AKP ភ្នំពេញ ថ្ងៃទី០២ ខែសីហា ឆ្នាំ២០២៦--ការប្រកួតកីឡាបាល់ទាត់សប្បុរសធម៌ពានរង្វាន់ដើម្បីកុមារកម្ពុជា រដូវកាលទី៤ ឆ្នាំ២០២៦បានឈានចូលដល់សប្តាហ៍ទី៧ហើយ ដោយបានរកឃើញ៤ក្រុមខ្លាំងៗឡើងទៅកាន់វគ្គពាក់កណ្តាលផ្តាច់ព្រ័ត្រ ខណៈ២ប្រកួត កាលពីល្ងាចថ្ងៃទី០១ ខែសីហា ឆ្នាំ២០២៦ គឺក្រុមមហាហង្សអលស្តារ FC បានយកឈ្នះក្រុមបាល់ទាត់មិត្តភាពមន្ទីរពេទ្យព្រះអង្គឌួង ៦-០ រីឯក្រុមសម្ពន្ធយុវជនស្រឡាញ់សន្តិភាព ឈ្នះក្រុមវ័យចាស់អូឡាំពិក ១០-០។

ចំពោះ២ប្រកួតចុងក្រោយនៃវគ្គសន្សំពិន្ទុវិលជុំសប្តាហ៍ទី៧ សម្រាប់ល្ងាចថ្ងៃទី០២ ខែសីហានេះ គឺ Sybelle FC ប៉ះ Vlogger All Star ខណៈក្រុម 9NG Soccer ប៉ះក្រុម K8។ យ៉ាងណា ២ក្រុម គឺក្រុម 9NG Soccer និង Sybelle FC ដែលលេងជាមួយគូប្រកួតរៀងៗខ្លួននឹងគ្រាន់តែអាចរំកិលចំណាត់ថ្នាក់ ក្នុងចំណោម៤ក្រុមលើកំពូលតារាងប៉ុណ្ណោះ។ ចំពោះ៤ក្រុមលើកំពូលតារាង ដែលនឹងឡើងទៅវគ្គពាក់កណ្តាលផ្តាច់ព្រ័ត្រ រួមមាន៖ ក្រុមមហាហង្ស  ក្រុម 9NG Soccer ក្រុមបាល់ទាត់មិត្តភាពមន្ទីរពេទ្យព្រះអង្គឌួង និងក្រុម Sybelle FC។

លោក អ៊ិន សុភិន ប្រធានក្លឹបបាល់ទាត់មហាហង្សអលស្តារ FC បានបង្ហាញក្តីរីករាយជាខ្លាំង ដែលបានចូលរួមប្រកួតកីឡាបាល់ទាត់សប្បុរសធម៌ពានរង្វាន់ដើម្បីកុមារកម្ពុជា រដូវកាលទី៤ ឆ្នាំ២០២៦ ដើម្បីសុខភាព រិតចំណងសាមគ្គីភាព មិត្តភាពជាមួយក្លឹបនានា ជាពិសេសបានបរិច្ចាគថវិការបស់ក្លឹបទៅកាន់មូលនិធិមន្ទីរពេទ្យកុមារអង្គរ និងមន្ទីរពេទ្យគន្ធបុប្ជា ដែលជាការរួមចំណែកជាមួយសប្បុរសជនទាំងក្នុង និងក្រៅស្រុក ក្នុងកិច្ចការសប្បុរសធម៌នេះ។ ប្រធានក្លឹបរូបនេះបន្ថែមថា មន្ទីរពេទ្យទាំងពីរត្រូវការថវិកាច្រើន ដើម្បីជួយសង្គ្រោះអាយុជីវិតកុមារកម្ពុជា ហើយការរួមចំណែករបស់ក្លឹប និងកីឡាកររបស់លោកទាំងអស់គឺជាមោទនភាពរបស់យើងទាំងអស់គ្នា ហើយលោកសង្ឃឹមថា មហាជននឹងចូលរួមលេងកីឡាដើម្បីសុខភាព មិត្តភាព និងសាមគ្គីភាព ជាពិសេសបានរួមចំណែកដល់កិច្ចការសប្បុរធម៌ឱ្យកាន់តែច្រើនបន្ថែមទៀត។

ជាមួយគ្នានេះ លោក នង ម៉ានិត នាយករងមន្ទីរពេទ្យព្រះអង្គឌួង និងជាប្រធានក្រុមបាល់ទាត់មិត្តភាពព្រះអង្គឌួងបានគូសបញ្ជាក់ដែរថា លោក និងកីឡាករទាំងអស់ពិតជារីករាយ ដែលបានចូលរួមប្រកួតបាល់ទាត់នៃព្រឹត្តិការណ៍នេះ ដើម្បីកៀរគរថវិកាតាមការស្ម័គ្រចិត្តជួយដល់មន្ទីរពេទ្យកុមារអង្គរ និងមន្ទីរពេទ្យគន្ធបុប្ជា។ លោក នង ម៉ានិត គូសបញ្ជាក់បែបនេះថា៖ «យើងពិតជាមានមោទនភាព ដែលយើងមានក្រុម និងលទ្ធភាព ក្នុងការលះបង់ថវិកាពីសមាជិកក្នុងក្រុមបរិច្ចាគជូនដល់មន្ទីរពេទ្យទាំងពីរនេះ។ អ្វីដែលសំខាន់ គឺយើងបានរួបរួមគ្នាកសាងព្រឹត្តិការណ៍មួយចូលរួមចំណែកក្នុងការងារសង្គម ជាពិសេសជួយដល់កុមារកម្ពុជារបស់យើង។ យើងខ្ញុំសង្ឃឹមថា ព្រឹត្តិការណ៍នេះនឹងមានជារៀងរហូត ហើយយើងក៏អាចកសាងបានសាមគ្គីភាព តាមរយៈព្រឹត្តិការណ៍បាល់ទាត់សប្បុរសធម៌នេះ»។ លោកក៏បានអំពាវដល់មហាជន ជាពិសេសយុវជនចូលរួមលេងកីឡា ដើម្បីសុខភាព មិត្តភាព និងសាមគ្គីភាព ជៀសឆ្ងាយពីអំពើអបាយមុខផ្សេងៗ ហើយរួមគ្នាស្រឡាញ់គ្នា រាប់អានគ្នាឱ្យកាន់តែល្អប្រសើរបន្ថែមទៀត ជាពិសេសចូលរួមជួយក្នុងកិច្ចការសប្បុរសធម៌ឱ្យកាន់តែច្រើនផងដែរ។

បើតាម លោក ហួត គីមងួន ដែលគេស្គាល់ច្បាស់ក្នុងវិស័យកីឡាបាល់ទាត់សប្បុរធម៌ គឺDoRi Cambodia ស្ថាបនិក និងគណ:កម្មការរៀបចំការប្រកួតកីឡាបាល់ទាត់សប្បុរសធម៌ពានរង្វាន់ដើម្បីកុមារកម្ពុជា រដូវកាលទី៤ ឆ្នាំ២០២៦ បានបញ្ជាក់ថា ព្រឹត្តិការណ៍នេះមាន៨ក្រុមចូលរួម ដោយក្នុង១ក្រុមនីមួយៗត្រូវបរិច្ចាគយ៉ាងតិច ២លានរៀល ឬ៥០០$ ទៅឱ្យមន្ទីរពេទ្យទាំង២នេះ ដោយផ្ទាល់។ ស្ថាបនិកពានរង្វាន់នេះលើកឡើងថា ដោយសារតែគោលបំណងចម្បងនៃព្រឹត្តិការណ៍បាល់ទាត់នេះគឺដើម្បីសប្បុរធម៌ ទើបការរៀបចំនេះទទួលបានការគាំទ្រពីបណ្តាក្លឹប មហាជន សប្បុរជននានាយ៉ាងច្រើនកុះករ ដែលជំរុញឱ្យលោកមានកម្លាំងចិត្តខ្លាំងក្លា ក្នុងការបន្តរួមឆន្ទៈគ្នាបំពេញបេសកកម្មសប្បុរសធម៌បន្ថែមទៀតផងដែរ៕

ដោយ ហេង ណាលីន