AKP កណ្តាល ថ្ងៃទី៣ ខែសីហា ឆ្នាំ២០២៦--ផ្សារផលិតផលខ្មែរខេត្តកណ្តាលបន្តបើកដំណើរការលក់កសិផល និងផលិតផលខ្មែរដែលផលិត ដាំដុះ ចិញ្ចឹម និងកែច្នៃដោយកសិករ ផលិតករ និងសិប្បករខ្មែរ ក្នុងខេត្តកណ្តាល ជារៀងរាល់ថ្ងៃសៅរ៍ និងថ្ងៃអាទិត្យ ចាប់ពីម៉ោង ៧:០០ ព្រឹក ដល់ម៉ោង ១:០០ រសៀល នៅសួនច្បារមាត់ទន្លេ ក្រុងតាខ្មៅ ខេត្តកណ្តាល។ នេះបើតាមការឱ្យដឹងពីមន្រ្តីនៃ មន្ទីរពាណិជ្ជកម្មខេត្តកណ្តាល នៅព្រឹកថ្ងៃទី០៣ ខែសីហា ឆ្នាំ២០២៦នេះ។

ការលក់ផ្សារផលិតផលខ្មែរខេត្តកណ្តាល បើកដំណើរការលក់កសិផល និងផលិតផលខ្មែរ ក្រោមការដឹកនាំ និងការគាំទ្ររបស់ ក្រសួងពាណិជ្ជកម្ម និង រដ្ឋបាលខេត្តកណ្តាល ដោយមានការសម្របសម្រួលពី មន្ទីរពាណិជ្ជកម្មខេត្តកណ្តាល ក្រោម គម្រោងជំរុញទីផ្សារសម្រាប់កសិកម្មខ្នាតតូច (AIMS) ផ្សារផលិតផលខ្មែរនេះ បានដាក់ឱ្យដំណើរការតាំងពីឆ្នាំ ២០១៩ និងបន្តដើរតួនាទីយ៉ាងសំខាន់ក្នុងការពង្រីកទីផ្សារជូនកសិករ និងផលិតករក្នុងស្រុករហូតមកដល់បច្ចុប្បន្ន។ 

ផ្សារផលិតផលខ្មែរ មានគោលបំណងបង្កើនឱកាសទីផ្សារសម្រាប់កសិករ ផលិតករ សិប្បករ អាជីវករខ្នាតតូច ក្រុមកសិករ និងចង្កោមផលិតកម្ម តាមរយៈការពង្រឹងការតភ្ជាប់ទីផ្សារ និងជំរុញការលក់ផលិតផលក្នុងស្រុក ដើម្បីបង្កើនប្រាក់ចំណូល លើកកម្ពស់ជីវភាពរស់នៅរបស់ប្រជាពលរដ្ឋ និងរួមចំណែកអភិវឌ្ឍសេដ្ឋកិច្ចមូលដ្ឋានប្រកបដោយចីរភាព។

ក្រសួងពាណិជ្ជកម្មបានធ្វើការអំពាវនាវដល់សាធារណជនចូលរួមគាំទ្រ និងប្រើប្រាស់ផលិតផលខ្មែរ ដើម្បីរួមចំណែកពង្រឹងទីផ្សារក្នុងស្រុក លើកកម្ពស់សមត្ថភាពប្រកួតប្រជែងរបស់ផលិតផលជាតិ និងគាំទ្រដល់ជីវភាពរបស់កសិករ និងផលិតករខ្មែរ ៕ 

ដោយ ណយ នឿន