AKP ភ្នំពេញ ថ្ងៃទី៤ ខែសីហា ឆ្នាំ២០២៦–ឯកឧត្តម ឧត្តមសេនីយ៍ទោ សែម រតនា អគ្គនាយកស្តីទីមជ្ឈមណ្ឌលជាតិរក្សាសន្តិភាព តាមរយៈជំនួបពិភាក្សាការងារជាមួយលោកវរសេនីយ៍ត្រី SUZUKI Takeshi មន្ត្រីគ្រប់គ្រងគម្រោងនៃអង្គភាពគោលនយោបាយថ្នាក់តំបន់ឥណ្ឌូប៉ាស៊ីហ្វិក នាយកដ្ឋានគោលនយោបាយការពារជាតិ នៃក្រសួងការពារជាតិជប៉ុនបានថ្លែងអំណរគុណយ៉ាងជ្រាលជ្រៅ ចំពោះជំនួយឧបត្ថម្ភទាំងឡាយរបស់ក្រសួងការពារជាតិជប៉ុនមកដល់មជ្ឈមណ្ឌលជាតិរក្សាសន្តិភាព ជាពិសសជំនួយលើការងារហ្វឹកហ្វឺនដល់កងកម្លាំងកម្ពុជាសម្រាប់ការចូលរួមក្នុងបេសកកម្មរក្សាសន្តិភាពរបស់អង្គការសហប្រជាជាតិ។

នាជំនួបនៅមជ្ឈមណ្ឌលជាតិរក្សាសន្តិភាព ព្រឹកថ្ងៃទី៤ ខែសីហា ឆ្នាំ២០២៦ ឯកឧត្តម ឧត្តមសេនីយ៍ទោ សែម រតនា បានបញ្ជាក់ជូនលោកវរសេនីយ៍ត្រី SUZUKI Takeshi ថារាល់ជំនួយរបស់ភាគីជប៉ុនមកដល់ មជ្ឈមណ្ឌលជាតិរក្សាសន្តិភាពពិតជាមានសារៈសំខាន់ខ្លាំងណាស់នៅក្នុងការហ្វឹកហ្វឺន បណ្តុះបណ្តាល កងកម្លាំងកម្ពុជាសម្រាប់ការចូលរួមក្នុងបេសកកម្មរក្សាសន្តិភាពរបស់អង្គការ សហប្រជាជាតិ នៅតាមបណ្តាប្រទេសដែលហែកហួរដោយសង្គ្រាម។ ឯកឧត្តមបានឱ្យដឹងថា ចាប់តាំងពីឆ្នាំ២០០៦ មកដល់បច្ចុប្បន្នកម្ពុជាបានបញ្ជូនកងកម្លាំងឱ្យទៅចូលរួមក្នុងបេសកកម្មមានចំនួន ១០៤៤០នាក់ (នារី ៩៨៨នាក់) ទៅកាន់បេសកកម្មចំនួន១២ ក្នុងប្រទេសចំនួន១០ មានជាអាទិ៍ ស៊ូដង់ ស៊ូដង់ខាងត្បូង លីបង់ឆាដ សាយប្រុស ស៊ីរី ម៉ាលី អាហ្វ្រិកកណ្តាល យេមែន និងកុងហ្គោ លើជំនាញបោសសំអាតមីន អាវុធហត្ថ ពេទ្យកំរិត២ កម្ទេចគ្រាប់មិនទាន់ផ្ទុះ វិស្វកម្មព្រលានយន្តហោះ វិស្វកម្មសំណង់ផ្ដេក បញ្ឈរ នាយទាហានសេនាធិការ និងនាយទាហានសង្កេតការណ៍ជាដើម ហើយសព្វថ្ងៃមានកងកម្លាំងកម្ពុជាចំនួន ៦២៧នាក់ (នារី ១៣៥នាក់) កំពុងបំពេញបេសកកម្មនៅក្នុង៤ប្រទេស ដូចជា ស៊ូដង់ខាងត្បូង លីបង់ អាហ្វ្រិកកណ្តាល និងកុងហ្គោ។

ក្នុងឱកាសនេះ ឯកឧត្តម ឧត្តមសេនីយ៍ទោ បានសុំឱ្យភាគីជប៉ុនផ្តល់ការហ្វឹកហ្វឺនរយៈពេល៥ឆ្នាំបន្តទៀតលើផ្នែកវាស់ស្ទង់តូប៉ូ សំណង់ផ្តេក-បញ្ឈរ។ បន្តផ្តល់ការហ្វឹកហ្វឺនដល់គ្រូបង្គោលកម្ពុជា តាមតថភាពជាក់ស្តែងនៃតំបន់បេសកកម្ម ដើម្បីពង្រឹងសមត្ថភាពមុននឹងចល័តដល់កងវិស្វកម្មកម្ពុជាសម្រាប់បេសកកម្មអង្គការសហប្រជាជាតិ។ ផ្តល់អាហាររូបករណ៍ដល់សិក្ខាកាមឆ្នើមក្រោមការហ្វឹកហ្វឺនរបស់យោធាចារ្យជប៉ុនឱ្យទៅបំប៉នបន្ថែមរយៈពេលខ្លី-មធ្យម នៅសាលាវិស្វកម្ម នៃប្រទេសជប៉ុន។
ផ្តល់ការហ្វឹកហ្វឺនទាំងទ្រឹស្តី និងការអនុវត្តជាក់ស្តែងលើជំនាញវាស់ស្ទង់ តាមរយៈម៉ាស៊ីនទំនើប និងការប្រើប្រាស់ Drone ដើម្បីឆ្លើយតបទៅនឹងស្ថានការណ៍បច្ចុប្បន្ន ដែលមានភាពស្មុគស្មាញ។ ការផ្លាស់ប្តូរទស្សនកិច្ចប្រចាំឆ្នាំរវាងប្រទេសទាំងពីរ និងការចូលរួមក្នុងព្រឹត្តិការណ៍នានារួមគ្នាជាដើម។

សូមជម្រាបថា ក្នុងកិច្ចសហប្រតិបត្តិការផ្នែកហ្វឹកហ្វឺន ភាគីជប៉ុនបានផ្តល់នូវវគ្គបំប៉នក្នុងប្រទេសសរុបចំនួន១២វគ្គ សិក្ខាកាមចំនួន ២៦៥នាក់ លើជំនាញបច្ចេកទេសវិស្វកម្មសំណង់ស៊ីវិល និងវាស់ស្ទង់ (ដោយឡែកអំឡុងពេល COVID-19 ភាគីជប៉ុនបានផ្តល់ការហ្វឹកហ្វឺនតាមរយៈប្រព័ន្ធ Online ដល់គ្រូបង្គោលចំនួន ៥នាក់) ហើយចំពោះវគ្គបំប៉នក្រៅប្រទេសវិញមានសិក្ខាកាមចំនួន ៧នាក់ទទួលបានវគ្គបំប៉នវិស្វកម្មសំណង់ផ្ដេក និងគ្រឿងផ្ទុះ៕

ដោយ៖ ចាន់ សុភឿន