹកចិត្តលើវិស័យអប់រំ ឯកឧត្តមអភិបាលខេត្ត ក៏បានផ្តាំផ្ញើជាពិសេសពាក់ព័ន្ធនឹងបញ្ហាគ្រឿងញៀន ដោយបានអំពាវនាវដល់សិស្សានុសិស្សគ្រប់រូប ត្រូវចេះប្រុងប្រយ័ត្ន និង «និយាយថាទេចំពោះគ្រឿងញៀន» ព្រោះគ្រឿងញៀនមិនត្រឹមតែបំផ្លាញសុខភាពផ្លូវកាយ និងផ្លូវចិត្តប៉ុណ្ណោះទេ ប៉ុន្តែថែមទាំងបំផ្លាញក្ដីសង្ឃឹម និងអនាគតដ៏ស្រស់បំព្រងរបស់យុវជនផងដែរ។

ជាមួយគ្នានោះដែរ ឯកឧត្តម ក៏បានថ្លែងអំណរគុណយ៉ាងជ្រាលជ្រៅចំពោះ គណៈគ្រប់គ្រងសាលា និងលោកគ្រូ-អ្នកគ្រូទាំងអស់ ដែលបានលះបង់កម្លាំងកាយចិត្តក្នុងការអប់រំទូន្មានប្រដៅទំពាំងស្នងឫស្សីឱ្យក្លាយជាធនធានមនុស្សប្រកបដោយគុណធម៌ ចរិយាធម៌ និងចំណេះដឹងពិតប្រាកដសម្រាប់សង្គមជាតិ៕

ដោយ ឈុន សារ៉ាត