AKP សៀមរាប ថ្ងៃទី២ ខែសីហា ឆ្នាំ២០២៦ -- រដ្ឋបាលក្រុងសៀមរាប និងព្រះគ្រូចៅអធិការវត្តប្រាសាទគោកចកន រួមជាមួយនអាជ្ញាធរសង្កាត់គោកចក សង្កាត់ស្រង៉ែ សង្កាត់ស្លក្រាម និងសង្កាត់សាលាកំរើក ព្រមទាំងសប្បុរសជនជាច្រើនទៀត កាលពីថ្ងៃទី១ ខែសីហា ឆ្នាំ២០២៦ បាននាំយកនូវគ្រឿងឧបភោគបរិភោគ និងសម្ភារៈប្រើប្រាស់ទៅប្រគល់ជូនដល់កងទ័ពជូរមុខដែលកំពុងឈរជើងបំពេញភារកិច្ចការពារបូរណភាពទឹកដីតាមខ្សែបន្ទាត់ព្រំដែនស្ថិតក្នុងភូមិសាស្ត្រខេត្តឧត្តរមានជ័យ។

ព្រះគ្រូវិចិត្រវង្សា ហែម គឹមសាន ព្រះគ្រូចៅអធិការវត្តប្រាសាទគោកចក បានមានថេរដីកាថា ការចូលរួមរបស់ព្រះសង្ឃ និងអាជ្ញាធរសង្កាត់ក្នុងក្រុងសៀមរាប និងសប្បុរសជនទាំងអស់ គឺជារូបភាពឆ្លុះបញ្ចាំងយ៉ាងច្បាស់ពី «វប្បធម៌ចែករំលែក» របស់ប្រជាជនកម្ពុជា ដែលមិនបោះបង់គ្នាក្នុងគ្រាលំបាកឡើយ។ សកម្មភាពព្រះសង្ឃ អាជ្ញាធរ និងសប្បុរសជន នាពេលនេះ គឺជាការបង្ហាញពីស្មារតីសាមគ្គីភាព ក្តីស្រឡាញ់ និងការគាំទ្រដល់កងកម្លាំងការពារព្រំដែននិងដើម្បីបង្ហាញពីការរួមសុខរួមទុក្ខរវាងសមរភូមិក្រោយ (ប្រជាពលរដ្ឋ និងព្រះសង្ឃ) និងសមរភូមិមុខ (កងទ័ព) ក្នុងការចូលរួមចំណែក ជួយសម្រាលការលំបាក និងការខ្វះខាតផ្សេងៗរបស់កងកម្លាំងការពារព្រំដែន ព្រមទាំងលើកទឹកចិត្តនិង ផ្តល់កម្លាំងចិត្តដ៏កក់ក្តៅដល់វីរកងទ័ពជួរមុខដែលកំពុងលះបង់ដើម្បីជាតិផងដែរ។

លោកស្រី ឈិន សាវី ចៅសង្កាត់គោកចក បានថ្លែងថា ការនាំយកនូវគ្រឿងឧបភោគបរិភោគមកជូនបងប្អូនកងទ័ពនាពេលនេះ គឺស្ដែងចេញពីទឹកចិត្ត និងការដឹងគុណយ៉ាងជ្រាលជ្រៅរបស់ព្រះសង្ឃ សប្បុរសជន ក៏ដូចជាប្រជាពលរដ្ឋ នៅសមរភូមិក្រោយ ចំពោះវីរភាពដ៏អង់អាចក្លាហានរបស់បងប្អូនកងទ័ព ដែលបានលះបង់កម្លាំងកាយចិត្ត ជម្នះរាល់ការលំបាក ដើម្បីការពារបូរណភាពទឹកដី និងសុខសន្តិភាពជូនជាតិមាតុភូមិ ។សូមបញ្ជាក់ថា អំណោយសប្បុរសធម៌ដែលបានប្រគល់ជូនកងទ័ពគឺមាន៤គោលដៅគឺមានគោលដៅប្រាសាទតាមាន់ធំផ្នែកខាងលិច ប្រាសាទខ្នារ អូរស្មាច់ ច្រកជាំសាង៉ាំដែលសម្ភារៈរួមមានដូចជា៖ ទឹកសុទ្ធ ត្រីឆ្អើ៣ កៅស៊ូតង់ គ្រឿងទេស កាហ្វេកញ្ចប់ ថ្នាំពេទ្យ ត្រីប្រឡាក់ បារី ស្ករគ្រាប់ សាច់ជ្រូក ធូបមូស ប្រេងឆា និងថវិកាមួយចំនួន ដែលជាការចូលរួមចំណែកដោយសេចក្ដីជ្រះថ្លាចេញពីបេះដូង៕

ដោយ ឃុត សៅ