AKP ភ្នំពេញ ថ្ងៃទី៣ ខែសីហា ឆ្នាំ២០២៦--ក្នុងឱកាសអបអរសាទរខួប ២៧ ឆ្នាំរបស់ខ្លួន ក្រុមហ៊ុនសម្ព័ន្ធធានារ៉ាប់រងឈានមុខគេនៅកម្ពុជា ហ្វតតេ បានចូលរួមជាដៃគូឧបត្ថម្ភផ្លូវការក្នុង «ទិវារត់ប្រណាំងម៉ារ៉ាតុងអន្តរជាតិចក្រភពអង្គរ លើកទី១១» ដែលបានប្រព្រឹត្តទៅនាថ្ងៃទី២ ខែសីហា ឆ្នាំ២០២៦ កន្លងទៅនេះ។ ព្រឹត្តិការណ៍រត់ប្រណាំងម៉ារ៉ាតុងប្រចាំឆ្នាំតែមួយគត់នៅកម្ពុជាដែលទទួលស្គាល់ជាអន្តរជាតិមួយនេះ បានទាក់ទាញអ្នករត់ប្រណាំងជាតិ និងអន្តរជាតិជាង ៦ ០០០ នាក់ ឱ្យមកជួបជុំគ្នានៅលើទឹកដីនៃតំបន់បេតិកភណ្ឌពិភពលោក ដើម្បីអបអរសាទរស្មារតីអំណត់ធន់ បេតិកភណ្ឌវប្បធម៌ និងការរួមចំណែកជំរុញវិស័យទេសចរណ៍កីឡាដល់សេដ្ឋកិច្ចមូលដ្ឋាន។

តាមរយៈការឧបត្ថម្ភគាំទ្រព្រឹត្តិការណ៍រត់ប្រណាំងម៉ារ៉ាតុងប្រចាំឆ្នាំ (ចម្ងាយ ៤២,១៩៥ គីឡូម៉ែត្រ) តែមួយគត់នៅកម្ពុជា ហ្វតតេ បានពង្រឹងការប្តេជ្ញាចិត្តក្នុងការលើកកម្ពស់ភាពធន់ក្នុងសហគមន៍ សុខុមាលភាព ការអភិវឌ្ឍវិស័យទេសចរណ៍ និងវឌ្ឍនភាពសង្គមជាតិ ខណៈពេលដែលក្រុមហ៊ុនកំពុងប្រារព្ធពិធីអបអរសាទរវត្តមានជិតបីទសវត្សរ៍ក្នុងវិស័យធានារ៉ាប់រង។

ចំនួនអ្នកចុះឈ្មោះចូលរួមសរុបបានកើនឡើងពីប្រមាណ ៤ ៥០០ នាក់ ក្នុងឆ្នាំ២០២៥ រហូតដល់ជាង ៦ ៥០០ នាក់ ក្នុងឆ្នាំ២០២៦ នេះ ដែលស្តែងឱ្យឃើញពីការទាក់ទាញកាន់តែខ្លាំងឡើងនៃព្រឹត្តិការណ៍នេះទាំងក្នុងស្រុក និងលើឆាកអន្តរជាតិ។ ព្រឹត្តិការណ៍នេះ  ក៏មានការចូលរួមយ៉ាងកក់ក្តៅពីសំណាក់ថ្នាក់ដឹកនាំជាន់ខ្ពស់ បុគ្គលិកនៃ ហ្វតតេ គ្រុប ព្រមទាំងដៃគូអាជីវកម្ម និងដៃគូធនាគារ (Bancassurance) ដែលបានចូលរួមរត់ប្រណាំងលើគ្រប់វិញ្ញាសាចម្ងាយ ចាប់ពី ៣ គីឡូម៉ែត្រ រហូតដល់ ៤២ គីឡូម៉ែត្រ។

ការឧបត្ថម្ភគាំទ្រជាប្រវត្តិសាស្ត្រនេះ បានធ្វើឡើងស្របគ្នានឹងឱកាសនៃពិធីអបអរសាទរខួប ២៧ ឆ្នាំ (១៩៩៩–២០២៦) របស់ក្រុមហ៊ុន ហ្វតតេ ក្រោមប្រធានបទ៖ «ខែលការពារ និងជានិមិត្តរូបនៃធានារ៉ាប់រងជាទីទុកចិត្ត រយៈពេល ២៧ ឆ្នាំ នៅកម្ពុជា»។

កីឡារត់ប្រណាំងម៉ារ៉ាតុង គឺជាការតេស្តសាកល្បងពិតប្រាកដនៃភាពធន់ វិន័យ និងគោលបំណងច្បាស់លាស់ ដែលគុណតម្លៃទាំងនេះបានឆ្លុះបញ្ចាំងយ៉ាងច្បាស់ពីដំណើរ ២៧ ឆ្នាំរបស់ ហ្វតតេ ក្នុងការកសាងហេដ្ឋារចនាសម្ព័ន្ធអរូបិយនៃភាពធន់ផ្នែកហិរញ្ញវត្ថុនៅកម្ពុជា។ ដូចគ្នានឹងអ្នករត់ប្រណាំងម៉ារ៉ាតុងដែលពុះពារបោះជំហានទៅមុខបន្តិចម្តងៗឆ្លងកាត់រាល់បញ្ហាប្រឈមដើម្បីឈានទៅដល់ទីព្រ័ត្រ ហ្វតតេ បានចំណាយពេលជិតបីទសវត្សរ៍ក្នុងការឈរជើងយ៉ាងរឹងមាំនៅក្បែរគ្រួសារកម្ពុជា ម្ចាស់សហគ្រាស និងស្ថាប័ននានា ដើម្បីផ្តល់លទ្ធភាពឱ្យពួកគាត់ចាប់យកក្តីស្រមៃ និងគោលដៅរបស់ខ្លួនប្រកបដោយភាពប្រាកដប្រជា។

ថ្លែងក្នុងពិធីបើកព្រឹត្តិការណ៍អបអរសាទរនេះ លោក Charles Cheo ប្រធានក្រុមប្រឹក្សាភិបាល នៃ ហ្វតតេ គ្រុប បានគូសបញ្ជាក់ពីការបន្ស៊ីគ្នាយ៉ាងស៊ីជម្រៅរវាងស្មារតីនៃកីឡាម៉ារ៉ាតុង និងសមិទ្ធផលប្រវត្តិសាស្ត្រដ៏យូរអង្វែងរបស់ ហ្វតតេ ដោយបានលើកឡើងថា កាលពីយើងបានចាប់ផ្តើមបោះជំហានដំបូងក្នុងឆ្នាំ១៩៩៩ គោលគំនិតនៃការកសាងសំណាញ់សុវត្ថិភាព និងការការពារហិរញ្ញវត្ថុនៅកម្ពុជាគឺស្ទើរតែមិនទាន់មាននៅឡើយ។ លោកបានបន្ដថា ក្នុងរយៈពេល ២៧ ឆ្នាំកន្លងមកនេះ យើងបានកសាងសមិទ្ធផលប្រវត្តិសាស្ត្រដែលផ្អែកលើគ្រឹះនៃទំនុកចិត្ត និងភាពធន់ដ៏រឹងមាំមិនអាចរំកិលបាន។ លោកបានបញ្ជាក់ថា ការឧបត្ថម្ភគាំទ្រ ទិវារត់ប្រណាំងម៉ារ៉ាតុងអន្តរជាតិចក្រភពអង្គរ មិនមែនគ្រាន់តែជាកិច្ចសហការដៃគូប៉ុណ្ណោះទេ ប៉ុន្តែវាជាការអបអរសាទរមោទនភាពជាតិ និងភាពអំណត់ធន់។ លោក Charles Cheo បានបន្ថែមថា៖ «ដូចគ្នានឹងព្រឹត្តិការណ៍ម៉ារ៉ាតុងនេះដែលបានប្រមូលផ្តុំមនុស្សរាប់ពាន់នាក់នៅលើទឹកដីប្រវត្តិសាស្ត្រខ្មែរ ហ្វតតេ នៅតែបន្តប្តេជ្ញាចិត្តដើរតួជាកម្លាំងចលករដ៏រឹងមាំនៅពីក្រោយភាពរីកលូតលាស់សេដ្ឋកិច្ចយូរអង្វែង និងវិបុលភាពរួមគ្នារបស់កម្ពុជា»។

បន្ថែមលើចក្ខុវិស័យនេះ លោក យក់ ចំរើនប្ញទ្ធិ ប្រធានអគ្គនាយកប្រតិបត្តិ នៃ ហ្វតតេ គ្រុប បានមានប្រសាសន៍ថា៖ «អស់រយៈពេល ២៧ ឆ្នាំមកនេះ បេសកកម្មរបស់ ហ្វតតេ គឺលាតសន្ធឹងហួសពីបណ្ណសន្យារ៉ាប់រង។ យើងផ្តោតលើការកសាងសង្គមជាតិមួយដែលមានភាពធន់ សុខភាពល្អ និងការរីកចម្រើន។ ការឧបត្ថម្ភគាំទ្រ ទិវារត់ប្រណាំងម៉ារ៉ាតុងអន្តរជាតិចក្រភពអង្គរ គឺជាការឆ្លុះបញ្ចាំងយ៉ាងច្បាស់ពីអត្តសញ្ញាណរបស់យើងក្នុងនាមជាខែលការពារហិរញ្ញវត្ថុរបស់ជាតិ។ ដូចគ្នានឹងអ្នករត់ប្រណាំងដែលពឹងផ្អែកលើភាពអំណត់ធន់ដើម្បីឆ្លងកាត់ទីព្រ័ត្រ ប្រជាជនកម្ពុជាតែងតែទុកចិត្តលើ ហ្វតតេ ក្នុងការការពារសមិទ្ធផលរបស់ពួកគាត់ និងជួយជ្រោមជ្រែងក្តីស្រមៃសម្រាប់ថ្ងៃអនាគត»។

ព្រឹត្តិការណ៍នេះ ត្រូវបានទទួលស្គាល់ដោយទស្សនាវដ្តី Forbes ថាជា «គោលដៅម៉ារ៉ាតុងទាំង១២ ក្នុងលោក ដែលគួរតែធ្វើដំណើរទៅកម្ពុជា សម្រាប់ឆ្នាំ២០២៦» និងត្រូវបានដាក់បញ្ចូលក្នុងការបោះពុម្ពផ្សាយរបស់ AIMS World Running ទិវារត់ប្រណាំងម៉ារ៉ាតុងចក្រភពអង្គរ បានពង្រឹងទីតាំងរបស់កម្ពុជាយ៉ាងរឹងមាំនៅលើផែនទីទេសចរណ៍កីឡាសកល។

លោក ស៊ុយ ចាន់ថារ៉ុង អគ្គនាយកនៃក្រុមហ៊ុន ហ្វតតេ អ៊ិនសួរឹនស៍ បានគូសបញ្ជាក់ពីផលវិជ្ជមានតាមរយៈកត្តាធនធានមនុស្សជាស្នូលដោយចាត់ទុកថា ការបានឃើញអ្នករត់ប្រណាំងជាង ៦ ០០០ នាក់ បោះជំហាននៅលើទឹកដីប្រវត្តិសាស្ត្រអង្គរ គឺស្ដែងឱ្យឃើញពីថាមពលដ៏រស់រវើក និងការយកចិត្តទុកដាក់លើសុខភាពរបស់ប្រទេសជាតិយើង។ លោកបានសង្កត់ថា៖ «ក្នុងនាមជាក្រុមហ៊ុនដែលកសាងឡើងដោយផ្អែកលើទេពកោសល្យ និងសមត្ថភាពធនធានមនុស្សក្នុងស្រុក ហ្វតតេ មានមោទនភាពយ៉ាងក្រៃលែងក្នុងការគាំទ្រដល់សហគមន៍មូលដ្ឋាន ជំរុញអាជីវកម្មក្នុងខេត្ត និងផ្តល់សិទ្ធិអំណាចដល់ប្រជាជនឱ្យបោះជំហានទៅមុខប្រកបដោយភាពជឿជាក់»៕

ដោយ៖ រិទ្ធី